Kristian hunpui bawhbuai lo turin sorkar ngen dawn

Aizawl; Mizoram Baptist Kohhran Rorelna sang ber, Assembly chu Nilaini zan atang khan Lunglei Venglai BCM Biak Inah tan a ni a, zanin hian a tiak dawn a. Tun tum rorelah hian Kristiante hunpui, Krismas leh Good Friday bawhbuai thei zawnga sorkar programme siam lo turin sorkar laipui ngen ni rawh se tih an rel a. Odisha-ah Mission Field hawn an rel bawk.
BCM Assembly vawi 123-na hi BCM President, Rev. Lalbiaksanga Chinzahin kaihruaiin a hawng a. BCM General Secretary, Rev. F.Ramdinmawia’n pawn lam atanga chhimtu palai kal mi 15-te lawmna thu sawiin thilpek a hlan nghal a ni.
Assembly thupui atan hian ‘Isua rorelna’ tih hman a ni a, he thupui tlawh chhan hian Rev. Dr. Rodinmawia Ralte-in Pathian thuchah a sawi.
Ningani atang khan rorel tan a ni a, rorel tan veleh President kal chhuak, Rev. Lalbiaksanga Chinjah chuan President thar, Rev. P.C.Liandula hnenah mawhphurhna a hlan a, thil pawimawh ngaihtuaha thutlukna siam tak zingah chuan BCM hian Mizoram Institute of Medical Education & Research (MIMER) behchhanin Falkawnah Khualbuk sa rawh se tih te, Kristiante hunpui Krismas leh Good Friday bawh buai thei zawnga sorkar programme siam lo turin sorkar laipui ngen ni rawh se tih te, Inkhawmpui lian dawl thei tur Hall BCM-in sa rawh se tih te, Sap Upa leh Pu Buanga ten Mizoram leilung an rawn rahna hmasa ber Sairang kaiah BCM Assembly-in anmahni hriatrengna siam ve rawh se tih te, Chanchin Tha thlen dan Documentary Film siam te, BCM chhungkuaten ei leh bar leh sum leh pai lama hma an sawn theih nan BCM-in Economic Development Policy siam te, BCM Assembly hian BCM chhungkua, fa nei tamte hnenah lawmman pawisa fai pe rawh se tih te a tel.
Zirtawpni leh Inrinniah rorel chhunzawm a ni a. BCM Pay Commission 2018 rawtna leh report pawm a ni a, April 2019 atangin hei hi hman tan tur a ni ang a. BCM Nomination Committee-in Assembly Executive Committee kaltlanga Planning Commission din rawtna remtih a ni a, member tura chhawp chhuahte pawh pawm a ni a. January Executive Committee-ah en theih tura ruahmanna te lo duangin Assembly 2020 ah pawm tura thlen leh a ni ang.
Odhisa Mission Field thar hawn remtih a ni a. Nursing School, Serkawn chu Nursing College-ah upgrade remtih a ni bawk.
Heng bakah hian Nomination Committee-in BCM aiawha palaina hrang hranga aiawh kal tur a ruat te, Assembly hnuaia committee hrang hranga member tur a lo ruat leh rawtna pawm a ni a, Pastoral Committee-in Pastor atana a lak thar te, Executive Committee ain Pastor ordain tura a thlan chhuahte report a ni a. Mission Committee leh Administrative Committee ten MOU renew tur leh sign tharpui tura a thlen te remtih a ni bawk.
Nizanah vantlang inkhawm awmin Pathianni chawhm inkhawm chu Ordination Service atan hman a ni ang a, Pastor 8 nemngheh an ni ang.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?