Khawthlang PawimawinaKhawthlang Pawimawina – Ruata Sailo

Zoram kawngpui kawtchhuah hi hmâr lam ni tawh lovin, chhim lama a ni tawh zâwk ang. Hmar lam kawtchhuah kawngpui hi a la ping ang. Zoram khawvel kawtchhuah hi chhim lam a nih tawh dawn avângin – sâwng Akyab lawngchawlhnate saw in la hmang tangkai èm èm ang. (Akyab hi ‘Sittwe’ tiin thlâk a ni tawh)- Zawlnei Saikhuma

Khawthlang pawimawhna sawi dawn a chhim lam atanga han tan daih mai chu a van inpersan teh daih ve pawh kan ti mai thei e; nimahsela, a tawp han chhiar thleng la, chu zawhna chu nangmah ngeiin i chhang thei ang. UPA sawrkar lai atanga ‘Look East’ policy tia kan lo hmel hriat tawh kha NDA sawrkar hian a ena en ringawt chu duh tawk lovin, ‘Act East’ policy chak takin a rawn kalpui chho ta a nih hi. Mizoram ri atanga Myanmar ram chhung, Paletwa-a kawngpui sialna tur pawh India sawrkar hian a sum tam tham tak (2000crs) vel chu a sanction tawh bawk a ni. Chutih lai chuan Mizoram chhungah ngei pawh heng a hnuai a project hrang hrangte hi kal pui mup mup an ni mêk:

1. Kaladan Multi Modal Transit Transport Project (KMMTTP): He double lane 87.00 Km vel kawngpui hi Lawngtlai atanga Zochachhuah thleng tur a ni a, tunah hian siam zawh tep a ni tawhin 2019-ah chuan a vai a siam zawh hman beisei a ni.

2. Champhai – Zokhawthar Road: Hei pawh hi double lane 25.00 Km vel World Bank sum hmanga siam mêk a ni a, formation leh kawng chhuat phah pawh zawh tep an ni tawh. Blacktop pawh hi 2019 chhunga zawh ngei tum a ni. Kan hriat theuh angin Zokhawthar hi Trade Centre pawimawh tak a ni chho mêk a ni.

3. Tlabung – Kawrpuichhuah Road: He kawng ni khata motor pali panga bâk tlan ngai lo hi engtizia a, double lane-a laih vak tak mai nge a nih tih chu a hre thúk ve lem lo tan chuan zawhna chhan har tak chu a ni ve ngei ang. Ka hriat pawh hi a thuk bik lem lo nain a enkawltuah hun eng emaw ti chhung ka lo tel ve tawhna a nih avangin tlem chu ka hre ve a. World Bank sum hmanga laih a nih ngawt dan pawh hi ngaihtuah tham tak a ni. Kawrpuichhuahah hian International Trade Centre siam tumna a awm ni awm tak a ni, World Bank-a an hotunu pawhin Bangladesh Chittagong atanga Kawrpuichhuah lam hawia kawngpui World Bank sum hmang thoa an siam mêk thu a sawi.

4. Mizoram State Regional Transport Connectivity Project (MSRTCP): He kawng hi DPR siam zawh tep a ni a, World Bank sum hman a niin, double lane tur tho a ni. Sihhmui lei bul Lengte kalnaah pêngin, West Lungdar – Darlung – Buarpui – Zawlpui – Phairuangkai – Chhumkhum – Chawngte – Diltlangah kalin KMMTTP kawng pawh tur a ni.

5. Bairabi – Sairang Rel kawng: Kan hriat threuh angin Bairabi atangin Sairang thleng rel kawng siam mêk a ni a, hei pawh hian a tum tak chu Mizoram chhimtawp Zochachhuah a ni. Preliminary survey pawh tih a ni tawh bawk.

Kan sawi tak thuak thuak ang khian, hmasawnna kawng hian chhim lam a kâwk deuh vek mai a, ‘Kawtchhuah hi chhim lam a nih tawh zawk ang’ tih pawh hi a thleng dik ngei dawn niin a lang. Keini Mizo ngeite ai hian Zawlnei Saikhuma thusawi hi, Pu Modi a sawrkar hian a hlawhtlin loh hi a hlau ta ber zawk emaw tih mai turin hma a la nasa hle a nih hi.

Chutia chhim lam kawt chhuah ni tur chuan khawthlang lam hian pawimawhna lian tak a nei a ni tih hi i lo ngaihtuah chhunzawm ang u hmiang. Khawthlang tel lo chuan chhim lam hi kawtchhuah a lo ni thei reng reng hlei nem maw le! Luan chhuahna awm lo khua chu ‘khaw mawngping’ kan ti a ni lawm ni! Chhim lam hi kawtchhuah pawh chu lo ni ringawt mah se, a luan chhuahna tur a awm si loh chuan ram mawngping a ni ve mai dawn a sin, tuna a luan chhuahna tur ber hmar lam kawtchhuah kawngpui hi a la pin phei chuan. Hmanni lawk MZP-ten chawlhbuk sak an tum mai mai pawh khan a ping ti tih chu a nih mai kha. Zawlnei Isaia tluk hiala rin tur ni lem lo mah se a khak sual bik lohna hi tam tak chu a awm ve mêk zelin a lang bawk sia.

Heng a luanchhuahna tur kawng NH 44 ‘A’, KDZKT, Mamit – Bairabi leh Bairabi – Zamuang te hi an la pawimawh dawn chauh a ni. A bik takin Mamit – Bairabi leh Bairabi – Zamuang te hi upgradation tih vat-a double lane-a kan siam vat loh chuan ram hmasawnna mutan an la ni ang. Tuna sum awm mang lova repair ve nial nual ngawtte hi chu ‘sa tah chhuak pêk’ ang vel lek a ni, NGO’s hrang hrangten an vei a, social media leh press release te hmang a an tlangaunate pawh hian rah tha tak chhuah ngei thei se. Ni 27-28 April 2018-a Pu David Lalthangliana, Information & Public Relation Director ho ngeia Mizoram Journalist president Pu Zonunsanga Khiangte leh a thianten an rawn tlawh pawh hian nghawng tha tak a chhuah ka beisei tlat a ni.

Ni 4-5 May 2018 chhunga Indian Roads Congress (IRC) Council meeting Aizawl hmun ngei a kan nei hi a lawmawm hle mai. Kan sawrkar pawhin hma lain, he meeting India rama Chief Engineer rual leh Transport Ministry te kal khawm hi hmang tangkaiin, heng kawng ka han sawite hi National Highway-ah min han puansakin, upgradation turin tih nghal ni se a van lawmawm leh zual dawn em! KTP, TKP leh YMA inkhawmpuiah pawh a thlengtu khuate chuan eng emaw hmasawnna chu kan hmu thin a ni lawm ni!!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?