Aizawl; Mizorama Kohhran hrang hrangte chuan Krismas leh Kumthar chawlh an hman hnuah naktuk atang hian an office leh hmun pawimawh hrang hrangte chu an hawng leh tan dawn.

Mizoram Presbyterian Kohhran hnuaia office hrang hranga thawkte chuan naktuk atangin pisa an kai leh tan dawn a. Hetih lai hian Synod Bookroom hrang hrang erawh Ningani atang khan dawr theiha hawn a ni tan tawh thung.

Mizoram Baptist Kohhran pawhin December 19-a office an khar hnuah naktukah an hawng leh tan dawn a, Thawhlehni hian BCM Biak In, Serkawn-ah  thawktute inhlantharna hun hman a ni bawk ang.

Inhlantharnaah hian Hqrs Office leh BCM Institutions leh department hrang hrang – Lungleia mite chuan a huhovin Serkawn Biak Inah an hmang ang a, Lawngtlai leh Aizawla thawktute pawhin Executive Secretary te ruahmannain an remchan danin an hmang ang.

December 20-a North East India UPC General Hqrs Office, Mualpui Salem veng Aizawl pawh an inkhar hnuah naktuk vek hian an inhawng leh tan dawn a. UPC North East India hnuaia project pakhat, Compassion Center Office, Kolasib Khuangpuilama mi pawh an inhawng tan nghal bawk ang.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.