Kalphung pangngaia lungawi lohna (Anti-establishment)

Tunlaia khawthlang ram, Europe leh America a politics vir vel hian mipui ngaihdan leh suk thlek inthlak danglam dan a lantir chiang khawp mai. Ram changkang zawkah dinhmun tha a ding, lo insawh nghet tawh sa, thuneitu langsar sa leh mi thiltithei, political party hlun leh politician lawk te duh lohna thawm a ring tial tial a. Chutianga kalphung pangngai duh lohna leh hruaitu ngai ngaih theih lohna, kalphung thar leh hruaitu thar duh zawkna chu ‘Anti-establishment movement’ an ti a ni.
Lehkhathiam, hausa, politics leh thil danga huhang nei rualho dodaltu ‘Anti-elitist group’ an tih te, America rama ‘Alt-right group’ an tih mai (ram hruainaa kalphung pangngaia kal duh lo leh hnam hmangaihna tuipui, mingo dah chungnungho) te leh ‘Far-right wing’ an tih (ram dang atang pem lut ngai thei lo, hnam hmangaihna tuipui) te pawh hi an zia leh ngaihdan hrang deuh mah se ‘Anti-establishment group’ huang chhungah khung an ni tho.
Kum 2011 chho a Tunisia atanga intan, Arab ram thenkhata sorkar dodalna nasa tak lo chhuak ‘Arab Spring’ an tih mai pawh kha a nihna takah chuan ram hruaitu nin vang leh thuneituten sorkar an kalpui dan duh loh vang a ni. Khatih lai vel bawk khan India ramah pawh Anna Hazare hmalaknain eiruk dodalna nasa tak a lo chhuak a nih kha. Kan la hre reng anga, sorkar laipui pawh a nghing lawih a, Delhi khawpui atanga intanin ram pum a nghawr a, politician-te an mualpho a, eirukna tenawm taka fihlim lo party hrang hrangte pawh an kimki viau a nih kha.
Ram hruainaa kalphung pangngai laka hel, ram hmangaihna rilru pu, hnam himna tur ngai pawimawh em em thuneitute paih thlak duh, milian ho ngai thei lo hote hi ram hmasawnnain a thlawh khum te an ni a, globalization thlipui tleh mek dodaltu an ni bawk a, sumdawnna leh hausakna fawn velin a vawrh lan thin te an ni a, kaihruaitu rintlak an hmuh chuan thuneitute hmachhawn turin an huaisen viau thin. Chutiang mite chuan politician hlunho an ngai thei lo a, party awm saah an lungawi lo a, sorkar kalphung thar an duh a, ram hruaitu mi lian leh thiltitheiho laka helpui tur an hmuh chuan an zui mai a ni. Tun hnai lawkah Europe-ah anti-establishment movement ropui tak tak kan hmu a, nikum kum tawp lamah democracy ram lian ber leh ram ropui ber U.S.A-ah pawh kan hmu a nih kha.
British mipuiin E.U. a tel zel tur leh tur loh duhthlanna (referendum) an neih tum khan mi tam takte rin loh deuhin E.U atanga chhuah duh an chak a, kha khan anti-establishment movement a chawk tho nasa hle a. Chumi hnuah U.S. president inthlan thawm na tak a awm a, chutah pawh chuan politician ni ngai reng reng lo, kalphung thar vauchhertu, hnam himna tura inhungbing duhtu Donald Trump a tling nawlh mai a. Khawvel a barakhaih a, America politics-a milianho an chiai hle a. Ram hruaitu atan mi fing leh ropui, langsar sa, mi lian leh milarho thlawp zawng hi mipui nawlpuiin an lo duh kher lo a, kalphung thar kalpui ngam tur leh hnam himna tuipuitu an lo duh zawk a, an lungawi lohna inmun nasa lutuk tawh (an aiawha huai taka) puang chhuak hmiah hmiah ngam kha an thlang tling tihna a ni.
Tunlaia Italy-a Five Star Movement hmasawn chak zia pawh hi a ngaihnawmin a hmuhnawm. Fiamthu thiam pakhat Beppe Grillo-a’n kum 2009 chho vel atang khan internet blog leh social media hmangin sorkara eirukna dodalna lam hawi a tarlan thin a. Thlawptu an pung ta zel a, a hoin Italy politics bawlhhlawh lutuk leh eirukna inphan kual nasa lutuk chu an beih ber a ni a. Chumi kal zelah chuan Five Star Movement hi a lo piang ta a ni. An parliament member-te hlawh sang lutuk an sawisel nasa a, an hlawh zaa sawmriat (80%) a tihniam turin an nawr a, sorkarin mipui hnen thleng tura sum a hman theih nan nasa takin an nawr a.
Chu beihpui (Five Star Movement, M5S an tih mai) chu a darh zau zel a. Party mi leh sa tam tak pawhin an thlawp avangin kum 2013 inthlanah khan vote hmu hnem ber dawttu party an ni hial a. Nikum kum tawp lam khan Italy mipuiten an ram danpui siamthat chungchangah vote an thlak a, a nihna takah chuan Euro (E.U pawisa) hman chungchanga vote la an ni. Mak deuhin rorel lai leh party lianho duh loh zawkah vote a tla tam zawk a. Sorkar duh dan duh lotu an tam zawk avangin prime minister Matteo Renzi  pawh a bang nghe nghe a nih kha.
Europe khawmualpuia ram hrang hrangah mimal leh political party rawn invawrh chhuak thut (upstart political parties) te thawm avang hian mi thenkhat chuan hawmualpui huap politics kalphung inthlak danglamna nasa tak a thleng chho dawnin an ring hial a ni. EU-a tel ram hrang hrangten leiba leh sum harsatna an tawh nasat avangin mipuiah lungawi lohna a nasa tial tial a. Spain-a March 2014 a din Podemos party an ramin harsatna a tawh mek (mipui dinhmun intluktlan lohna te, eizawnna hna vang leh sum harsatna) veitu te, Greece-a Syriza party te, nikum kum tawp lam inthlana Dutch party lian ber ni ta Party for Freedom (EU laka hel, ram dang mite pem luh khap duh) te, Austria-a hnam dang pem luhtur dodaltu Freedom Party of Austria (FPO) te hi Europe khawmualpuia anti-establishment tuipui political party an ni a. Brexit hnu a U.S president atana Donald Trump thlan tlin a nih leh zel atang khan anti-establishment thlipui a inmun nasa zual a, heng party hrang hrangte huhang pawh hi a na tial tial nghe nghe a ni.
India ramah pawh eiruk dodal nasa em emtu, huai taka political party lian ho  leh politician lawk ho sawisel hmiah hmiah thin Arvind Kejriwal leh a party thar AAP an rawn dawk chhuak nawlh a. Kum 2014 general election a ram pum huapa hnehna chang BJP vung vanglaiin AAP in a kum leh 2015 ah Delhi khawpuiah chiang takin  hnehna an chang thung a, MLA 67 an tlin laiin BJP MLA 3 chauh an tling a, congress party phei chu an arte lu kawn nih kha. India khawpui bera national party lian pahnih tukdawltu Kejriwal hi India rama anti-establishment symbol a ni a, kalphung pangngaia lungawi lo mipui rilru a chawk tho a, mipui nawlpui leh mi satliahte hmangin hnehna mak tak a chang thei a, India ram politics-a phek thar a keutu a ni.
Mizoramah pawh hian tunhma atangin political party awm sa ninna leh kalphung thar duhna boruak a awm tawh thin a. Party lian awm sa Mizo Union leh congress party inchhun fin hnu lawk a party thar ding Mizoram People’s Conference pawh kha politics a kalphung thar duh mipuiin an bawh hle a nih kha, a hnu lawk 1978-ah politician ni lo Brig Thenphunga Sailo hoin an sorkar ta hial a nih kha. State kan nih hnuah party lian pahnih MNF leh congress party-te an insorkar chhawk zui ta char char a. Mipui lungawi lo thawm leh party ding sa ngaih theih lohna thawm hriat tur erawh a awm reng a, a khat tawkin politician lawkte leh party hlunte hian rumthaihtu an tawng fo bawk. A bikin inthlan dawn hnaihah phei chuan kalphung thar duha intelkhawm tawk an awm ziah. Kum 1998 general election-a party lian candidate-te hnawla mipuiin Mizoram MP (LS) atana Citizens Common Front (CCF) thlawp independent candidate Dr. H. Lallungmuana an thlan tlin kha tun hnaia Mizorama anti-establishment thawm lian ber a ni hial awm e.
Kan rama MLA inthlanah hian party mi leh sate vote chauh hmanga sorkarna siam an awm ngai lo a, party mi ni lo ‘neutral voter’ kan tih mai te bawh lam apiang an chak thin. Nakum MLA inthlanah pawh hian thil inthlak danglam a awm a nih loh chuan heng mite vote hui tam apiang an chak leh mai dawn a ni. UT chu sawi loh, state kan nih hnuah ngawt pawh hian politician hlun leh party lian awm sate hi mipuiin ngaih thei loh zual chang an nei ta fo mai a, mahse, hne viau thin mahse ‘Cheng 2 note zawr chhe tak pawh hi hman tur dang a awm loh chuan kan hmang leh nge nge thin’ ang deuh hi a nihna lai a awm.
Tuna kan politics kalphungah hi chuan mipuiin duh zawk thlan tur party lian pahnih chiah an nei a, anni pahnih hi an insorkar chhawk chhen lo thei lo a ni. Mi ram angin tihdan hlui tha lo dodal a, kalphung thar tlangaupui a, ram leh hnam hmangaihna rilru chawktho thei ram hruai tlak intelkhawm awm ta se kumtharah hian Mizoram politics bung thar kan kai mai ang em? Party ngai, hruaitu ngai, kalphung ngai, inchirhtheh dan ngai…a ngai leh ngai ringawt a kal reng tur hi kan ni em, tih pawh hi ngaihtuah a ngai. Chutihlaiin, party awm sa te leh politician-te pawh hian mipui sukthlek an zir chian a, kalphung thar an hlui thei a nih chuan thuneihna an chang leh thinin a rinawm tho bawk.
Hmun hrang hranga an harsatna tawhte – eizawnna hna vang te, eirukna/hlemhletna te, sorkar inrelbawlna tha lo te, rethei leh hausa kar zau lutuk te, thuneihna hman dik loh te, party mi leh laina induhsakna hleihluak te, hmasawnna kal hleithei lo te, mipui nun him lo te, hruaitu chapo leh inlek lutuk te, etc – hengte hi kan ramah pawh kan tawng ve vek tho mai. Kalphung thar duh mipuite hian kalphung thar an au chhuak dawn nge, kalphung thar beisei loin a ngaiah kan su zui zel dawn le?

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?