Kolasib-ah Zilla sainik board-in raising day hmang

Aizawl: Kolasib bialtu MLA P.C.Zoram Sangliana chuan nimin khan I&PR Conference Hall, Project Veng-ah Kolasib zilla sainik board raising day vawi 8-na a hmanpui.

Khuallian chuan thu sawiin, “India ram himna a tan sipaite hi mi pawimawh berte an ni a, Mizo sipaia tang mek bakah a bâng tawhte pawh Mizo te tihmingthatu an ni a, India ram zau takah Mizoram chu dinhmun zahawm taka hlangkaitu an ni,” a ti.

Khuallian chuan sipaia tang mekte leh a bâng tawhte chu Central bakah Mizoram sawrkar pawhin a hre reng tih sawiin an mamawh leh harsatnate chu inthlahrung hauh loa thlen thin turin a chah bawk.

He hun hmanpuitu, Brig. SS Mohite, Dy. Commandant & Chief Instructor, CIJWS, Vairengte chuan sipai a Mizoram quota (vacancy) hnawh khah a ni ngai lo chu pawi a tih thu a sawi a. Sipai bângte chu ram tan mai bakah taksa hriselna leh mahni invawn leh inthunun nan sipaia tan hlawkzia chu Mizo thalaite hnenah tlangaupui turin a sawm bawk.

Zilla Sainik Board Chairman Dr. Arun T, IAS chuan sipai nun chu mahni invawng tak leh inthunun tak a ni tiin sipaia an tan lai chauh ni lo an chawlhsan hnu ah pawh mahni nun chu uluk taka vawng chhunzawmin vaihlo, zuk leh hmuama fihlim tlat turin a chah a, Chairman a nihna angin Sainik Board chu harsatna an tawhna reng rengah puih a inhuam reng thu a sawi bawk a ni.

Raising day hmannaah hian sipai bansan ta kum 80 chung lam mi 10 hnenah chawimawina hlan a ni a, World war-II veteran mi 3 bakah world war –II veteran widows mi 27 hnenah CIJWS, Vairengte chuan cheng 2000/- theuh leh sipai tanlaia ropuina ram kai ta te ralna ‘Assured Deceased Last Rite Scheme’ hnuaiah martar 6 te ralna cheng 10,000/- theuh CIJWS, Vairengte chuan a hlan bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?