Kan hnam himna Kulh ILP

British sorkarin Assam a awp hnu pawh khan Mizoram rawn awp ve tumna an nei lem lo a. Mahse, Cachar hi Mizo lalten an ramah an ngai a, chuvang chuan 1850 chho vel atangin British nena buaina a thleng zauh zauh a. 1855 vel atanga Cachar-a thingpui huan an siam hnu phei chuan buaina a chhuak ta fo a. Mizo lalte ram chhung thleng Sapho rawn invalh lut kha pasalthaten an ngai thei lo hle a, an sai ram chhuahna an rawn daidar nasa ta mai kha en liam har an ti a. An thinin a tuar ta lo a, kan ram chhunga hnam dang lo lutte chu um chhuah tumin an bei ta fo a. Chutiang karah chuan Sapho khan Mizote rilru put hmang an hria a, lalte leh pasalthaten mahni ram chin an hauh natzia an hriat chian tak hnu chuan inremna kawng an dap ta a. Tichuan dan pawimawh zet Bengal Eastern Frontier Regulations, 1873 an siam ta a ni.

He Dan hi an siam chhan ber chu British sorkarin an ram chin piah lama an ram awpa mite (Mizo lalte ram chhung) a an kal lohna tur a ni. An awp ram chin thliar felna a ni a. Mizoten an hauh chin hre chunga ramri hi siam a ni a, kan pi leh pute pawhin an pawmpui avangin hmar lama kan ram chin chu hei hi a ni reng a ni. Kan hriat lar em em Inner Line Regulation/Permit (ILR/ILP) kan tih fo pawh hi chu Dan chhunga mi chu a ni a. Sapho khan he Danin a huam chin piah lama kalte chu phalna (Inner Line Permit) neih ngei tur an ti a, chutiang bawkin Mizote pawh he ramri pel a kalte chu phalna an neih a ngai bawk.
Saphoin Mizote min awp hnu pawh khan Bengal Frontier Provision Act,1873 hi khawng takin an lekkawh zui a. Phai vaihoin tlang mite sumdawnna lama min chim buai kha an hlau hle a, an lo pem luh a min chim ral mai an hlau bawk a. ‘History of Inner Line Permit System’ tih ziaktu Lt. Col M Ranjit Singh (Retd) chuan, “British sorkar khan Lushai Hills a Bengali sumdawngte khuahkhirhna awm lo a an luh chiam kha an hlau a, phal loh thil silai leh silaimu (Mizoten an lawm em em) te an zawrh mai an hlau a, ruihhlo tawlh leh hmeichhiaa sumdawnna te thlengin an tih duh an hlau,” tiin a ziak. Kumpinu an haw a, kan chheh vela hnam dang sumdawngte zingah hnawk ti tam viau mahse India hnuaia kan awm hnuah pawh he dan hi la hman zui zel a ni a. MNF leh India sorkar inremnaah pawh he Dan hi hman zui zel tura ziah a a ni bawk.

Tunhma atangin vai sumdawng thenkhat Mizoram a rawn invalh luh chak an awm thin a, ILP hi hnawk an ti hle a, Court-ah hial an lo khing tawh a ni. Politician zingah pawh sorkar pakhat awp chhunga phalna nei chauh tana tlawh theih kan ni bik hi ngaithei lo an tam viau bawk. Vaiho zingah hrethiam lo an tam hle. Mizo zingah pawh hnam himna vei lem lo, sumdawnna leh hmasawnna tuipuitute zingah ILP hnawk ti an awm ve tan mek a. Mahse, kan awmna India vaiho tam zia te, kan chheh vela tlangmi dangte an chimral tawh dan te, mahni ramah mikhual chan an chan tawh zia te hi ngaihtuah ila, engtiklai pawhin kan kiang lawka cheng Bengali hote chim ral tham lek kan nih avangin ILP baka inhumhimna kulhpui tha kan nei reng reng lo.

India hmarchhaka state pathum Mizoram, Arunachal Pradesh leh Nagaland-ah te hian tlangmite humhimna dan Bengal Frontier Provision Act,1873 hi hman a la ni a, heng state pathum tlawh tur tlang mi ni lote chuan ILP an neih a la ngai a ni. Kum 2015 chhoah khan Manipur mipuiten an state chhunga ILP hman ve ngiatin nasa takin an bei a nih kha, mahse tun thlengin an la hlawhtling ta chuang lo. Chutih a hnekin state pathuma ILP hman mek pawh hi hnawk ti an awm reng a, ram hruaitu zingah tihtawp duh pawh an awm thin. Chutiang karah chuan tun dinhmunah hian ILP a nghing ta a, sumdawnnaah Mizote min chimralna kawng a inhawng zau ta. Kan tlai hma hian hmalak a hun khawp mai.

July 1,2017 atang khan India ram pumpuiah (J&K tel loin) chhiahlak dan thar ‘Goods & Services Tax’ (GST) hman tan a ni a. He dan hman a nih chiah hian thil inthlak danglam a awm nual a. India independent hnua chhiah kalphung thlak danglam nasat ber ni hiala sawi a ni a, a tum ber pakhat chu India ram pum hi market pakhat a siam a ni. Hmun tinah thil man inang tlanga zawrh te, chhiah pawh state tinah inang vek a lak te hi GST ken tel pawimawh ber ber a ni. Chumi awmzia chu khawi hmunah mah MRP aia sanga zawrh phal a ni tawh lo a, state sorkarin an ramri a bungraw lo lut an endikna ‘Check gate’ pawh tihtawp vek a ni a, zalen takin state hrang hrangah sumdawngten bungrua an hralh thei ta a ni.

Mizoram tana GST a him lohna lo lang ta pakhat chu Check Gate awm ta lo hi a ni. State pawn atangin vai sumdawngten an check gate paltlang tur awm tawh loin an bungrua an rawn phur lut thei ta a ni. Mizoram hi chu thilsiam chhuaktu state kan ni lo a, hmun danga an siam chhuah sa lo leitu zawk kan ni a. Chuvangin, hnam dang sumdawngte kaltlang vekin bungrua kan la lut a, anni lam an duh duha an lo luh theih loh avangin kan tualchhung sumdawngte an hlawk ve a, state sum hnar pawimawh tak pawh a ni. Mahse, tunah chuan phalna tel loin vaiho an lo lut thei ta. September 5, 2017-a Aizawl Post-in a ziah hi tarlang ila, a fiah zawk awm e.

“GST hian Mizoramah ILP a sawi nghing a, Mizoram Goods and Services Tax Act hmanga enkawl hnam dang sumdawngte tan ILP neih a la ngaih dawn laiin Central Goods and Services Tax Act hmanga enkawl hnam dang sumdawngte tan erawh ILP a ngai tawh lo. ILP tel lovin Bazar India chu Mizoramah a inbun tawh nghe nghe. Thil dangah pawh GST hian nghawng a nei zel dawn tih a chiang a, GST vanga check-gate khar a ni ta pawh hi Mizo sumdawngte tan a pawi theiah ngaih a ni.

“GST hi thil thar a ni a. A thawkate bakah sumdawng te, tlawmngai pawl te, mipuite hian kan hriat chian a ngai khawp mai. Kan economy a that phah nge a chhiat phah tih kan hriat a ngai a, hnam dang lakah kan him phah nge kan him loh phah tih pawh hriat a ngai. Chu chu kan zavaia mawh a ni,” tiin official pakhat chuan The Aizawl Post a hrilh.

Engtia hmalak tur nge, tih hi a pawimawh ta. Kan hnam himna hi thupui bera neih a hun tawh zia hi kan lo sawi fo thin a, a bikin kan sorkar leh political party te an harh chhuah a ngai. An party aiin Mizo hnam hi dah pawimawh zawk se Mizo mipui hian kan zui anga, kan thlang zawk awm si a. Chutiang bawkin tlawmngai pawlte leh zirlai pawlte hian he hnam tana ke pen an inhuam em em lai hian an che chhuak tlai leh mai ang tih a hlauhawm. Dik tak chuan sorkar apiang hian ILP te hi an ngaihthah ziah, Bairabi Rel station-a ILP check mumal loh a nih dan te, Aizawl a ILP nei lo vai an tam zia te hi YMA leh zirlai pawlte bak hian an vei tak tak lo. Kan hnam himna hi kan kutah thui tak a awm tih hi hre thar ila a tha khawp ang.

ILP hi an titawp kher lo a ni thei; mahse, ILP hi hman theih loh leh, awmze nei loa an siam chuan tihtawp nen a danglam lo. Chu chu kuangkuahin kan thlir liam mai dawn em ni? Remna thuthlungah ziah a ni a, Danpuiah khung luh a ni a. Chuvangin, ILP hman theih loha a awm ngawt tur hi dan kalh (unconstitutional) a ni zawk lo maw? GST tih te hi kan hnam himna ngai pawimawh miah lo a an siam a ni a, chumi avanga inhumhimna dan a derthawn chu kan phal bik tur a ni lo ang. Dan hi tihdanglam theih leh siamrem theih a ni a, chumi piah lamah mipui tangrualin an bawhchhe fo a, an her danglamtir thei bawk. Mipui siam sorkarna ramah chuan mipui an lal ber a, dan zam sa aiin mipui duh dan a chungnung zawk. Chuvangin, kan hnam himna kulhpui ILP hi a hman theih dawn loh chuan Mizo mipui tangrualin kan hnam himna tur kan buaipui ve mai dawn lom ni? Hmahruaitu tur an awm chuan hnam tan kan pen ngam em em ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?