Ka Huang (Nov 4, 2018)

October ni 25 leh a tuk, 26 khan Dr. Ringluaia te nupa kum 50 inneih cham phaphak leh Mizo Writers’ Association Proficiency Prize, MA,BA leh HSSLC (inti ta emaw ni) Mizo subject-a ti tha lawmna inkhawmnaah ka kal ve a, HSSLC Mizo tawnga ti tha ber lawmman Rs.5000 hi ka pa, Ch.Pasena hmingin kan tum ve avngin kan chhungkua kan kal ve thin. October ni 25 leh a tuk, 26 khan Dr. Ringluaia te nupa kum 50 inneih cham phaphak leh Mizo Writers’ Association Proficiency Prize, MA,BA leh HSSLC (inti ta emaw ni) Mizo subject-a ti tha lawmna inkhawmnaah ka kal ve a, HSSLC Mizo tawnga ti tha ber lawmman Rs.5000 hi ka pa, Ch.Pasena hmingin kan tum ve avngin kan chhungkua kan kal ve thin.

Chu intihhlimna hmun hnih ka kal luih vena hram hram chhan chu thenrual hlui ka hmuh ngai loh loh ka hmuh ka rin vanga kal hram hram ka ni. Ka tum ang ngeiin ka hmu hlawm a, anmahni lokal mah suh se, an tu leh fate tu tu emaw khan engvang tak ni maw, Chhuanliana BVT tih ri an hriat khan an lokala chibai kan inbuk nawk nawk mai a, kei putar mi â tawh tan phei chuan hriat sen rual pawh an ni lo. Hriat sa inchibai hi chu thuhran, ka la hmuh ngai reng reng loh tu tuin emaw a nu/a pa/a u vanga min han chibai hi chuan lung hlui kha a leng thar a, ka rim thin laite kha a lo kir leh a, a lunglen thlak nuam ang reng

“Mission veng nula ka rim chhuak vek dawn e,” ka tih tumin Dr. Ringluaia u, Zokhumi ka rim e ka tia, an nufain an awih lo reng reng ringawt mai a, an nufain, “Eng nge in duha i lo len?” an ti sek mai a, “Nula ta fam chu ka rawn rim che,” ka tih pawhin an awih lo reng reng ringawt mai. Engle khawle, chumi kum chuan Mission veng nula chu ka rim chhuak vek ta tho tho. Zokhumi te nufain rimah min ngai lo mah se, Keimah zawkin ka rim tlat a.

Chu function eng emaw zawkah chuan hmeichhe pakhatin chibai mi rawn buk pahin, “I sawi fo, Biakchhungi fanu ka ni,” tiin chibai min rawn buk a, chulai chuan ka thlarau chu khawi dangah mah cheng loin Dawrkai vengah, Lalliani te, Zochami te, Vanpari te, Zachhungi te leh Biakchhungi te bulah chuan a cheng daih nia. Zothansangi, kan kawt mai (Mission Veng) pawh a fanu nen ka hmu, a fanu chuan a pa – Fakzuala aiin a pu, Lalnghingloa ang zaw mahin ka hmu. Thian hlui te, an tu leh fate han hmuh hi chuan lung hi a leng ngawih ngawih mai ni (Zothansang, kha mi nia, i fanu bula, “Hei dar 12-ah ka sana a thi ta mai, Pan bazaara Kakati –AIR-ah i u Lalrenga..kha i fanu ka hrilh ta lo kha ka inchhir!)

A khawii zawk function-ah khan nula (a ni ang chu ka ti mai a) pakhat, sang thlerh thlawrh hian chibai min rawn buk pahin, “Thangkaserthlumrua fanu,” a rawn ti a. Chutah pawh chuan 1940-a Pawl IV kan niha Buchhawna grammar kan zir thin a, Proper leh Common Noun Pu Chawnga min zirtir thin lai ka hre zawk mai. “Proper Noun chu hming bik nei a ni… Lalvunga, Zosanga, Hauthuama tih ang te hi,” a’n ti te te a, Common noun chu hming bik nei lo – Thanga tih ang hi…Khaimah aw…Thangupa, Thangthlasika, Thanghmuihmula, Thangchiteluia, Thangeka… THANGKASERTHLUMRUA tih pahin kan pawla Thanga (Hmingliani Bakery nu’ta) chu a’n kawk ngei a. A ni taka, Sihpui kan khuap a, a bul lawka Pu Chawnga serthlum chu kan ru reng mai lah tak a, Thanga hian a hnaih deuh vangin a man zing bik ni ngei tur a ni. Khang hunte kha a kir leh tawh dawn si lo, ngaihawm ngawih ngawih mai nia.

Thian hluite tu leh fa hmuh mai pawh hian lung hi a leng duh tak meuh a ni. Tunah tak phei hi chuan, mipa thian kawm thin dam pakhat mah an awm tawh loin ka hria. Hmeichhia chuuuuh… Lalchhingpuii, Thakthing, Rozami (KLK), Thangbawihi (MSV thlang tih vel mai hi an ni ta.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?