November ni 11 hi, Kumpinu hnuaia kan awm lai kha chuan Armistice Day a ni a. Lammualah kan kal a, chhun dar 11 chiahah laipui an kap dur dur thin. Indopui tawp hriatrengna a ni awm e. Ka pain min hruai thin a, pangpar (poppy) lem hi pawisa 4-in (12 paisa) kan lei thin

 

Hei, November 11 a ni leh ta reng mai! Khrismas leh Kumthar vela hman tur thing leh tui khawl a hun thin. Tlangval upa lamin thing kih tur, Khrismasa tuah tur an han zawng sauh sauh a. Mahni veng Khrismas-na tur a thlengtu inah, thingpui lum nan leh ruai siamnaa tuah tur thingphurh a ngai a. Chu Khrismas a thlengtu ina ruah theh tumin in tina nula, tlangval, naupang hawklak nen, nula zawng zawngin em (paikawng) leh hnam, chem nen an phur chhuak a, tlangvalin hreipui/bahhnuk kan pu chhuak bawk a, thing ro hmuh sa kha kan panho dul dul a. In khatah nula 2 leh tlangval 2 pawh se, an thawk vek zel mai, ruai kan ei vek dawn avangin, inthik ahnekin thawm tak nih kha nuam kan ti. Tlangvalin thing ro ding chu kan (ka intelh ve mai) han kit a, kan au dur dur a, chutah, fâk tawka tan bung pawl kan awm, nula lamin a tang ro kha fâk tawk bawkin an phurh tur an lo tan bawk, naupang lamin thing an lo kuur a, lui a hlat viau loh chuan chalte kan han sawh pawp a, lui tui an zuk chawp bawk a, kan intulh huh pheng phung zel mai maw le. Tlang thing phurh ni hian a rukin, tlangval chuan thing deuh thiam nih kan inel thin. A tan bun hi chak nih a ngai a ni mai a, fâk tawk bawka eh phel mawlh hi a hrehawmin a harsa, thing ti awmzia hre thiam chuan, chak lem lo mah se an ek keh/phel hma bik zel.

 

Tunlai thangtharte hi chuan, Aizawla mi phei chuh… hreipui leh bahhnuk hre hang tawh lo deuh hlir in ni awm phawt a, Langrawng leh Tangkun chem tih ang reng te…. eng emaw zawng chuan in vannei thlawt mai. Amaherawhchu, a huhoa inrim nawmzia erawh chu, changkanna avangin in tem pha hlawm lo niin ka ring. Tunah chuan kan hmet zeuh a, kan herh zeuh a, gas thuk a alh a, light a êng zel mai a. Aizawl nula/tlangval tuikhur la hmu lo in thahnem riau tawhin ka ring.

 

Tlang tui chawite hlei hlei hi asin nuam chu. PHE tih angrengte awm hek lo. Tuikhur – Sakhisih, Lungkuang, Darnam, Dam-tuikhurm Lungrem tuikhur tih ang rengte hi kan hre bel tel tul mai nia. Mi zawng zawng chawi a nih avangin a kang deuh vek reng mai a, chu tak chu nula/tlangvalin Khrismas nan kan han chawi ta thin a nia. Keini ang tuma ngaihzawn ve loh pawh hian nuam kan ti ve em em mai a ni. Kawlphe khawnvar nei chu pahnih khat bak ni hek lo, naupang rual meichhe ken kha kan rinpui a ni mai a. Tui a lo kang ngei a, nula upa lam pahnih khatin tuikhur an thutchilh a, a bak kha chu… 2 tetea thu an/kan awm, rual deuha thu an/kan awm. Theihna nei (inngaizawng)-te chuan fal deuhin se sein thu an sawi a. Keini ngaizawngtu nei ve lo chu meilum bula thu nula bulah ngheng ngam loin kan thu ve mai mai thin. Oh! Khang Lalliani, Vanpari, Zochami, Biakchhungi, Zachhungi, Lalzuali… ka thiante kha ka hre reng lo thei lo. Anniho kha chuan mipaah pawh min ngaiin ka hre lo. “Lallian, ka ngaihzawng tana ka lei dara pangpar lem siam mawi tak ka rawn bel chhuah min dil a, ka phal lohte kha… ka inchhir… ka ngaihzawng khan min ngaihzawn phah pawh a ni si lo… tunah i hre thei tawh si lo, Vanramah he ka inchhir tawngkam hi lo hre teh aw… In vaiin ka ngai che u, Vanpar, BCH…

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.