Kohhran Hmeichhe Inkawmpui

Aizawl; Mizoram Presbyterian Kohhran Hmeichhiate chuan March 10-12, 2017 chhung khan Serchhip Leisekawt Field-ah Inkhawmpui Lian vawi 47-na an hmang. He Inkhawmpuiah hian Palai 9087 an kal a, inkhawm apiangin pandal-a leng lo inkhawm an awm thin.

Inkhawmpui thupuiah ‘I Pathian tawk turin inpeih rawh’ (Amosa 4:12) hman a ni a, Pathianni chawhma, chawhnu leh zan inkhawmah Upa C.Ngurthantluanga, Speaker chuan a sawi.

Zirtawpni zanah Palai inlawmna leh Report ngaihthlak a ni a, Synod Moderator Rev. Lalzuithanga’n thuchah a sawi a. Inrinni nilengin Serchhip Kawnpui Kohhran Biak Inah Rorel leh Hruaitu thar thlanna neih a ni a, mi 732 an kal. Faina leh thianghlimna kawngah ram pum huapa hma lak leh ei leh in dân thianghlim inzirtir te, Grace Home tanpui nan ram pum huapa inkhawm vawi khat thawhlawm pek te, kum 2017 chhungin Synod Hospital Charity Fund atan vawi khat inkhawm thawhlawm lakkhawm te, Synod Hospital Eye Unit tan Non-Contact Tono Meter (Mitmu pressure sân leh sân loh enna) khawl leina atan ram pum huapin inkhawm vawi khat thawhlawm lakkhawm te, John Williams Hospital, Lunglei tanpui nan ram pum huapin vawi khat thawhlawm pek te, Ram pum huapin ram tana awmni khama tawngtai hun hman ni se tih te an rorel thutlukna chu a langsar a ni a. Kum 2017-2018 Budget atan Rs 33,00,000/- pawm a ni bawk.

Kum 2018 Rorel Inkhawmna hmun tur hi Tuikual Kohhran Biak Inah March 9-11 chhunga neih tur niin, kum 2019 Inkhawmpui Lian chu ni March 8-10, 2019 chhungin Kolasib-ah neih a ni ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?