Ka Huang (Nov. 19, 2017)

Thalai, mi thiamho zingah Whatsapp in tia maw ni-ah hian ka inrawlh ve vel a, Thiam lo chung chungin ka kut vei lamin ka chelh a, kut zungchal hmawrin ka chhu ve kauh kauh mai a; mahse, he thil hi chepa nung khai an sawi ang mai, a nung em em mai a, ka khawih lo emaw tih pawh hi a lo lang leh thin! Ka chhut tum ding lama mi hi a lang hmasa zawk fo mai a, ka hmet kir sek mai a, chuti chung pawhin tlar 10 vel ka thawn chhuah veah hian typing mistake an tih chu 4/5 vel a awm ziah ta ve ang.Thalai, mi thiamho zingah Whatsapp in tia maw ni-ah hian ka inrawlh ve vel a, Thiam lo chung chungin ka kut vei lamin ka chelh a, kut zungchal hmawrin ka chhu ve kauh kauh mai a; mahse, he thil hi chepa nung khai an sawi ang mai, a nung em em mai a, ka khawih lo emaw tih pawh hi a lo lang leh thin! Ka chhut tum ding lama mi hi a lang hmasa zawk fo mai a, ka hmet kir sek mai a, chuti chung pawhin tlar 10 vel ka thawn chhuah veah hian typing mistake an tih chu 4/5 vel a awm ziah ta ve ang.

A thente chu (?) naupang te te tak meuh ni tur an ni. Fasuar, Empai tih ang reng la hre lo leh la hmu lo an kat nuk ni tur a ni. Mizo hi kan changkang ta a ni ang e. Tuium, Dawrawn, Thul tih ang reng la hmu lo mai loin la hre lo kan thahnem em! Chuvangin, he ka thuchhuah tur pawh hi, chhiar tawh awm mah se chhiar lo thahnem tak an awm tho ka rin avangin ka rawn chhuah leh thawr mai a ni.

Naga ram kan hriat lar chu… Angami leh Sema tam deuha, Kohima district leh Ao hnam tam deuhna Mokokchung district te khu a ni deuh ber awm e. India a independent khan Saphoin Excluded Area-a an dah, an enkawl ve lem loh – Hnam chi hrang hrang tlem te te awmna chu independent rual khan India lakah an hnutchhiah a, Kha… North East Frontier Agency an tih kha. Mahse Naga ho awmna chu NEFA ah dah loin District thar an siam a, Tuensang district an vuah a. La hmanlai veleh chhawng tak an ni. 1952 te khan hnam thenkhat chu Adama suit an la ni. A tam ber pawh mipa chuan hren pereng chauh an kaih a, hmeichhia chuan pawnfen phel inches 8 vela sei/chhing hi an feng. An inbual ngai lo. Hmeichhia chuan thi an awrh nasa hle, hnute pawh a ngai ngai a ni mai. Nula chu an hnute a kawh mawi thin si a….? Pawnfen chuti taka chhing, a phel lehnghal feng e ti lo chuan an thulang ngai lo. Kum 10 emaw lai ka awm chhungin thulang pakhat tê mah ka hmu lo. Khuanu hian a awmna tur awm takah a dah a lo ni ber awm e.

Kan thlen tirh chuan, hnute velte hi hmuhnawm kan ti thin ngawt mai Camera 1.22 D-3 ka lei a, roll film a hek hle. Tin, nula thla lak dawn hian an thi awrh siam thatsak a ngai deuh ngei ngei nia! Annin engah mah an ngai si lo. Mahse, mutpui lam chungchangah chuan sawrkharin a veng nasa. An hriat vaih chuan an hna atangin an ban hmak mai a. Thu dang awm loin Jorhat-ah an phur thla nal nal mai a ni. Chuti lo chu an thih a hlauhawm tlat bawk a ni. Lu han lak mai hi, Tuklo perh tluk lekah an ngai a ni ber mai.

Governor Jairam Das Daulatrama khan a fanu nula pahnih rawn hruaiin Republic Day Celebration an rawn hmang a. Tuensang lammualah Official function te an tih zawh hnu chuan le, kan bawrhsapin lâm tura a chah Upper Konyakho chu an lo chhuak ta nguai ngai mai a, mipa, puitling hlir 100 emaw lai mai. Anni kan VIP te chu lammual laiah an dah a, an han lâm kual ta mup mup mai a. Heng Upper Konyak kan tihho hi chutih lai chuan ADAMA SUIT vek an la ni! Chutia Indian nula, mipa zahmawh pawh la hmu ngai reng reng lo chu, patling za rual vel zahmawh zahpui miah lo, a bawng te, bawng lo te, sei deuh te, tawi deuh te chu le…an then thenin an then kual ta suau suau mai a. Nula pakhat zawk chuan a rap lutuk ni maw? A te ta re ru mai a, a rang a rangin an pawm chhuak a , engdang mah sawi loin an hawpui vang vang mai! Damlohna avangte a nih ngawt loh chuan, kan aia naupang daih a ni sia, la dam tak maw, fing leh ta maw. Tun thleng hian ka ngaihtuah chhuak zauh zauh thin.

Thiante u, Hei Bvt (Bethlehem Vengthlang)-ah hian kum 49 ka awm ve chu a ni ta reng mai. Veng mawng, kawmthlang nei loa awm kha ka nia. Mahse, awm ve tâkah chuan kan pung hret hret a, Forest ram atanga, Pachhunga College chhunin kan siam a, hei kan Chief Minister-in a rawn ti-PWD road a. Tunah hian concrete tumin JCB nen kan ri ta map map mai! CHHUANLIANA ROAD tiin a kawng hming chu an phuah leh nghal a. Kum 1968-a ka luh thlak tirh a, kawngpui thlenga, mahni chauh a, changkham (Mizo pa step) laite kha ka hre chhuak rum rum mai. Ka lawm teh a nia…

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?