Ka Huang (Oct. 29, 2017)

Kum 1949 chuan vanneihthlak deuh maiin, Primary sikul zirtirtu hna officiating a kum khat thawh tur ka hmu ve hlauh mai a, a tir chuan Chaltlang-ah ka han thawk lauh lauh a, mahse rei lo teah Mission Veng. LP sikulah min sawn leh ta a, kan sikul chu sikulpui bula Sikul-sen kan tih khi a ni. Chutah chuan Class I leh Class II ka ho ve a, mipa hlir an ni. Kum 19 chauh ka la ni bawk a, Pawl I & II ah chuan Dr. Ringluaia, Durtlang Synod hospital hotu ni ta kha a awm. Tin, pawl II ah chuan tunlaia Pathian thu hriltu ropui Vanlalnghaka hi a awm bawk.

Chulai huna Primary Zirtirtu hlawh chu Rs 76/- p.m. a ni. Zirtirtu hna kha nuam ka tih zawng tak mai a ni a. Ka kham lo a ni ber mai, ka zirtir naupangten nuam an tih leh tih loh pawh ka dawn lem lo. Naupang zinga hlim taka awm kha nuam ka ti em em mai a ni. Tum khat phei chu Chite (lui) hnar – Dhobi nullah an tih maiah pawl I & II chu kan picnic nghe nghe a, nuam ka ti tak meuhin ka kham lo hle a ni. Nimahsela, kum khat hna chauh a ni si a, 1950 chuan ka kawkva leh titih ta mai. Sikul chawlh hnu kum tawp lam chuan ka khua a sik leh thin.

Chuti chung chuan 1950 a loa neih turin, tuna ka khawsak takna Bethlehem Vengthlanga, Bawrhsap ram min pek hi ka nu nen kan vat thin. Pawih tlangval, hlawhfaah kan ruai bawk a, tin 2 hmun emaw kan vat.

Lo hal hma, Feby 50 thla chuan, Chalrang khaw tlangval, Vanlalchhunga nen, Aizawl chhimchhak kil, Farkawn, Thaidawr, Samthang, Khawbung, Samthang velah khian naupang lawm zuarin kan zin zak zak thin. Chuta ka zinnaah chuan Samthang lalnu Pi Darnghini ( Ngurthanga nu) khan an khaw daia British thlawhna tla a, a chuang mi 3 (?) thlan an kawta a phum, an thlanlung pawh a phun ka chhiar a, ‘Here lie unknown soldier…’ tih vel leh “When you go home tell them of us…” tih te kha mawi-hnai takin a ziak a, Indopui reha, Britishin an mite ruang an rawn khawm khan, an ruh te lai chhuakin UKa phumah an hawn ta a niawm e.

Kan sumdawnna kan zawh chuan Bvt-a kan lo chu halin lo lam hna chu ka buaipui leh ta char char a. Mahse August 1950 hi chuan ka tawp khawp mai. Khawsik zeuh zeuh bak a,, ka ke dinglam nghamit leh ka hnungzanga ngawt (cyst) chu Durtlanga in-admit meuhin Pi Puii khan min zai sak nghe nghe maw le. Hmun hnih laia zai a nih avangin minor operation mah ni se, thlakhat dawn lai damdawi inah ka awm, Tlangvala pumpa, Nurse nula te pawh ka ngaizawng hman nia!

Kum 1951 February khan, Thalai hun atan Assembly a awm a, Mission Veng Biakin ah. Chutah chuan thusawi turin min ruat mauh maia, Pulpit atangin ‘Nula leh Tlangval te hian kohhranah eng nge an dawn, Eng nge an beisei” tih thupui a nia. Ka zak ngei mai. Mipui chu an sen fukin ka hmu. Mahse Pastor Chhuahkhama khan Pulpit-ah emaw lecturn-ah emaw indin phawt chuan kawngkapui chung saw en ula, miin min emaw an ti vek ang che u, mi mit reng reng en suh u, in zak mai ang a tih hriain, tumah hmu loin ka sawi ve thei.

Kum 1951 tawp lam atangin Sept 1952 thlengin Forest Guard ah min appoint a, Bilkhawthlirah min post nghe nghe. Forest Guard bawk Pu Bawktaia hoin Sai sual kan kap a, ka zui ve a, ka hlau nasa mai. 12 Bore ulhbuna Sai puitling han tin chu, tluin a rinawm hleithei lo. Kah dawn meuah han tin chuan sai hi lian tak a lo ni. Bilkhawthlira min post chhunga ka ngaihzawngte kha la dam tak maw le??

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?