Ka Huang (Sept. 2, 2018)

Zirtirtu: Daivung, What is your name?
Daivunga: A my Daivunga.
Zirtirtu: Where do you live?
Daivunga: YAS
Zirtirtu: Engvangin nge Yes i tih?
Daivunga: Where chu khawi lamah nge tihna a nia, Live chu cheng, awm, dam tihna a nia.. Kei lamah nge, in dam alawm maw? min ti ni maw ka ti mai!

Kum 1951 December thla atangin Forest Guard-ah appointment ka hmu a, min dahna chu Bilkhawthlir a ni. Ka thla tin hlawh chu Rs. 63 te, 64 te, 68 te a ni thin. Hetih lai hian RCA – Ration Compensation Allowance avangin thla tin a dang mai. Pay Scale: Rs. 28-1-40/-

Ka zawm thla nghal a, Ztu. Khianga inah ka innghat a. Ka hna ber chu inner line reserve en thlithlai a ni. Asst. Forester hnuaia awm ka ni a, hna a hahthlak lo hle.

Forest Guard bawk, Pu Bawktaia te, Aizawl atangin an lo chhuk a. Sai sual a awm avangin a hoin kan pel ta a, sai sual a nih avangin a fimkhur thei ang berin kan veh thin. Sai hi lianpui e ti loin, mau hmunah pawh a tluanga a kal chuan thawm a nei lo reng reng. Ka lo rin dan ve chuan a kalna apiangah ri ruap ruap mai turah ka lo ngai ve rirawk a, thawm a nei mang lo tih tur a ni.

Pu Bawka chu a ramvachal bawk a, ramhnuai sa veh a thiam hle, thawm nei loin a kal zung zung thiam bik zu nia. Heti khawpa lian sai te hi chu veh chiam pawh ngai loa lang lurh mai awm, a lo ni ikhaw lo mai. Chubakah amah hi a len em avangin zawla chuan keini 12 bore silai ang mai mai chuan kah hlum chi a lo ni miah si lo a, cartridge zen thun khat leh a chanve thun a, a mu a tan chuan motor tapperd roller bearing, silai 16 bore-a kah tawk vel awma lian hi mupui angin a thun a, sawi tawh ang khan zawlah chuan a thluak pawha kah rual a ni lo; chuvangin, awi panga a awm lai lo chu a kap duh reng reng lo. Min hrilh dan chuan a thluak pawha kah loh chuan keini silai, kaw herh pawh ni hlei lo chuan kah hlum rual a ni lo a ti mai. Chuvangin, awih panga a kal lai hi a chhak lam atangin kan veh a, a sir, hma lam deuh atangin a mit ko dam vel atangin chhuk zal deuha a thluak pawh ngei turin a veh tang tang mai a ni. A duh ang ngeiin remchang a hmu ta a, a han kap dawt mai a, a saisira tlu loin a thu hnawk mai a ni. Tihchet ngaihna awm hek lo, a nawn kan tan hmawk a, Nawla nen, “Nangni lo buaipui rawh u,” an ti a, kan thimpui deuhthaw. Mi dangin a thu chung nak chu an lo hawng a, mi pahnihin rawthla tlahthi an siam ngar ngar a, thir chem chuan zai chi chai a ni lo, rawthla tlahthi erawh chuan rin aiin a duh, tlahthi na na na a bil hma em thung a. Ram chhuak zawng zawng chuan a nawn leh a lunghnun, a rilfang tih ang reng chu iptepui khat deuhthawin kan insem a. Pu Bawka chuan, “Chhuana, sa chu a tam ti rawh, zu a awm lo mai pawh a,” a tih fiamthu ka hre reng thin.

A tukah Bilkhawthlir a pa chhuakin kan thawk leh a, a vun nen kan fai vek nia.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?