Ka Huang (Sept. 17, 2017)

Tlem chuan ka ziaawm na a, kumin a delhn tawh a ni ang e, that a chhe riau ta zel mai. Ka KA HUANG rei thei tawh pawhin ka ring thin lo. Pathian thu thu le. Mahse maw, kum 88 ral kai tawh type writer la chhu bur bur hi, Mizo zingah awm ve tak maw!

Assam Regimental Centre, Keren Line-ah chuan Learner Clerk chu 17-4-1945 atang chuan ka ni ve ta ran mai a, zing tin hian lamlianah kan tlan thin a, ka thiante zingah keimah chauh lu meh kawn loh ka nih avangin ka tlan dum vau vau thin. Hei hi Jemadar, Subedar hoin min hmuh hian (lu meh kawn loh tur tih kha an la hre ve si lo ni maw) min hau ziah mai a, ka ning ngei asin. Kan kekawrtlawn dawnte chu a lian/sei nasa sia, mawi leh mawi lo a sawi theih loh. Tum khat ka office kai tur pawh Lt. Davinson-an min hmu a, “Tumhara number kiya hai?” tiin min zawt a, ka la byheart nal lo nasa mai si a (1-3-1945 atangin Assam Regiment-ah Regimental number hman tan chauh a ni. A hma kha chuan number 1 atangin an tan dawt mai) 4…3…2…8…1 …4 ka’n tih chuan, “Bloody Hell, You may go,” min ti tawp mai a ni. Kha mi tum pawh khan ka inthuam tawp luat vanga min hauh tum ni awm tak a ni – mahse, tihngaihna a awm lo. Rajput, Punjabi pa lian pui pui kawr kha kan ha lo thei rih lo si.

Commandant, Lt.-Col. H.E.Madge leh Adjutand D.S.Elwell chuan sap tawng an uar riau a, class-te kan nei thin. Tichuan, Clerical examination leh Basic English exam-na chu kan nei rual thuai a. Clerical-ah pass tha mah ila, Basic English-ah 60% (sixty percent) hmuh loh chuan an lo grade duh lo niin. Kalho zingah chuan keimah chauh 1-7-1945 atangin Havilder Clerk Grade III-ah min promote a. Ka rual hian kan kal rualpui ni lo, U Biakthuama, Chhawrtui khua leh Tlanghmingthanga (Prof. Laltluangliana Khiangte pa) an kaisang bawk. Anni chu tlangval pangngai an ni a. Kei chu feet 5-a sang emaw chauh ka la nih si avangin Bel thum leh a chunga C han bel kha ka zak em em mai a, hook ka lei a, a bel lamah chuan ka thui bet a, ka kawr bana a bahna tur la ka thui thliah bawk a ni. Office-ah chuan ka bel mai, ka chhuah dawnah ka hlip a, kan Jemadar Head Clerk Phukon-an min man lehnghal a, “I bel duh loh chuan ka de-grade mai ang che,” te min ti maw le!!

IORs tih hi Indian Other Ranks tihna a nia, NCO hi Non-Commission Officer tihna a ni. IORs chuan Rum hi tot (peg) khat chauh an lei thei a, NCO chuan club hrang neiin rum pawh tot (peg) 3 kan lei thei, tum khatah. Ka thiante ho, Dawla te, Lalliana te, Khuangliana te hoin min leitir thin a, kei chuan peg 3 kha ka duhtawk em em a; mahse, anni 4/4 tan chuan a hralh thintu Battalion Hav. Major dil a ngai a, ka dil thin. Tum khat phei chu naupang te si i heh hle mai tiin min vau; mahse, NCO-ho chuan in seng hek lo, min leitir tho!

Negro sipai (African) kha an tam khawp a, Lance Corporal (bal khat) pakhat Jimmy West Watemberg chuan min kawmngeih em em mai a, tlai office bân hian ka khumah a lo thu run tawh thin a, ka ning thei a nia aw! Canteen-ah te hian kan thut a phal lo, a malchungah min thuttir zel mai. Bel khatin Bel thum min pawm thin a nih chu. European, African, American, American Negro, Indian te hi Canteen-ah chuan kan inpawlh nuai mai thin. Ka thianpa, Wart Watemberg kha chu African a ni na vang vangin English a thiam khawp awmin ka hria.

Kum 1947 atang khan sipai bân runpui a thleng lo thei ta lo a, Japan leh German an tlawm tak si avangin. Indian Army relinguishment a ni ta huk mai a, chutah chuan ticket min pawhtir a. DV-1 leh DVR, ka clerk-puite chuan DV-1 an pawt deuh vek a, kei chu le! DVR ka pawt ta tlat mai pek a, Deferred Volunteer Regular tihna a ni. Ka pawm chuan kum 18 dang chu tan zui NGEI NGEI a ni bur mai a. Ka’n ngaihtuah thin a, kum 18 dang chu 1947-1965 a nih heh mai si a, ka pawm duh lo a, kan office Record Officer, mi duhsak em emtu – Lt. Jibeswar Chetia pawhin min lainat khawp mai a, DV-1 chuang bang zawng a Jhanshi-a kan thiante thawhnaah te a zuk zawt thul. Min hmuhsak thei ta bik lo a, 27th July 1947-ah min release ta nge nge a ni.

Sipaia ka tan chhung kum 2 leh thla thum lek khan sipai nih man, 1939-45 War Service Medal leh Burma Star chu ka dawng ve khanglang a. Ka hlut ber erawh chu INDIAN ARMY ENGLISH CERTIFICATE, First Class, 28th March, 1947-a ka exam-naa ka tlina Certificate, Major General, HQ, Bengal & Assam Area atanga ka dawn hi a ni. Lehkha thiam ve lo tan chuan hlu tak a ni.

Khang… ka clerk-pui, P.Ngurkhuma, Darlawn Ztu. fapa te, Laldawla, Pu Darhnuaia fapa, Garo Minister (nula) nei ta te, Lalliana S.Hlimen te, Khuangliana, a ban hnua DC office Aizawla pension thlenga thawka Ramhluna inbengbel ta te, U Biakthuama te, Lalthanzama, Compdr. Kaptea fapa, Chaltlangte, Mission Venga mi, Prof. Laltluangliana Khiangte pa lah a boral tawh bawk si. A chhe ber leh nep ber hi ka mal dam a ni tawh mai awm e. Pathian thu thu a nih ber awm hi maw. Kei pawh hi ka KA HUANG peih reih ngut tawh lo ang.

Badluram ka bandhan, Zamin ka niche hai (3)
Taw, Ham Uska ration mila hai.

Ngurkhuma nen Cinema en kan hrat lai te kha, ‘Texas Rangers ride again’ William Holden leh Glenn Ford channa film te kha vawi tam kan en nawn. Khang hunte kha a kir tawh dawn lo, ka mal ngawih ngawih mai bik a nih hi. Tawin tai a awm dawn lo, tawk mai teh se.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?