LAWRKHAWM (UKIL Huang)

Dinthar Veng luhmehna dawr  pakhata  ka lu mettu chuan, “Miin Jail-ah AIDS veite hian thil tisual mah se an tang thei lo an ti a, a dik em?” tiin min zawt a. Dan lam kaihhnawihah hian inzirtir tur tû lua a lo awm dawn lo a nih hi tih min ngaihtuahtir a. Chuvangin, tun tum chu topic hrang hrang i han lawrkhawm dawn teh ang.

 

1. A hmasa berin a chunga zawhna khi han chhang dawn ila. Jail (Tan In) hi dan bawhchhetu Court-ina thiamloh a changa a puan tawhte hremna atan leh court-in an thubuai ngaihtuah mekte dahna a ni a. Dan bawhchhiate chu an thilsual tih nasat dan azir leh pawi dan azirin hremna pek an ni thin. Sawrkarin jail-ah hian doctor a dah thin a, chungte chuan jail-a tangte hriselna dinhmun an endik thin. Jail-a tang mek zingah AIDS vei an awm a nih chuan Jail-ah Antiretrovial Therapy (ART) a lak theih a, enkawl chhunzawm theih a ni. Tang zingah damlo na zual bik, jail-a enkawl theih loh, damdawi ina enkawl ngai an awm chuan an refer thin a, court-a thubuai ngaihtuah lai mekte an nih chuan court phalna lak a ngai thin a, thiamloh chang tawh an nih chuan jail thuneitute phalnaa damdawi in lamah enkawlna pek thin an ni. Thil sual titute chu, AIDS a ni emaw ni lo emaw, Police-in an man thei a, Jail-ah tan tir theih an ni bawk tih hi zawhna ka chhanna ni mai teh se.

 

2. Veng pakhata Joint Action Committee (JAC) hruaitu pakhat chuan, “Zu zuar/damdawi zuarte hi hah takin kan check a, zankhua tai rek thleng thlengin kan chang a, police/excise hnena kan hlan atang ni rei lo teah khawlaiah kan hmu leh nawlh nawlh fo mai a,” tiin mi sualte an tang rei hlei thei lo chu buaithlak a tih thu a sawi ka hre tawh a.  Ti hian i han sawifiah dawn teh ang: Dan bawhchhia NGO/Police/Excise-in kan man hian heng mi sual kan tihte hi Dan mitah chuan thil tisualtua puh (accused) an ni a, an thil tihsual leh man an nih chhan chu court hmaa finfiahna chiang tak (proved) a nih hma chu ‘mi sual/thiam loh chang’ an la ni lo a, an thubuai pawh ‘ngaihtuah mek’ a ni thin a ni. Thubuai ngaihtuah anih lai hian jail-ah dah thin an ni a. Chutih rualin an thubuaiah thiam loh chang an la nih loh avangin thubuai ngaihtuah chhung atan chhuah lailawk (bail) dilna chu court-ah thubuai neiten an thehlut thei a. Court-in uluk taka a ngaihtuah hnua chhan tha leh awm a tih chuan thubuai neilai tang mekte chu bail-in a chhuah lailawk thin a ni. Khawilaia kar hmasa lawka kan mante kan lo hmu leh a nih pawhin an thubuai a la fel lo a, thubuai ngaihtuah mek a nih laiin court-in a chhuah lailawk mai chauh a ni tih kan hriat a tha. Bail chungchang bik hi thupui hrana hmangin kan la sawifiah dawn nia.

 

3. “Miin mi dang ram/in chu chhum lo chat lovin kum 12 chhung luah ta sela, dan angin chu a ram/in luah mek chu a neitu dik tak lak atangin a neihsak thei em ni?” tih hi zawhna awm ve fo a ni a, tawi têin han chhang dawn teh ang. Mi ram rei tak luahsak avanga neitu nihna a luahtuten an claim hi ‘adverse possession’ an ti a. Hetiang a nih chuan ram/in neitu tan an ram/in chu rei tak mi dang a luahtir ngamawm loh dawn a ni.  Heti maia ram/in luahtuten a neitu dik tak lak atanga an neihsak ngawt hi a theih loh i han ti tawl phawt mai teh ang. Ram/in luahtute’n a neitu hnenah luah man a pek chhung chuan a neitu nihna a claim theilo. ‘Adverse Possession’-in a sawi tum tak chu mi ram/in kha a neitu diktak tihbuai loh leh sawi buai lohvin (hei hian a neitu dik takin hre mah se a rawn chuh buai lo tihna a kawl deuh ber) kum 12 aia tlem lo a luah a nih a ngai. Ram/in luah man chawite a kawk ve lo a, land lease leh document dang siama ram/in luahte an huam tel hek lo. Tin, chutianga ram/in a neitu dik takte hriatpui tho si leh tihbuaina tel si loa a luah ve reng tawh a, neitu nihna alo claim dawn anih pawhin a ram neitu dik tak chu court-ah a khin tel a ngai a, document tha elkhen nena a beih a ngai dawn a ni. Dan ang thlapa Sale Deed/Gift Deed/Heirship Certificate te awm si loa he ‘adverse possession’ hmang ringawta mi ram/in neihsak hi chu Lal Isua’n mi hausa tana Vanram kai a harsat thu a sawina atana a hman ‘Sabengtung hriau benga luh’ tum ang vela ni ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?