Ka Huang (October 7, 2018)

Tun tum chuuh.. Tunlai Aizawla awm tawh ngai lo nia kan hriat ka’n ziak teh ang. Hmanlai ti ve tawh mai ila, 1940-60 vel kha chuan tlangval hna pawimawh tak mai chu mi zawn leh thlanlaih a ni thin. Tunah pawh thlan chu in lai tho naa in laih dan a dang ta deuh. Hmanah chuan kan inchuh nasa mai thin a, thlan khura lai mek khan a chhawk tura chhuk kha a pe mai phal lo a, chhawk tuma lut thla kha a chhuak leh mai duh bik lo a, an inchuh ta vak thin a ni ber mai. Kan tleirawl lai thlan kan laih tantirh vel lai chuan kan lut tha ngam thin lo, Val upain, “Lo kian rawh u,” a’n tia, kan lut ve ngam tawk thin a ni. Tlangval phanchangho chu an inbuan vak zel thin nia.

Mitthi ruang zawn hi Durtlang damdawi ina thi, Lungleng khua pawh ka thianpa chhungte a ni a. Kum 1950 khan lawng sipai, Rina a boral hlauh mai a, Dawrpui tlangvalhoin an rawn zawn chu Dawrpui veng tawp, an Biak in pelh deuh hratah sawn ka va tawk a. Keimah chauh ka nih rih avangin ka tei ve mai mai a, Dawrpui tawntirh kan rawn thlen phei hi chuan kan veng lam mi (Aizawl South) an awm nual tawh a, kan tang ve tan deuh ta a, kan pung talh talh a, Lammual an pelh kan phal ta lo a, kan nawr kir tan ta a, chuvang chuan min pe fel ta thuai a. Aizawl South han tih hian, Tlangnuam, Thakthing, Venghnuai, Kulikawn leh Mission veng (Venglai, vengthlang, Tlangveng a huap) kan ni. Chumi tuma kan val upa chu Kulikawn Pu Challianchhinga fapa, Hminga a ni. Hlimen chu Pu Rokunga (printer)-in a rawn ho a, Mel 3 pelh deuhah kan intawka, kan han innawr tak tak mai chuuh… Hawklak lai a ni bawk a, kan ri hulh hulh mai a; mahse, kei chu Hlimen pa, puanveng hian min rek a, kawng koah, awn tuiin min rek bet tlat mai a, ka awn dan kha tanlak a harsa khawp a, kan tawt bawk si. A tawpah chuan engtin tin emaw ka chhuak thei ta a, ka’n rek phei ve thei ta a, kei aia pa tê a ni bawk a, thahruaiah chuan min hneh lo deuh a niang, ka nawr vak mai a, Hlimenho pel rawk chuan ka nawr phei a, ka bulah chuan Mission Vengthlang Pu Zuia (Lalzuiliana) chuan a Hlimena a unaupa, Challiana chu a rawn nawr vak mai lo niin, kan va nui the thaw hlawm a.

Chutah kan kir phei leh a, kan han tal tak tak chu, thiante zarah a chak lam kan ni bawk a, a nuam teh a sin! An Val upa Pu Rokunga chuan, “Kan ngam lo che u a ni e, min hlan mai teh u,” a ti a, chutih lai chuan kan Val upa khan, “Ti tawh suh u,” ti siin ti zel turin kan mawngah min nawr bawk si, Nuam tak a ni, nuam tak! A tawpah kan pe ta a ni. In kan thleng a, kan mu chauh tihin ruang lo kir thu an rawn tlangau leh a, kan va zawn phei leh a, kan tam kher tawh mai; mahse, pakhat mah an lo chhuak lo. Khawchhete daiah Lungleng tlangval kan hlan ta a ni. Khatiang mi zawn inchuhte kha a awm ta si lo a, nula rim laia tlangauin, “Mi zawn tur,” a tih hriatte kha a nuam, kawrchung kan han theh thla a, a tuka lam turin. Nulate khan mi zawn thin tlangvalte kha an ngaisang si.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?