Legal Metrology hmalakna hi

Tunlai hian Legal Metrology Enforcement staff te chuan Aizawl leh khawpui dangah te Thawhtanni kalta atang khan bungraw zawrhte dan anga zawrh a nih leh nih loh an enfiah a, dan zawm lo eng emaw zat an man a ni. Legal Metrology thawktuten an man te hi a báwma a man zat inziak, maximum retail price (MRP) tireha pen-a a man ziah chawpte leh MRP hliaha a man bel hnan leh mrp aia sanga hralh te an ni deuh ber a ni.

Dan chuan bungrua (Package Commodities) reng reng chu a kawmah a man hralh theihna sang ber (maximum retail price) te, a siam ni leh thla, a thihni (expiry date) leh thil pawimawh dang a siamna hmanrua leh thil dangte chiang taka tarlan thin tur a ni a. Hetiang dan zawm lote chu hrem theih an ni bawk.

Tun tumah hian Legal Metrology te hian an bungrua zawng zawng hi chhuhsak lovin a thenkhat mansakin warning an pe a, remchang hmasa a endik leh turin an kalsan a ni. An endik leh hunah dan anga bungraw hralhtute hian thil an ti lo a nih chuan na zawka hremna pawh lekkawh an tum a ni. Bungraw endik zingah hian India siamte chu a MRP bakah thil dang pawimawh, danin a phutte chu tarlan a ni a; mahse, ram thenawm atanga bungraw lo lutah hian a man (MRP) bakah a siam ni leh thla bakah thil pawimawh dang tarlan tur inziak a awm ve thin loh avangin a buaithlak deuh nia thudawn a ni.

Hetia Legal Metrology staff ten hma an la hi a lawmawm hle a, thilsual ti thin tam tak chu a titim dawn a. Chubakah mipui (consumer) te pawhin a man dik takin thil kan lei thei dawn tihna a ni. Company reng rengin thil an siamin an thilsiam kawmah MRP hi an tarlang ngei ngei thin a, hemi awmzia chu an bungraw siamchhuah hralh theihna man sang ber tihna a ni. Entir nan dailuah chu a MRP-ah Rs. 85 lo ni ta se, Rs.85 aia sang chuan hralh miah loh tur tihna a ni a, company ten hemi chhungah sumdawngte hlep tur an dah sa tawh vek a ni. Mahse, MRP-ah hian tax lak tel tawhna leh lak lohna a awm thin a, tax lak tawhna ah chuan chiang taka inziakin ‘inclusive of all taxes’ tih an tarlang thin a ni. Mahse, dan tlangpuiin tax erawh an pe lawk sa vek thin.

Mizoramah hian bungraw man hi state dangte ngaihtuahin a to fal thei bik hle mai a, hemi awmzia nia lang chu kan sumdawngte hian uchuak deuh taka hlep an tum a, mipui pawisa tam tak an la thin tihna pawh a ni thei ang. Sumdawng nih chuan hlep chu kan tum ngei tur a ni, mahse chutih rual erawh chuan uchuak taka mipui sum laksak chu thil dik a ni lo a; chuvangin, MRP aia sanga thil zawrh leh hralh chu dan kalh a ni tih hriaa, mipui hmakhaw ngai chunga dan an zah a pawimawh ang.

Hetih lai hian mipuite pawhin kan dikna chanvo hi kan hriat thar a pawimawh hle mai. Thil dik lo ti thin kan hriat chuan thuneitute hnena kan thlen ngam a pawimawh a, chuti ni lova kan ngawih mai mai chuan misualte an tlangnel zual zel ang. Tunlaia Legal Metrology hmalakna pawh hi mipui ten kan thlawp that phawt chuan a hlawkna teltu tur chu mipuite hi kan ni tih kan hriatthar leh a pawimawh hle.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?