Lawngtlai-ah thingphun

Aizawl: Nimin khan Lawngtlai khawpui chhunga Lairam Isua Krista Baptist Kohhran Thalai Pawl Unit hrang hrangte chuan, Kaladan Multi Modal Transit Transport Project kawngpui kamah thing tiak phun beihpui an thlak.

Lai Autonomous District Council hnuaia Forest, Environment & Climate Change Department leh Lairam Isua Krista Baptist Kohhran Central Thalai Pawl ten ramngaw leh nungcha humhalh kawnga hmalak dunna tur thuthlung an lo siam bawhzuina kal zelah, thingtiak hi an phun a. Thingtiak phun hmaa inkhawm tawi neihah LADC-a DCCF, Environment, Forest & Climate Change K.Lalromawia chuan, “Ramngaw hum-halh a, ramngaw tha zawk siambelh zel chu khawvel chenna tlak siam tura hmalakna pawimawh ber zinga mi a ni a. Kohhran thalaiten he lama ke an pen hi a lawmawm a, thingphun mai chu duh tawk lo va, a puitlin thlenga enkawl zui a pawimawh hle a ni,” a ti.

Nimina thingphun beihpui thlak ah hian Lawngtlai khawpui chhunga LIKBK Thalai pawl, Unit 20 ten thingtiak 10 theuh, a vaiin thingtiak 200 an phun a, thingtiak leh a hungna tur te chu LADC hnuaia Forest, Environment & Climate Change Department ten tumsak in, DCCF hovin thingphun hnatlang a chhuakte hi a hmun ah vil a, heng thingtiak an phunte hi LIKBK Thalai Pawl te chuan an enkawl zui dawn a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?