Kaphleia

November 13 kha essay ropui ber pawl ‘Thlirtu’ tih ziaktu Kaphleia thih champha kum 40-na a ni a. Chumi ni denchhena thuziak ka tum laiin India ram pum buaina thlentu thil lian tham a awm a, chu chu ziah a tul ta zawk a. A hun pel deuh tawh mah se ziah loh tawp a uiawm si a. Chutih lai mek chuan TB natna veia a lo haw Sairang atanga amah zawntute zinga mi, Mizo pa ropui Pu C.Rokhuma a lo boral ve leh zel a. Kum 2010 November 13 khan Kaphleia Memorial Committee (Kaphleia Memorial Trust ni ta) leh Tachhip Branch YMA tangkawpin Tachhip khuaah Kaphleia Ni kan hmang a. Chumi tum chuan Kaphleia puala lehkhabu buatsaih ‘Inte Thawveng’ tih tlangzarh a ni a. Chu lehkhabuah chuan Pu C.Rokhuma’n Sairang atanga Durtlang thlenga an zawn chungchang a ziak nghe nghe.

Khatih hun lai, 1930 chhoah khan Mizo zingah lehkha zir sang an la tam lo hle a, phai lama zir phei chu tlem te an ni a. Kaphleia hi kum 1910-ah a piang a, Sialsukah pawl thum thleng a zir a. Aizawlah Middle School a zir zawhah Shillong-ah High School a zir a. Matric a pass hnuah Scottish Church College, Kolkata-ah a zir zawm leh a. Khang hun lai kha chuan pawl thum pass chin pawh kha khaw khat pa rawn an ni a, matric pass phei chu lehkhathiam taka ngaih an ni a. Engkim hriaah an ngai thin.

Rambuai lai vel thleng pawh khan mi tumruh fal leh lehkhathiam thei zual tak tak tan lo chuan phaia college kal a har hle a. Kum 1935 khan Kaphleia hian Kolkata khawpuiah college-a kal tan a, I.A (tunlaia pawl 12) a zir zo hram a, natna rapthlak ber mai, chung hun laia tihdam theih loh TB natna a vei ta hlauh mai a. Ama tawngkam takin, kum 1937 khan thi turin Zoramah a lo haw a, a natna runthlak avang chuan November 13, 1940 khan a chatuan ram a pan ta a ni.

Pu B.Lalthangliana taimak vang liau liauin Kaphleia chungchang leh a chanchin ropui tak takte hi a riral lo a, kan lo chhiar thei a ni, tih hi tarlang hram ila a tha awm e. A thuziak leh a diary atangin Kaphleia chanchin hi phek tam tak daih ziah tur a awm a; mahse, thil pahnih khat lek tarlang ila.

Pakhatnaah chuan a rilru put hmang ropuizia leh huaisenzia hi thangtharte tan entawntlak a tling. Dinhmun tha lo takin a lo haw a, TB hrik chuan a taksa a ei chhe zel a. Mi dangin an kaichhawn ve lohna turin in an saksak a, ‘Inte Thawveng’ an vuah a, a natna ang vei ve tho Biakliana nen an awm dun phawt a. Chumi hnuah an khua Tachhipah a haw a, chutah pawh chuan inte thawveng an saksak leh a. Chutia mahni chauha khawhar taka natna hrehawm tuara, thih mai hmabaka a awm lai chuan indawm kun reng duh loin rilru fim tak a pu thei a, thu tha tak tak a ziak thei a, beisei bo taka a awm laia beidawnna a hneh thei kha a ropui tak zet a ni.

Tunlai mi tam tak hi a dinhmunah khan ding ta ila kan beidawng hian rilru fim kan pu lo thuai mai awm asin. Ani kha chuan a chhe zawnga inngaihtuah a, mahni nunna lak mai a tum lo a, taksa chak lo tak chungin lehkhabu tam tak a chhiar a, sap tawng thuziak leh lehkhabu a letling a, hla a phuah a, a letling a, thawnthu leh essay a ziak a, a diary tha takin a ziak a. Sik leh sa inthlak leh nungcha chungchangte a chhinchhiah thlap thlap zel a. Heng zawng zawng hi mi dawihzep leh nun beidawng tan tih rual a ni lo. Thluak fim hman ngai a nih avangin dam tha tan pawh thil har tak a ni hlawm. Kaphleia hi pa namai lo tak, thihna hlimkawr ruam zawh mek lai pawha beidawnga chau mai mai lo chi a ni.

An hun laia Mizote dinhmun hniamzia a hre chiang a, India ram khawpui lian bera college kal ni mah se a hnampui Mizote hmasawnna tur vei tak tein a vei a. Thingtlang kuthnathawktute tan ei zawnna tha zawk a ngaihtuahpui a, mipui hmasawnna tur a duang a, chungte chu dam thata ram pum fang chhuaka mite zirtir a chak zek zek a ni. A thiamna a chapopui lo a, a inngaitlawm em em zawkte kha a ropuina a ni. November 2010-a Kaphleia Ni kan hman tum hian a dam lai hre pha, Tachhip khaw pa thenkhatte sawi dan chuan inte thawvenga a awm kha a natna avangin tlawhpawh phal ni lo mah se a rukin naupanghoten an tlawh thin a, thawnthute a lo hrilh a, pawnto hlate a lo zirtir thin a, a felzia leh an ngainat thu an sawi hlawm. A thuziak leh a hla phuah atangte hian ani pawhin hnam a hmangaihzia leh mipui dinhmun chawikan a veizia a hriat theih a. Lehkha kha han zir zo ta se, dam tha vervawr bawk se, Mizo history hi danglama mual mual a awm ngeiin a rinawm.

A chanchin han chhiar hian Kristian tha tak, Pathian tih mi, mi dangte tanpui peih tak, inngaitlawm tak a ni tih a chiang a. A thuziak leh a hla phuah atangte hian ram leh hnam hmangaihna thinlung a put nasatzia hi hmuh hmaih chi a ni lo. Kum 1939 daih tawh khan, ‘Zoram, ka ram’ tih hla a phuah a. A chanchin ziaktu B.Lalthangliana chuan ti hian a ziak a, “Nationalism chungchang Kaphleia hian a chai hma hle a, Mizo politician-ten independence an sawi rik viai viai hma kum riatah leh, tharum thawh meuha thenkhatin an nawr hma kum sawmhnih pariat laiah khan a lo mangphan tawh a. ‘Mi hnuaia kun’ phal loin ‘Mahnia din’ Pathian hnenah a dil tawh bawk. ‘Kan tih, kan sawi, kan rilru leh chakna te Pathian leh kan ram tan’ tiin a auchhuak a. ‘Nationalist’ dik tak leh hmasa ber pawl a ni ngei mai.”

Khawpui ropui takah lehkha zirin awm mah se a thiamna Zoram tana hman a châk ber reng a, Mizo nun a ngaisang reng a, a lunglenna ber pawh Zoram a ni. ‘Zoram Nuam’ tih hla chang tawp ber hi ram leh hnam hmangaihna puan chhuahna ropui chungchuang a ni. “Aw Zoram ka thinlungin ka hmangaih che, Ka theihna leh finna i tan ka pe; I retheih, chhuk chho har miten sel mah se; Kei ka chan Zoram ka ngai bang lo che.” Khang hun lai a kan ram dinhmun ngaihtuah kha chuan zalenna beisei a har viauin a rinawm a, mahse, sorkar ropui ber Kumpinu awpna hnuaia kun mek Zoram tan mahni kea din kha Kaphleian a beisei tlat thung, a mak khawp zawk. Pathian hnena a dil thin pawh a ni tih a hla atangin a hriat. Mizo zinga ‘Pathian leh kan ram tan’ tih tawngkam hmang hmasa ber pawh a niin a rinawm. “Zoram! Ka Ram!” tih hla chang tinah hian zalenna (independence) a beiseizia leh a duhzia kan hmu a. “Aw, chung Pathian, Hnam tin khawngaih thintu… Mi hnuaia kan kun bik phal suh la, Hnehchhiah leh bumna min do pui la, Kan innghahna thutak ni se, Kan tih leh kan sawi apiang te, Pathian leh kan ram tan ni se,” a lo tihte hi tunlai mite rilru put hmang hi a ni ve em le?

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?