Ka Huang (Sept. 10, 2017)

September ni 3 (Chawlhni) kha Indopui II-na tan ni (Kumpinuin German laka indo a puan ni kha a ni em khaah?) Kum 78 a nih tak chu.

Kum 1944-ah Mission-in High Sikul pawl VII a din tan a, biak inpui thlang YLA Hall-ah an kai a. Kei chu, 1943-a ka lo pass tawh avangin ka tel ve thei lo a, ka nu leipui ka thlawhpui mai mai thin. Zan lamah erawh chuan nula rim (tleirawlpui kawm) ka thulh khât hle a niang, tum khat chu Chawlhni tlai leng hawng, inkhawm dar khatna rik hma hian ka mu ta mai a. Ka nu chuan damloah min ngai a, min zawt chhen mai!! 1945-ah pawl VIII a awm ta a, ka zawm ve ta a. Pi Teii (Rese Roberts) lo chhuak hlim khan Biology min zirtir thin a, Biology class kan neih chuan khawlin kawta in ruakah kan chhuk thla thin. A sira desk dah atang chuan Pi Teii mal hi a lang duh riau bik a, chu hmun (a sir ber) chu hriain K.C.Lalvunga, Lianzoa leh kei chuan chan tumin tlan tak tein kan tlan thin nia! A lo chhuaktir kha chuan malpui zahpui nachang hre hek lo, keinin hmuhnawm kan ti si, chu hmun bik chang kha chuan Biology aiin Malpuiology kha kan buaipui zawk, chan a har mai pawh a!

1945 February thlaah U Chalchhunga leh Sailoan Assam Regiment sipai tur an rawn la a, tum ngai reng reng loin ka tum thut mai a, intlar ni chu Inrinni a ni a. Mahse, Hliri nen Lalnghingloa nen Chite sangha vuakna tur Kangtek kan lo deng vek tawk mai sia, sangha kan vaw ta zawk a. A?tuk tuk leh, Thawhtanni chuan kan va kal a, Civilian Clerk hi a lo awm chauh tawh mai a. Ka saptawng thiam zawng zawng pek pek rawkin ka’n zawk vel a, “Vawiin hian Aizawl-Silchar road-ah a huhoin an chhuk, bangla tina riak tur an nia, in umpha mai ang, an rualin kal ula, Shillong-ah in in-enroll mai dawn nia,” min tia. Thawhlehni chuan thian dang 2 nen kan um ta a, Thingdawl velah khuan kan umpha a, kan tel zui ve ta a. Rengte kawn sipai camp hluiah Good Friday kan hmang a. Baktawng khua Ziona kha a tel bawk a, “Zaiawna nen kan zai awn awn mai dawn e, chu lo chu zai awn a awm lo,” kan tia, a lâm vak vak mai. Partition hma a nih avangin via Sylhet-in kan kal zel a, ni tin bus 1 chauh min provide theih avangin sipai camp-ah a then chu kan awm rei hle. Dailen ina For BDRs only tihte kha hre mang hek lo i, lo va daileng tawkte kan awm a, min um zar zar mai maw le!

Shillong,?Happy Valley, Karen Lines chu kan thleng ve ta hlawl a, Aizawl Clerk lak tawhho zingah khan ka tlar ve tawp mai a. Chutih lai chuan fit 4 leh inches 11 ka ni! Record Officer, 2nd Lieut. Jibeswar Chetia chuan min han bia a, “Nang chu one step forward,” tih pahin min pawt hma bik a; mahse, ka la in-enroll tawp si lo. Tichuan, Regimental Medl. Officer hmaah min hruai a, Medical Orderly chu Aizawl Dam veng Biakliana a lo ni lehzel hlauh mai a, RMO, Capt. Gupta chuan, “How old are you?” min tia, kawh fe hian, “18 years, Sir,” ka’n ti chu. “Don’t tell me lies,” min tia, a nui var var mai a, Bengali nelawm hmel tak a ni. Tah chuan, “Minimum age a ni alawm,” ka tia, a pawi lo tiin 17-ah min dah ta a, taksa teh chu Biakliana chan a ni a, minimun requirement a sawi zel a, sam lam fit 5 leh inches 4, awm len zawng 34 inches a ti ta zung zung mai a, RMO chuan a lo ziak zel ringawt a. Tichuan, sipai Clerk ka tling chu a ni ta reng mai! MAHSE, K’u Chhunga (Ex-Chief Minister kha, ka nu U fapa a ni) St. Anthonys atangin a lo chho, kei, lu meh kawlhtir tumin ka lo thu. Barrack-ah min hnuk thla, min hau zek mai a, sipai e ti loin ka’n tap leh rih thin! Min hawnsan lo thei si lo a, thiante chu ka zawm leh ta a. Family Allotment Branch, Record Office-ah, 2nd Lieut. Jibeswar Chetia chuan min dah ta a, Money Order receipt lokir hi Individual running Ledger Account-ah an hmuh ni kha ka ziak lut a, hna chu tam tak a ni.

Ka thiante zawng zawng chu an lu an meh kawlhsak vek a, kei chu K’u Chhunga’n min hnuk thlak vang khan meh kawlh lohin zing road running-ah hian ka tlan dum vau vau thin, JCO hian min hau leh thin. Zing khat chu lumeh kawlhtir tumin ka chho leh a; mahse, civilian clerk a lo awm a, “Nang chu clerk i ni lo’m ni, clerk tan meh kawlh a tul lo, Batallion Order Part I-ah chhuah a ni,” a tia, hazam hnenah meh dan tur a hrilh a, chhip sam inches khat leh a chenvein min mehsak ta a ni. Assam Regiment-a lu meh kawn loh hmasa ber zuk ni ia le!

Jibeswar Chetia khan min duh riau mai a, a thu ka awih bawk a. Ani chu nupui fanau neia awm a ni. Clerk-ho kha barrack tawi deuhah a hrangin kan awm a, Kulikawn Christmasnanga te kha kan senior clerk, luhlul ngut mai te kha an ni. Barrack duty turin min rawn ti mai, Senior clerk U Mata te, Promode Chandra Mech te khan an duh lo nasa mai a; mahse, kan ngam si lo. A ding hmasa berah Ngurkhuma a tang a, kei a pahnihna ka ni. Senior clerk khan tumah pass inpe tur a ni lo an tia. Ka din lai chuan kan Hd. Clerk – Jam Mansangliana a lo kal dak dak a, kan HALT dawt mai a, “Jem Hd. Clk on duty,” a tia, ka kalsan a, barrack ka hual leh ta a, a muang thei ang berin ka awm a, ka va thlen leh chuan Mizo tawngin, “CHHUANA, ISUA KRISTA HMINGIN PASS MIN PE TA CHEEEE,” a ti khur ngawt ngawt mai a, pass pe chuang lo chuan barrack chu ka hual leh a, ka va kal leh chuan a lo awm ta lo. Chu chu clerk-ho barrack duty tawpna a ni ta.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?