Kut Hnathawktute Ni (NLUP Day leh a behbawm)

Chief minister-in a sawi ang deuhin hna zahawm ber thawktu chu lo neitute leh kut hnathawktute hi an ni. Chutihlaiin, kan ramah hian lo neitute hi mi zahawm ber chu an ni lo chiang thung. Kan la hre theuh anga January 14, 2011 a NLUP hawnna Aizawl leh district khawpui hrang hranga ropui taka buatsaih a nih tum khan chief minister-in kum tin January 14 hi Kut Hnathawktute Ni atan hman thin a nih tur thu a sawi a nih kha. A tir atang hian kut hnathawktute tih hi lo neitute sawinan hman a ni a, ‘State Farmers’ Day’ ti te pawhin an sawi tel nghe nghe. Engpawhnise, hetia eizawnna hautak ber mai thawktu lo neitute puala ni bik siam a ni hi a lawmawm a tih loh theih loh ang.
Kum 7 kal ta chhunga Kut Hnathawktute Ni hman dan erawh han thlir kir ila, NLUP fak mawina ni atan hman thin ni berin a lang thung. Mak tak maiin kum 2012 khan he ni puala hun hman hi a ni lo tlat mai bawk a, sorkar/NLUP hotuten an theihnghilh a ni maithei. Kum 2013 kha chuan inthlan kumte a ni bawk a, lo neitute pawimawhna a nasa leh ta deuh a, district headquarters hrang hrangah pui taka hman a ni a, NLUP tithate hnena lawmmante an sem a nih kha. MLA inthlan zawh hlim 2014 (January 14) khan a hma aia pui lo zawka hman leh a ni a. Tourist Lodge-ah Agriculture minister ho a hman a ni a, sorkar PR a a lan dan chuan khuallian hian sorkar official-te a fuih nghe nghe.
NLUP-in kum 5 hmel a hmuh tanna January 14, 2015 khan district khawpui hrang hrangah hman leh a ni a, Aizawlah chuan chief minister hoin Synod Conference Centre-ah hman a ni a. Chief minister hian thu ropui tak tak a sawi a, NLUP chu project tha tak a ni tih hriain central sorkar pawhin sum an dil aia tam an pek thu te, NLUP hian UNO kawngkapui pawh a kik hawn thu leh agency pali – ILO, FAO, UNDP leh UNIDO a mi thiamten Mizoram hmun hrang hranga kut hnathawktute a hmun ngeia an rawn zir chian thu te a sawi a; Mau sawngbawlna changtlung tak nei tur Taiwanese technology hmang tura ruahmanna an kalpui mek thu te a sawi a nih kha.
Nikum (2016) pawh khan district khawpui hrang hrangah hman leh a ni a. Aizawl a Vanapa Hall-a hmannaah khuallian chief minister chuan, “Sum ngaina hnama kan chhuah loh nan kut hnathawh kan uar a pawimawh hle a ni,” a ti nghe nghe. NLUP Implementing Board vice chairman Pu Liansailova pawhin, “NLUP hi khawpuiah aiin thingtlangah a hlawhtlinna a sang zawk a; a pumpuiah 44%-a hlawhtling,” niin a sawi nghe nghe. Tak tak a nih chuan thingtlang pa NLUP vanga ding chhuak an tam hle tihna a ni a, mi tam tak rin aiin a lo hlawhtling tihna a ni ang. Chhui zui tham a ni.
Kum tin January ni 14 hi Kut Hnathawktute ni atan hman thin a nih tur thu mahse kumin hian he ni hi sawn hlat dawrh a ni a. Aizawla officer chin zawng zawng chu January 19 a Kut Hnathawktute Ni hmanna Lalthanhawla Auditorium-ah kal tur tih a ni a, sorkar thuchhuah a khauh bawk a, an kal tha viauin a lang. Sorkarin kum dang zawng aiin a ngai pawimawh nia a lanna chhan chu khaw hrang hrang 40-ah hun hman a ni hi a ni. Hmun hrang hranga hun hman dan han thlir hian kum hmasa lam ang bawkin NLUP fakna ni, NLUP day anga hman a ni leh pek a. Dawhsanah milianho an thu tlar put a, a hming put chhan kut hnathawktu/lo neitute ber hi an vang pharh thung.
Sorkar laipui hian kum 2001 atang khan 23 December hi Lo Neitute Ni (Farmer’s day/Kisan Diwas) atan a lo puang tawh a, ram chhung hmun hrang hrangah lo neitute hmasawnna tur zawnga hman a ni thin a. India prime minister pangana, lo neitute hruaitua ngaih Chaudhary Charan Singh piancham denchhenin (23 December) puan a ni nghe nghe. A hun lai 1979 budget kha lo neitute mamawh hrang hrang chhanna ang hiala ngaih a ni a. Lo neitute rap bettu, pung nasa tak awma pawisa puktirtu (money-lender) te leh an ram hawhtira chhawrtu (landlord) te laka an tal chhuah theihna turin hma a laksak nasa hle a. Lo neituten an thlai thar man man taka an hralh theihna tur leh an hamthatna turin a hun laiin dan te siam a ni bawk. State thenkhat chuan an ngai pawimawh hle a, sorkar hotu lawkte fuankhawmna ropui tak atan an hmang ngawt lo a, lo neitu hlawhtling leh entawntlak chawimawina atan te, an mamawh thupui zirhona atan te an hmang a, agricultural scientist-te leh lo neitute inkawmhona te an buatsaih thin a ni.
Economic Survey a kan hmuh thin angin Mizoram mipui za zela 60 vel hi lo neih leh a kaihhnawh (primary sector) a eizawng an ni a. Chutihlaiin, state sum thawh chhuah zawng zawnga za zela 17.5 chauh an thawh ve thung. Hei hian an dinhmun a tarlang chiang viau awm e. Dik tak chuan MIP leh NLUP kalpui a nih tawh hnu pawh hian an kum khat thawhchhuah tlem zia leh an eizawnna hlawk loh zia hi sawiin a siak lo. NLUP website a tarlan dan chuan sorkar laipuiin Cheng vaibelchhe 2,873.13 zet a rawn pe a. Kum 2011 atang khan he pawisa hi hman tan a ni a, kum 6 zet a liam ta. Cheng vaibelchhe 2,873.13 hi a tam zia Mizo pa tam tak chuan an chhut thiam lo hial ang. Chutiang zat pawisa chu kut hnathawktu eng zatin nge din chhuahpui? tih te, thuneitute hian an hausak pui zawk em? tih te, eng engah te hian nge kan state hi kan intodelh phah tak? tih te hi ngaihtuah zui a, chhut zui tham a ni.
Mimal leh party mal sawi loin, a nawlpuia lakin tunhma atangin party hrang hrangte hian lo neitu leh kut hnathawktu rethei leh mawlmang tak tak, bum awl tak takte hi politics khelhna hmanrua atan an hmang tawh thin a, anmahni hmangaih ber ang ziazangin inthlan dawnah politician-ten Awle mittui an titlak khum a, a chang leh an bawl a, vote zawnna atan an fuihpawrh thul. Zep nak emaw party member hlangin an thlan tlin MLA kan la nei ngai lo a, kut hnathawktuten beiseina sang tak nena an thlan tlin sorkar zel kan la nei. Mahse, kan hrawn tawh sorkarte hian anmahni thlang tlingtute hi beiseina puarpawleng mai an siamsak leh thin a, a vanduaithlak khawp mai.
Kumin hian kut hnathawktu tam takin innghahna atana an hman sawhthing hralhna a chhe hle mai a, NLUP marketing board kha khawnge? tih mai a awl dawn. Tunhmain Tung,lakhuihthei, sawhthing, etc., hralhna thuneituten an ngaihtuah duh loh avangin lo neitute an mangang tawh thin a nih kha. Tunlai hi serthlum tam lai a ni a, hei pawh hi enge a an leh zel dawn le? Nikum khan kum tir thla 2/3 thleng vel kha khawpui kawng sirah serthlum zuar an thu a, Pathianniah pawh zawrh ngai khawpin hralhna tur an van a nih kha. Mizoramah serthlum a rem hnu lawkah bazarah an zuar leh a. A zuartute min hrilh dan chuan a hma lawka kan thar chhuah kha Shillong leh thenawm state atangin manto zawkin an rawn thawn let leh a ni. Tak tak a nih chuan a hnam ang pawhin a zahthlak a, kan ram kut hnathawktute ka khawngaih zual phah hle. Thlai leh thei dahthatna ngaihtuah nachang hria kan mamawh a, chutiang atana kawng kawhhmuhtu leh puitu sorkar neih a chakawm hle mai.
Ngun taka chhut hian kan ramin buaina leh harsatna kan tawh zawng zawng deuthaw hi hnaivai te a chinfel theih mai a ni a, kut hnathawktute leh thingtlang mite din chhuahna tur pawh hi thuneitute mawhphurhna liau liau a ni bawk. He thu ka ziah lai hian US president 45-na atan Donald J Trump an la lut fel hlim hlawt a. Amah hi pa phunglung ve tak ni mahse American-hoin an president atan beiseina sang tak neiin an thlang tling miau a. Enge a an zel ang tih chu hunin a hril anga, amah lak luhnaa a thusawi erawh a ngaihnawm hle. “Kum rei tak chhung chu kan ram khawpui a mi tlemte hian sorkar atanga hamthatna an dawng thin a, mipuiin a man an pek sak thin. Sorkar a thang hle a, mahse mipuiin a hausakna zar an zo pha ve lo a, politician-te an hausa tual tual a, eizawnna hna a vang tial tial thung…hnehna an chan chang pawhin nangni tan hnehna a ni ve ngai lo a, an hnehna chan an lawm lai pawhin ram dung leh vanga chhungkaw harsa tak takte tan chuan lo lawm ve na tur a awm meuh lo. Chung zawng zawng chu a inthlak danglam dawn ta..” tiin a sawi a. “Sumdawnna a ni emaw chhiah chungchang a ni emaw ram dang mi lo pem chungchang a ni emaw ram dang nena kan inkungkaihna chungchang a ni emaw, a engapawhnise American kut hnathawkte leh chhungkaw tinrengte hamthatna tur zelin thutlukna siam a ni ang,” a tih te hi kan ram hruaitute tawngkam ni se hnuk a ulh thei hial ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?