Ka Huang (Oct 1, 2017)

1947-48 vel ka ziak a, ka rilruah eng eng emaw ka ngaihtuah chhuak leh ta. India a independent tak siah chuan Lushai Hills (Mizoram) Superintendent of Lushai Hills-in Excluded Area a nih avanga direct-a a rel thin kha a lo zal ta si. Mizo Union kha lo dingin Lal (Chief) ban kha an thupui a ni ta ber rih a, tichuan sawrkhar thuawih loh (Civil Disobedience) kha a awm titih reng bawk a. Keini Census staff (Census Supervisor 2 leh Census Enumerator 13)-te kha puakphur tel loa zin chhuak thei lo kan nih avangin Lal zawng zawng Parwana min pe a, Lal hnena kan dil chuan Coolie (puakphur) 1 min pe ngei ngei tur a ni. Chungte chu thiahtir duh avang ni maw, tih harsat dan kha an zawng nasa mai thin. Chung avang te, keini tana awlsam zawknate avang ni fawmin, puak phur nghet ni khata Re. 1/- a lak mai a, sawrkhar phak bak siki (25 paise) chu mahnia tuma, thian dun ang maia zin dun kha kan duh thin. Chawlhnia, puan ilo su turte pawh a ni fawm nen. Lal zawng zawng kuli dil vek kha, a buaithlak em em a ni. Chuvang chuan Hmar lama Aiduzawlah khian chuti ang, puakphur nghet, ti mai ila, ni tin Re. 1/- duh an awm emaw tiin ka thlen in pa, Khawchhiar hnenah sawi darh turin ka ngen a.

Aiduzawl kha an lo Union nginngen hle em maw ni dawn ni. Sawrkharin ni tin siki thum (75 paise)-a puakphur a pek theih laia a to zawk, ni tin Re. 1/-a han zawn tlat chu sawrkhar hnathawk tak tak a ni lo a niang, tih Union hotute rilruah chuan a lo lut a, min zawt fiah turin zanah an Union President Pu Chhunbura (PS Ztu. pension?) sikula ka pawlpui Lalzuala pa, amah Pu Chhunbura ngei pawh ka pa sikul (Teachers’ Training School)-a awm reng, kan inah ngei pawh lo kal fo, ani pawhina min hriat a lo ni a. Nimahsela, ka lo muhil tawh si a, min kai tho hreh a, a haw leh ta a lo ni. Zingah chuan ka thlen in pa chuan min hrilh a, an mi rinhlelh dan ka duh dan kha a inpelhsawlh ema ka hriat avangin ka zuk chhuk a, hnang a lo hlai a, min hmuh veleh, “E, engtikah nge i lo kal teh khiah, i pa a dam em?” a lo tia. Keiin lungawi lo deuh hian, “Nizana in mi check tum kha ka nia, sawrkhar hnathawk tak tak pawh va ni suh te min tih avangin, hei sawrkhar lehkha ka kente pawh ka rawn keng a, chhiar teh,” ka tia. “A ngai lo, ka hre chiang em mai che,”?a ti chung chungin ka chhiar luihtir ve ngat a, chutih pah chuan engvanga siki thum (75 paise)-a puakphur zawng nge ka nih tih chu ka hrilh fiah nghal a. Kha fiah tak tak maw. A hnu lamah chuan Chhingchhip, awmpui venga Pu Chawndenga, pa fel deuh mai ka chhawr ta nghe nghe a, thian dun ang maiin, dam mawh nikhuaah te kan inpui tawn a, kea kal ni tin kan nih avangin eng emaw chang changa luia insukte a lo tul nen, siki (25paise) chawi belha thian ang maia hman theih neih chu hlu tak a ni.

Heng thil pawimawhna nei lem lo ka’n sawi duahna chhan chu, kum 70 dawn lai liam tawha Mizorama sawkhra hnathawkte zin dan vel leh Union lo din tana sawrkhar thu awih loh tan dan velte kimchang lo deuhin ka’n sawi ve mai mai a ni.

Tichuan, October thla chuan Census hnathawkho chu kan bang leh ta mai. Hriat mai mai atan. Census Supervison hlawh chu LDA pau scale tho a ni. Chutih lai chuan Rs. 114-15-0 (Rs. 114.85 paise) p.m a nih chu. Khang lai khan Vawksa ser-ah duli a tling loin ka hre ta. Tunah hi chuan LDA pawhin cheng sing thum dawn dawn a ni lawm ni an lak le! Mahse, kha tih lai khan Re. 1/-in hna a thawk thei hle a ni.

October 1948-a ka thlawn leh tak avangin, ka nu chu lo lamah ka pui leh ta a, favang ni raw sek sek, kan chhuak ni tin deuhthaw reng reng, vau hnimte hi a ngai thei der lo. Kan buh pawh zu-va lakah a him reng a ni. Chumi kum chuan phur 40 (tin 120) kan thar reng a. Ka hawklak bawk a, hruih mai duh tawk loin Fasuar sâng tawkin, rawnal ban 4/5 vel zela telin, awn dâ-in ka siam a. Ka pa chuan hah min tiin chuangtlai a ti khawp a; mahse, kei chuan Nula sawm duhtawka fasuara sukpui ka tum si a ni.

Ka pa pek chuan Fasuar la hmu ngai lo tiin a tawnhriaah Pi Teii (Rees Roberts) kha a lo sawm pek a; mahse, tlangvala pumpa, fasuara nula leh tlangval inkuah bial karah khan kan kuah ve mai a, kan han chhir bial ta thin a, Pi Teii, Teii lo e, pawh a sawi theih loh, kan ri hehu mai a, buhpawlte chu kan khim lek luk mai a, nula leh tlangval inkar thlakin, sap nula nen, indim miah loin kan han chil tak tak chu, kan tlusawp leh nalh thin. Nuam ve tak a ni.

Nula leh tlangval naupang zawkte u, kan nun kha thingtlang viau mah se nuam deuh asin. Tlangval nunte kha tlawmngaihna hlir a ni mai. Tunah te hi chuan, Zualko awm tawh si lo. Hmanlai chuan khaw hnai deuhah kan zualko a, kan hawnga thlan kan lai a, a zanah kan riak zui leh a… Tlangval laiin mahni ina riah a khât khawp asin. Khawhar ina thla khatte kan riah chuan mitthi dang an lo awm leh a, chuti reng reng. Hetia ka sawite hian min hruaitu… Rinthanga (Sapthlenga tia ka koh) te kha ka hre chhuak lo thei lo. Hrehawm khan a hre zawk em ni chu aw tih tur zuk nia!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?