KA NU’N SAPTAWNG A THIAM LO!

Ka nu hian pawl li zir aiin hlo thlawh a thlang zawk a niawm e. Hlo chu a thlo ta a, a taima bawk a, hawp khawp chu a thlo chhuak kum tin a ni mai. Ka pa nen an inneih hnuah Khawbung atangin Kawrtethawveng lamah pa ber pro-pastor zuiin kan pem ta a. A pro-pastor bera chuan phaiah min zir bosan leh daih roh si a. Ka nu chuan hlo thloin chhungkua min chawm ta a. La deh, puantah leh la phiar te kha a thiam hle bawk a, a inhlawh pah reng bawk a. Kawrte paho lukhum turte chu fehkawng ah a phiar zo zung zung mai. Sikul kala saptawng zir aia a thlan kha a nia, hlo thlawh leh la deh chu a hnehsawh ngang mai.

1979-ah Chanmari vengah kan pem a. Ka nu kan chhun nge ni, saptawng chu kan thiam lo unau viau mai a. Kan unau upa ber pawhin Aizawl dawr tinah cash memo lei tur a zawng ngat ngat thin kha a nia! (Pa berin cash memo rawn hawn rawh a ti miau sia!). Vai mikhual kan thlen chang a awm ve a. Ka nu chu a buaipuitu ber a ni. Saptawng thiam hauh lo khan a hrai puar ve viau zel. Tum khat chu sawhthing bawl kan hmeh a. Vaipa chuan, “What is this?” a ti a. Ka unaute an ngawi thap mai si a. Kei chuan, “Ging-gar” ka’n ti thawr mai a. Vaipa chuan, “O, zinzer (ginger)” a ti a, a ei ve ta mai bawk a! Chuti vel chu kan ni, keini chhungkaw saptawng thiam loh dan chu!

1985-ah Bangalore-ah kan pem leh thut mai a. Thlen tuk atangin nu ber, saptawng kawi khat pawh thiam lo, “OK! Ok!” tih hun pawh hre map lo chu chhungkaw ei tur lei tura a bazar a tul ta miau si a le! Engtin chuan a va ti thin ni maw, pasal fanau puarna tur khawp hi chu a rawn hawn ve zel mai a.

Tum khat chu ka nauteho hruaiin MG Road an thleng phei ve a. Zak hnuai hnawih rimtuina lei a ngai tlat. A tua mahin a hming an hre lo. Mahse ka nu chu a zam hauh lo. Dawrkai hmaah chuan zaizirin a zak a khawih a, a kut chu a hnim a, a rimchhia tih hmel deuhin a hmui a ner vel a. An lo hrethiam khawp. Zak hnuai hnawih rimtuina chu a lei ve chiang khawpmai. An rawn nui haw bawk bawk a, kan chhungkua chu kan hlim hle. Tuman kan zahpui lo a, kan nuihzat hek lo. Saptawng a thiam emaw thiam lo emaw, a fate leh chhungkaw enkawlna kawngah chuan a ‘pet goal’ ve zel a ni tawp mai!

A zak hnawih lei chanchin chuan Bangalore Mizo khawvela deng chhuak thuai a. Miin an nuihzat ang tih chu kan hlau rilru deuh a. Mahse Bangalore khawpuia Mizote chu chutiang an lo ni hauh lo. An hlimpui a, an fak a, an nuihzat lo. Saptawng thiam hauh loa chhungkaw tana a ‘pet goal’ dan kha mawi an ti em em zawk vek! Lehkhathiam rual, tuna Mizoram hmun hrang hranga officer ni ta, Sangkimi of Khatla te, Malawmi of Tlangnuam te, Maneli of Lunglei te leh mi dang tam takte khan ka nu, mi mawl, saptawng thiam lo kha a thiamna dang kha an hmuhpui thiam a, ka nu khan saptawng thiam loh kha hrehawm tih ni a nei ngai lo. Mi changkang hi chuan nuihzatawm leh awm loh an hre khawp. Thiam thil pakhat chauh hian mihring hi an lo teh ngai lo a lo ni awm e.

Tun thleng hian ka nu hian saptawng a la thiam ta lo va. A saptawng thiam leh thiam lohah hian kan la teh chhin ngai lo bawk. A fate hian kan la nuihzat ngai hek lo. A hna ber hi a tlin hian kan hre ve tlat! Mi paparuk, e, pa ber nen pasarih min enkawlna kawngah hian kan tan chuan a tha tawk ve tlat! Kan la zahin kan la hlau teh mai a nia!

Danmawia chuan sap tawng thiam mang loin India ram football team ropui ber zinga mi E. Bengal club lakah ni 20.2.2017 khan goal a thun a. Mizoram club an chak phah. Thenkhat chuan sap tawng thiam miah loin vawk an vulh a, chhungkua an chawm ve bawk. Ka nu chuan sap tawng zir aiin hlo thlawh a thlang a, a hna ber chhungkaw enkawl kawngah chuan a pet goal ve nualte hian ka hre ve thin!

Sap tawng intithiamho, a thiam lote nuihzat tawk vel khawpa ‘changkangho’ hian ram leh hnam leh chhungkaw tan ‘goal’ engzat nge kanthun ve tawh thung le?

Tawng hi thiam le lu lo mah ila, nungchang hi dik se, thawh chhuah nei ila, kan nun hi hlawk se a tawk! Mahni hna tha tak leh hlawhtlinga taka hlen chhuak apiang mai hi chawimawi mai tur an ni e. Ka nu hmingin Danmawia kha ka salute e!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?