Kan tan pekin a awmKan tan pekin a awm-

  • Lalchhandama Colney

    Krismas hun hlimawm leh nuam ber chu kan lo thleng leh dawn ta, kohhrante leh khawtlang lam inbuatsaihna pawh ding takin a kal mup mup mai. Keini ang bawkin khawvel hmun hrang hrang a Kristianpuite pawh an inbuatsaih ve ngei ang le! Mizoramah chuan fur tuite a lo hul a, han hawi reng rengin hmuh theih chin chu a hring dup mai a ni. Krismas a hnai ta ngei tih hriattir nan, Japanhlo, etc. ten hmun tin maiah par an chhuang chuk mai a. Nungcha chi tinrengte pawn an awrawl chhuahin dai leh ramah te chuan an ri chiah chiah mai bawk a. Eng pawh ni se, mi tha tak tak, fel tak tak, he hun thleng ve zo lo tam tak an awm laia, keini, mi tha mang lo, fel mang lo te, a khawngaihna leh zahngaihna avanga kan han thleng thei mai tur hi a ropuiin a lawmawm hle mai.

    Krismas chu Isua pian ni champha a ni a, a nuin a pai dawn hian vantirhkohin a bia a, Thlarau Thianghlim fa a nih tur thu te, a pai chhung zawnga a pasal Josefa nena inkawm lo tura tih an nih thu te kan hmu. A awmzia chu virgin chungin nau a pai ta a nih chu, a mak ang reng hle mai. Tin, he nausen lo pian tur thu hi kum tam tak hma lamah lo sawi lawk vek tawh a ni. Nausen dang ang lo takin ran inah a piang a, ran chaw an pekna thin thlengah an muttir a ni. Nau piang lawmtute hi a pakhat zawk chu, berampute an ni a, khatih laia mi hnuaihnung ber, a pakhat leh zawk chu khawchhak mi fingte an ni leh lawi si. Mak leh ang reng deuh pakhat chu van zaipawlten he nausen piang lawm nan hian hla ropui takin an rawn rem a ni, van zaipawlte hi engtikah mah he leiah hi chuan kan hmuh tawh loh hmel a ni. Mak leh deuh pakhat chu arsi lian em em mai hian khawchhak mi fingte kha nausen awmna hmun thlengin a rawn hruai a ni; tichuan, nausen dang lam tak a ni tih kan hre thei ang.

    Pathianin khawvel a hmangaih em em a chuti chuan a fapa mal neih chhun a pe a, tih ang khan, Isua lo pian hi mi zawng zawng tan a ni. Punjabi-pa tan a ni a, Bengali, Assamese-pa tan pawh a ni, mi hausa ber leh rethei ber tan pawh a ni. Mi fing ber leh mawl ber tan pawh a ni a, mi lian leh te ber tan pawh a ni. Khawvela kan chenpui nungcha, ramsa zawng zawngte tan pawh a ni. Khawhar tak leh lungngai taka awm mekte tan a ni a, hlim tak leh lawm taka awm mekte tan pawh a ni. Mi hrisel ber leh bawrhsawm ber tan a ni a, changkang ber leh hnufual ber tan pawh a ni. Rilrua rethei leh inngaihtlawmte tan a ni a, fahrah, rethei leh chhumchhiate pawh a ni. Pastor tan a ni a, rawngbawltu ni lo mi mai mai tan pawh a ni. Drug eddict tan pawh a ni a, zu in mi tan pawh a ni. Jail tang zawng zawngte tan te, K.S. ho zawng zawng tan te pawh a ni. Isua lo pian chhan hian mi zawng zawng a huap vek a ni.

    Mi tinte kan hman dan a inang lo thei hle ang, thenkhat chuan party-te kan throw a, zu, nula, nen tha lo takin kan hmang thin. Nula, tlangval then khat te pawn interek kual nan, mipat hmeichhiat hman khawloh nan te kan hmang thin bawk. Thenkhat leh chuan tei rawlai mai mai nan te, a awmzia pawh ngaihtuah chiang lem lovin holam takin kan hmang thin. Chin tha lo tak chin tan nan te, suahsual bawl nan te kan hmang bawk. Kohhran lamah han let ta ila, biak inah te nalh takin a inkhawm a; mahse, a rilru erawh a smart lo hle. Zu leh ruihtheih thil te ti chungin ruaitheh fatunaah a phur phurah atanga, miten lo hre lo pawh nise chung lam chuan a hre ngei awm si a. Krismas present atan a sum leh eng eng emaw te chu a theh chhuak hnem hle mai; mahse, a thinlung lam Chung lam lawm zawng a ni a ngem aw? Kan han sawi tak te krismas hmangtute zinga khawvel mite hman dan then khat te a ni.

    Han inbih chiang ta ila Krismas hi thinlung leh tihtakzet in kan hmang thin tawh em aw, hriat a harsa, a huau huauna lam hian mi a chim hneh thin khawp a,kan la hmang mang lo mai thei bawk. Chuti a nih chuan  khawchhak mi fingte leh berampute chu an awhawm hle dawn a ni, engtin nge an ni ang hian kan hman ve theih ang le.Krismas a lo thleng hnai dawn tih hi chu hai rual a ni ngai lo va; tichuan, hetiang hian tih han tum chhin dawn ta ila. A dawn hnaih ah chuan vawinga vel tal fianrial tawngtaina neih tum ta ila, tah chuan kan hman duh dan chu thlen ta ila, a nih loh pawn kan ni tin hnate tlem tlemin ngaihtuah tlem hret hret ila; tichuan, kan suangtuahnate chu a lamah kaltir tum ta ila, a ngai ngaia hman ve tawp ai chuan a ziaawm deuh mai thei asin. Awle, kan duhnaah chuan thil hi chu kan ti thei viau zel chuvang chuan keini pawn kan duh phawt chuan khawchhak mifingte leh berampute ang hian rilru leh tihtakzetin naupiang hi chibai kan buk ve thei a ni.
    Hmm,, dam chuan kan thleng anga kan hmang liam leh puat mai dawn, a ni tak phei hi chu thlasik ni tawi lai lo ni nen, rin aiin a rei lo duh khawp mai.Chuvang chuan i duh dan zanin hman han tum teh le, nakin pawha i lungngawina zan turin. Duhthlan tur i nei a, biak in lamah nge, intawllenna lamah? “Kan tan naupang a lo piang a, fapa pekin kan awm ta,” ti ve thei ngei turin duhsakna ka hlan a che.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?