Karin ve phawt chuanKarin ve phawt chuan – Vanhmingliana (Taua), Dawrpui

He thupui hi Kristiante zingah chuan mi tam ber tawngkam chhuak a ni hial awm e. A dik khawp mai ‘rin’ hi a lo pawimawh em a tin a ni. Nimahsela, kan kamchhe tleuhna maia kan sawi anih erawh chuan ram ropui tak min thlen hauh lo vang. Tu nge ka rin? Engnge ka rin a chu? tih hi chiang taka hriat leh nuna kalpui chi ngei pawh a ni ang em tih te i lo chhui dawn teh ang.

Pathian Lehkhabu, Pathian thawkkhum: Tirhkoh Paula hi a pianthar atang khan Isua rinnaah a innghat tawp mai a. Rinna thu ngawt mai vahvaihpuiin kum sawm pali hnuah Jerusalem-ah tirhkoh dangte nen thawhho dan tur ngaihtuahin a han zin chho a. Galatia khuaa mite hnena Paula’n a lehkhathawn a ziah lai hun hi chuan, “Thuthlung Thar” kan tih tak hi a la piang rih lo tih hriat a pawimawh a. Paula kha Thuthlung Thar lehkhabu ziak hmasa bertu a ni. Chanchin tha bu palite zingah chuan Chanchin Tha Marka ziak hi a hmasa ber a ni mai thei, hei pawh hi Paula dam lai (AD 65) khan ziah a la ni hman lo. Galatia khua mite hnena lehkhathawn a ziah hnu kum sawm panga velah chauh ziah a ni tihna a ni. Ka’n sawi kual duah duh chhan chu Paula’n Pathian lehkha thu tia a sawi reng renga a rilrua awm chu Thuthlung Hlui lehkhabute a ni zel tih hriat tur a ni. Paula zirtirnaah hian Thuthlung Hlui lehkhabute hian hmun pawimawh tak changin 2 Timothea 3:16-ah chuan, “Pathian lehkha thu zawng zawng hi Pathian thawk khuma pek a ni” tiin a ziak a.

Thuthlung Hlui bu atanga rinna chu: “Pathian Lehkha Thu chuan, Pathian rinna avangin jentail te thiam a chantir dawn tih hre lawkin, ‘Nangmahah chuan hnam tin malsawmsakin an awm ang’ tiin Abrahama hnenah chanchintha chu a hrilh lawk” (Gal. 3:8).

He thu Paula’n a ziak lai hian Pathianin Abrahama a koh chhuah laia thu a thlunpui kha a rilruah a thar a ni tih a lang. Gen12:1-3 a Pathianin Abrahama thu a thlunpui khan Abrahama chunga thutiamah chauh a innghat. Pathianin a ram kalsana, a hriat ngai reng reng loh rama kal turin a ti a. Tin, a tihhlawhtlin chuan malsawmna pawh a tiam nghal mai a ni. Pathian zawkin Abrahama hnenah khan, “Ka ti ang,” tiin vawi li zet a sawina chhan chu Pathian chauhin a tih tur te anih hlawm vang a ni. Abrahama kha chuan engmah a tiam ve lo. Hei tak hi mi tam zawkina Pathian hnaih kan tum dan letling chiah a ni. Pathianin thil eng emaw min tih letsak dawn a nih chuan a rawngbawl tawhte kan intiam thin a. Nimahsela, chutiang chu dan zawm avanga thiam chan tumna mai a ni. Pathian chuan Abrahama kha thil eng emaw intiam turin a hrilh lo va, rinnaa thutiamte lo pawm mai turin a hrilh zawk a ni. Chu chu thil awlsam tak chu a ni lo chiang alawm, a chhan pawh Abrahama khan amah inrin chhan lovin, engkima Pathian rinchhan azira ngaih vang a ni a (Gen 22). Chuvangin, Abrahama koh a nih dan hian Chanchin Tha laimu tak chu rinna avanga chhandamna a ni tih a lang chiang viau a ni. Thuthlung hmasa lam a ni emaw a hnuhnung lam a ni emaw chhandamna hi a hrang hrang a awm lo, Paula’n a sawi angin, “Chanchin |ha chu pakhat chauh a awm” (Gal. 1:7).

“Lal Isua ka rin phawt chuan” tih hian Pathian leh mihring inthlunzawmna zawng zawng te, Amah Pathiana inpek pumhlumna te, rinna avanga engkim kalsannate a huam tel vek a ni tih hriat tur a ni ang. ‘Rinna avang chauha thiam chantirna’ tih hian sual tih ngampatna thu a sawi lo a ni tih Paula ngei hian a lo sawi bawk (Rom 3:8, 6:1). Tin, kan rin phawt chuan Pathian pawm tlak ni turin A dan zawm a ngai tawh lova, kan fimkhur tulna pawh a awm tawh lo tihna pawh a ni hek lo.

Abrahama thuawihna zawng zawngte kha Pathianin mi fela a ruatna chhante kha a rinna avang zawk chauh a lo ni. A thiltih engmah kha thiamchang a nih theihna tura tih a ni lo va; thiam chang tawh a nih vang zawk a ti a ni. Pathian Dan leh Thupek awih avanga thiamchang tur ni lovin, thiam chantir theitu thiam min chantir tawh avanga a thupekte hi ihe lova awih mai tur kan ni zawk. Chu ngei chu a ni “Rinna” chu!

Kristian nunah hian a tir atanga a tawp thlengin kan chhandamna chu Krista rin avang chauha chan tur a ni a. Abrahama pawh kha chatuan mi, amah kaihruaitu Isua Krista pawma a rin avang leh a thutiamte a rin avang chauha mi fela chhiar a ni a, chu thilpek tho chu vawiinah pawh Abraham rinna tawmpuitute tan chuan a la awm reng a ni. Kan thiltih sualte avanga thiam loh chantir kan nih lohna chhan awm chhun chu kan sual man tlak nana ka aiawha Isua thih tawh vang a ni. Isua Krista hi Bethlehem ran in atang chauha min kaihruai tura lo chhuak mai ni lovin chatuan ata mihringte min tlan tur leh hruai tura ruat ‘Kan chatuan lungpui’ chu a ni zawk (I Kor. 10:1-4).

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?