Ka Huang (Sept 30, 2018)

Mission Veng (Aijal) tleirawl ho hian nulat tlangval kan hre hma emaw ni, a hun va thawkhat reng emaw ni, kum 15 ka nihin ka thiante 3 nen kan veng mi tho tleirawl hmeltha deuh mai hi kan ngaizawnga, min ngaizawng ve nge ve lo kan hre si lo a, a hriat dan awlsam ber nia kan hriat chu Love letter thawn a ni.

 

Tichuan, kan thiam ang theuhin kan ziaka, envelope pakhatah kan thun a, a inkhawm bang kan pe ngawt maia. Chhanna pakhat mahin kan hmu lo! Tlangval pakhatin, a hnu deuhah min rimpui ta a. La a lo kai a; tichuan, tlangval, min lenpuitu chuan, la chawn 4 a la a, kan hming, a rukin a vuah theuh a, a kaih turin a hrang theuhin a dah a. A lak hmasak ber kha a ngaihzawng chu a ni ang tih a ni a. MAHSE, a rualin chawn 4 chu a la khawm a, a kai rual ta vek mai! Keimahni rual ve lek tho ni mah se a fing hle a lo ni. Dem tur reng reng kan inhre thei eih lo nia. Chung vel a tang chuan nula kan hre ta riau ni berin ka inhria.

 

Chubakah kan thian pakhat mal tei mai mai chu, zan inkhawm loa nula, kan aia u deuh pahnih leng hian an lo kai hranga, an hnute an lo dehtir chiam mai a ni awm a, a tuk tlaiah min hrilh a, a nawmzia chu a theihtawpa uarin min hrilh chiam mai a. Chuta tang chuan kan rual chuan nula/tleirawl hnute deh âtin kan â leh ta vak mai a, min duh e, duh lo e pawh kan sawi lo. Zan inkhawm bang hawng lam hi kan chance lakna chu a ni mai. Khatih lai khan Biak in a tlem em em a. Mission Veng Biak inah khian Thakthing Veng, Dam Veng, Mission Vengthlang zawng zawng kan lawi vek a, UPC tih ang reng denomination dang, Salvation Army chauh lo chu, an awm lo. Mission Veng chhung bikah phei chuan Welsh mission lo chu awm thiang lo a ni. Chu pawh in 75 bak awm phal a ni lo. Mission Veng khi Tlangnuam lal hnen atanga Rs 100/- a an lei a nia, an thu thu a ni tawp mai a ni. Zu in an hriatte pawh an hnawt chhuak lawng lawng zel a ni. Mission Veng ramri chinah chuan ramri zelah lung an phun thliah thliah zel nghe nghe a ni.

 

Thu dang alai chuan, ka hriselna a hmuih deuh roh a, KA HUANG puahchahte hi ka peih ta mang lo, Pathian zarah hei kum 90 kan hawlh ve ta der mai a. Dik tak chuan ka rualpui chanchin bu a regular taka kar tin chhuah leh WhatsApp khawih awm hi an awm awm pawh ka hre lo. A za harha harh ka nih vangin ka ti mai mai pawh a ni. Tu tu emawte hian, “Engati nge KA HUANG a chhuah loh?” an rawn ti leh thin a, ka ti hram hram mai zawk a ni. Thu ngaihnawm leh bengvarthlak pawh a ni hlei lo. Chanchinbu ka tihnawk mai mai nite pawhin ka inhria. In mi hriat thiamna ka ngen a ni ber mai. Ka hriselna pawh a hniam ta deuh em ni, ka thu rei peih lo. He KA HUANG ka type chhung pawh hian ka ning hman mai tawh nia!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?