Kristian Kal fimkhur rawhKristian Kal fimkhur rawh- Rev. L.Rema

Mizorama cheng Mizote hi tuipui ral atanga Kristian Missionary Pu Buanga leh Sap Upa ten Pathian thu min rawn hrilh atanga Pathian ringtu, Krista ringtute kan lo ni ta a. Chu Missionary 2 te chuan lei leh van siamtu Pathian thu chu awih tur leh zawm tlat turin min zirtir a, Pathian thu awia zawmtute chu, a fapa Isua Krista Kross a, a tuarna avanga chhandam kan nih tur thu te, chiang takin min zirtir thin. Pathian thu awih lote erawh chu, thiam loh chantir an nih tur thu Bible-ah kan hmu thei a ni. Kristian kal fimkhur rawh.

Lei leh van siamtu kan Pathian chuan a duh zawng leh duhloh zawng te chu a vantirhkoh te leh a zawlnei te hmangin amah ringtu mihringte hnenah a puang chhuak mai thin. Tin, Pathian duhzawng chu a fapa Isua Krista duhzawng a ni tih hi i hre thar leh teh ang u. Pathian hnam thlan Israel fate an ni emaw, Jentailte an ni emaw, Pathian duh loh zawng titute chu Pathian hremna an tawk ngei ang. Evi leh Adama te pawh Pathian thupek an awih loh avangin Eden huan atanga hnawh chhuah an ni tih kan hriat theuh kha, Amosa 5:21-ah chuan Pathianin In kut te ka hua in ka hmusit a, Inkhawmpui urhsunte ka lawm hek lo e sualin a khat si a. Heb. 4:12 – Pathian thu hi anung a thil a tithei a, khandaih hriam tawn eng ang ai pawhin a hriam a, Nunna leh thlarau ruhtuah leh thling phel hrang khawp hialin a chhun thei a ni.

Mizote hi Kristian kan nihna kum 123 lai a lo ni ta reng mai, kan rin Pathian duhzawng leh duh loh zawng thliar hrang thiam awm tak kan nih laiin kan Kohhran Headquarter lam atangtein kum tin inkhawmpui urhsun pui pui vawi duai lo kan hmang awn awn mai zawng anih hi. Kan Pathian hi a lungawi ang em? Pathian fapa Isua Krista pawh hi a lawm ang em? Pathian duh loh zawng hi a la pangai reng, Pathian hian vawiin ni thlengin kan inkhawmpui urhsun takte hi a la kham reng a ni, Pathian hian engvanga kutte kan inkhawmpui urhsun pui puite hi duh lo nge maw a nih? tih zawhna hi chu, Bible ah a chhanna a lang lo, a duh lo a ni mai, kan ti lo mai tur a ni. Kohhrante hian Pathian duh loh zawng,  Pathian lawm loh zawng te hi, kan duh loh zawng kan lawm loh zawng a ni ve em? Nge, Pathian duh loh zawng hi kan duhzawng, kan lawm zawng a ni tlat zawk? Kohhran te hian Pathian hi kan Protest zawk em ni aw, tih te ka ngaihtuah mai mai thin. Kan kal fimkhur a va tul tawh tak em? Pathian tel lovin em ni Inkhawmpui urhsun kan hman thin? Kohhran chhungah hian kan Pastor te emaw kan upa te emaw hian Pathian duh loh zawng Pathian huat zawng sual an tih te hian an inngaidam tawn mai thin a. Pathian huat zawng sual ti lo ang hrim hian thiam kan inchantirte hi fimkhur rawh! Pathian duh loh zawng sual kan tih palh te hian keimahin leh keimahni chu kan in ngaidam mai thin. Pathian erawh chuan a thu hi a sur mai mai dawn lo; sual chu sual a ni ang a, sual mam chu thihna a la ni reng a ni.

Pathian duh loh zawng tih hre reng sia a thu awih lova tiluite chu hrem lo chuan an chhuak lo vang, thihna an hmachhawn dawn a ni. Kristian, kal fimkhur rawh, i Upa nihna, i Pastor nihna leh i Reverend nihna khan a chhandam dawn lo che. Pathian duhzawng aiin kan Kohhran denomination duh dan leh a thu te kan awi zawk fo thin. Kohhran Pastorte phei chuan Kohhran Headquarter atanga hlawh an hmuhna thu chu Pathian thu aiin an ngaipawimawh zawk tih hi thudik ani. Kristian kal fimkhur rawh. Mizoram Kohhrante hian Party Poilitic ang maiin pulpit tlangah an insawisel tawn a. Biak In tha neihah an inel a ni ber mai.

Krista ringtu theuh theuh an inmu leh ar a, Sakhaw dang lakah a zahthlak duhzia an hre pha lo ni berin a lang. Pulpit Sermon-ah remna thu aiin rem lohna thu kan sawi tam zawk fo mai. Kan inkhawmpui urhsunah te hian hmangaihna aiin, inhuatna, inlungrual lohna thu pass a tam thin avang te, rorel thei leh thei lo palai thei leh thei lo inthliarna te avang nge heng kan inkhawmpui lian urhsunte hi Lalpa Pathian in a lawm loh, Inkhawmpui e ti lovin kan hlim theih thin lo. Kristian kal fimkhur rawh.

Harhna beisei avangin Camping Crusade te hun leh tha, sum leh pai tamtak  sengin kan buatsaih thin. Amaherawhchu Speaker leh team members ten a tawp zan Biak In an chhuahsan rual rualin kan hlimna, kan harhna pawh a bo leh nghal mai thin te hian, Pathian a tih tak takna kan tlakchhamzia a lang chiang hle a ni. Zoram Kohhran hrang hrangte hian kum 2014-2015 Kelkang harhna tia kan sawi vul chuk lai khan Thlarau thianghlim harhna tleirawl zingah a tlak lai te pawh khan Kohhranin kan dawng thiam lo nge Kohhran chhuahsan a chhungkua kuain kan awm. Chutianga chhuakte chu  Kohhran Upa leh Pastor te chuan tawngtaipui chu sawi loh. Pawl chhuak ho tiin huatna lungtumin an deng zui a, kan beram te lainatna thinlung tel lova mihring tak maia kan han deusawh vak vak mai thin te phei chu a Kristian lo hle. Kan Pastor te lah hian inhlawhfa rilru pu ran hian ka hlawh a bo chuang lo, tiin vawi khat mah an tawngtaipui lo. Chuvangin Kristian kal fimkhur rawh. Meidil i hmaah a inchhawp e, boralna lamtluang i thlen hma hian Pathian duh loh zawng te chu duh lo ngam ila, Pathian duh zawng te chu kan duh zawng, kan lawm zawng, lo ni se. Vanram kan panna kawng chhuk chho hi chhel takin i pan zel ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?