Kan sakhua leh kan hnam himna hi

Hmun hrang hrangah hnam dang ngaihtheih lohna (racism) thawm a lian tial tial a. Tunlaia European-ho buaina pakhat chu refugee chungchang hi a ni a. Middle East leh North Africa atangin indona leh tualchhung buaina tlan sana Europe-a pem lut leh pem tum an tam hle a, refugee an tam tial tial avangin sorkar thenkhat chuan an lo dawngsawng tha duh tawhlo hial. Khawthlang ramahte hian nau piang an tlem tial tial a, an inthlah pun chak loh avangin ram dang miten an chim nasat lutuk an duh lo a. Refugee tam zel hian an economy leh an nunphung a nghawng nasa a, pem lut tam ber hi Muslim sakhaw zuitute an nih hlawm bawk avangin Europe khawmualpui hi tun kum zabi a liam hunah chuan Mosolman-ho ram a ni thei hial dawnin an sawi.
Princeton University professor Bernard Lewis chuan Europe a nau piang zat leh mihring pun dan te, pem lut leh pem chhuak dinhmun te a zir chiang a, kum 2004 daih tawh khan kum zabi tawp lamah chuan Europe-ah Islam an tam ber tawh tur thu a lo sawi a, “Europe hi Arab khawthlang ram bial a la ni dawn,” a ti. Chutiang bawkin U.S.A pawh an buaina chu pem lut tam lutuk leh Muslim-ten an chim nasa lutuk hi a ni. President Donald Trump-a’n huai takin hma a la chho a, dodal leh sawisel tawk nasa viau mahse an ram mipui zingah thlawptu a ngah hle a ni.

Chutihlaiin, India ramah Kristian sakhua beihna a thleng ve mek thung. Hindu firfiak thenkhat hian Kristian sakhua hi European-ho sakhua angin an sawi fo a, an hre sual thin. Sakhaw lian dang ang bawkin Kristian sakhua hi Asia khawmualpui (Middle East – Palestina) atangin a intan a, a darh zau zel a. Mizoten kan pipu sakhaw biak kan bansan a Kristiana kan inlet vek ang khan kum zabi 5-naah khan Europe khawmualpui chu Kristian ram a lo ni a, kohhran hmunpui a lo ni zui ta a. He khawmualpui atang hian khawvel hmun hrang hrangah Chanchin Tha a lo darh zau ta a. Kumpinu ram awp British India leh British Burma inkara cheng Mizote pawhin Chanchin Tha chu kan lo dawng ve hlauh a, kum rei lo te chhungin kan hnam sakhua atan Kristian sakhua chu kan pawm ta a ni.

Kan sakhua avang hian Pathian malsawmna chhiar sen loh kan dawng a, kohhran nghet tak a lo ding a, kawng hrang hrangin hma kan sawn phah hle a ni. Kan rama thil tha kan hmuh tin reng hi Chanchin Tha zar kan zona a ni hlawm a, ngun taka han chhut vang vang hi chuan Kohhran te hi sawichhia a, deusawh chiam tur hi kan ni lo. Engpawhnise, kan hnam leh kan sakhua hi a inkawp tlat tawh a, kan sakhua a him loh chuan kan hnam pawh a him bik lo tihna a ni. Tunlaiin kan awmna India ramah Kristiante chunga hleilenna leh ringtute tawrhna a thleng nasa malh malh hle mai a. India ram atanga kan sakhua hi nuai bo tum pawl an pawng tial tial a, hindu sakhua la firfiak pawlten thuneihna an chan hnu phei hi chuan kan dinhmun leh kan hmabak tur hi ngun taka ngaihtuah a ngai tak zet a ni.

Hindu sakhua la firfiak pawl pakhat, sakhaw dang betute hindu a hruai kir leh tuma beitu Dharm Jagran Manch hruaitu Rajeshwar Singh chuan kum 2014 december thla khan, “Lo nghak ula, lo thlir rawh u. December 31,2021 hi India rama Kristian leh Islam sakhua awm tawp ni tur a ni dawn. December 31,2021 hian he ram atang hian Kristian sakhua leh Islam sakhua hi kan nuai bo dawn. Chu chu kan thil tum a ni,” tiin a lo sawi tawh a. Chumi awmzia chu India ram hi hindu ram, sakhaw dang betute awm ve theih lohna rama siam an tum a, kum 2021 hmain sakhaw dang betute ram pawna hnawh chhuah emaw hindu-a inlehtir vek emaw an tum tihna a ni a. He thusawi avang leh muslim-ho hindu-a a ruala an inlehtir avangin sawiselna nasa tak a lo chhuak a. Ram hmasawnna tur atana sorkar hmalakna a thuanawp phah thei dawn hiala a lan avangin Pu Modi-a a lungawi lo a, a sawitu pa Rajeshwar Singh pawh hi an chawlhtir niin an sawi a. Mahse, rei lo teah RSS hnuaiah mawhphurhna sang zawk pek a ni leh tho.

Kan hriat angin sorkar laipuiah hindu sakhaw behchhan party kaihhruai sorkar nghet tak a ding a. Zirna kaihhnawih thilah an sakhua chawisanna leh Hindutva thupui vawrhlar an tum zia hmuh theih a ni. Fing taka sorkar hmalakna hmanga hindu sakhua chawisan tumna te, sakhaw dang, a bikin Kristiante ngaih theih lohna langsar tak takte kan hmu ta fo mai a. Tun ang zela thil a kal chho a nih chuan India ramah hian Kristiante kan chep tawlh tawlh anga, kan tan hmun a awm lo mai ang tih pawh a hlauhawm ta. Sorkar laipuia officer lian tak pakhat chuan Modi-a prime minister hnu hian Pathianni a official thil pawimawh leh meeting pawimawh koh an chin tak viau thu a sawi a. Mipui nawlpuiin kan hriat phak lohah hian Kristian officer-te chu an lo nekchep viau a nih hmel.

Hindu-te chauh chenna ram (Hindu Rastra) din tumtute hi an fing khawp mai, a pawnga puiin an che bawrh bawrh lo a, thuneihna hmangin fing takin hma an la mek. An hmalakna hian min bum fo reng a, Kristiante zingah ngei pawh ‘A pawi lo’ tih ngaihdan nei an tam hle a. Mahse, a pawi lo kan tih zel hian a lo pawi hman viau dawn a lo ni. An sakhua nena inkungkaih tlat Yoga an chawilar dan te hi an fing khawp mai. A pawi lo titu tam tak hian sakhuannaah a pawi lo chin an thliar thiam lo maithei. Krismas ni taka Good Governance Day an puang tlat mai te hi Kristiante tan chuan pawm dam a har tak zet. Chutiang zelin bawng sa ei, talh tura zawrh khap chungchang te hi sakhaw tihbik neite hmalakna liau liau a ni a, hindu sakhua chauh chawisan tumna a ni tih hai rual a ni lo.

Tun hnaiah financial year thlak tumna a awm leh ta. An tum ang hian Financial Year hi January atanga December hi ni ta tak tak se Mizo Kristiante tluka buai tur an awm lo ang. Financial year tawp dawnah office an buai ziah a, zalen taka Krismas hman a har viau anga, hmun danga Krismas leh Kumthar hmanga zin chhuah a harsa anga. Krismas vuakvetah pisa chawlh a har anga, hun thawl taka Mas bazar a theih tawh lo ang. Kohhranin Krismas leh Kumthar lawmna programme a siam thin tam tak hi a rem tawh lo anga, sorkar hnathawkte zingah inkhawm leh ruaitheh hman lo an awm nawk dawn a ni. Chumi hre renga hmalakna chu a nih hmel a. Krismas boruak zalen taka hman theih loh hnuah chuan he ramah hian kan him zui zel ang em? Tunah hian he hmalakna kal mek ni a sawi hi sorkar, political party leh pawl hminga dodal a hun viau a ni.

He India ramah hian Mizo Kristiante hi zalen taka awm zel kan duh a nih chuan ngawi renga kan sakhua nek zawnga hmalakna hrang hrangte hi thlir liam mai mai chi a ni lo ang. Kan hnam hi kan sakhua nen a inzawm tlat a, a hmalama kan sawi tawh angin, kan sakhua a him loh chuan kan hnam pawh a him rei bik lo ang. Sakhuana hmanga fing taka beihna kan tawh mek lai hian kan hnam hmabak hi kan ngaihtuah a ngai khawp mai.

Chutihlaiin, tuna kan dinhmunah hi chuan a beidawnthlak lek lek. Political party zingah kan sakhua leh kan hnam himna tura pen ngam tak tak an vang. Kan thenawm Meghalaya-ah chuan bawng hralh/talh phal loh chungchangah BJP leh party dang hruaitute huai takin an che a nih kha. Kan MP te pawh hian Kristiante nekchepna leh ringtute beihna thawm a awm changin parliament-a thawm an neih kan hre ngai lo a, kan political party neih ve – MNF, Congress leh ZNP te hian huai taka thawm an neih kan la hre lo bawk hek lo. Nakum inthlan thlira politics rawng kai pawl hrang hrang lo ding chhuak tharte zingah lah hian kan sakhua leh kan hnam himna tura huai taka thawm nei an la awm bawk si lo. Kan hnam hian vengtu a mamawh lai tak a ni a, political party-te leh politician-te zingah chutiang mi chu an awm lo a, kohhran leh tlawmngai pawlte zingah an awm lo a nih chuan kan hmabak a ropui vak lo ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?