Legal Metrology-in bungraw zawrh enfiah zel

Aizawl: Legal Metrology Department, Aizawl District chuan November 6, 2017-a tan tawh bungrua a man tur aia toa hralh a awm leh awm loh enfiahna, Special Drive chu an neih chhunzawm zel a, Aizawl khawpui tuam chhuah thuai tumin hma an la mek.

Legal Metrology hotute chuan hnathawktu indaih lohna avangin hna chak takin thawk thei lo mah se khawpui tuam chhuah thuai an tum thu Zalen an hrilh a. Dawrkai electronic part, motor/two-wheeler part leh electric part zuartute chu an bungraw zawrh enfiahin MRP aia sanga hralh, MRP thaichhiaa a man tidanglam leh siamtu company mumal lo zawrh chhuah a awm leh awm loh te an check ber niin an sawi bawk.

Tunah hian Bawngkawn, Vaivakawn, Dawrpui Vengthar, Dawrpui, Ngaizel, Kulikawn, Zarkawt, College Veng, Republic Veng leh Ramhlun area an enfiah tawh niin Legal Metrology hotute chuan an sawi a, “In man tum ngawr ngawr kan ni lo a, media hmangin kan puang lawk vek a ni,” tiin Zalen an hrilh.

Legal Metrology hotute chuan a chunga tarlan tak anga dan lo anga dawr bungraw zuar an man chuan an bungrua chu an hren sak a, hrenna lehkha an pe bawk a. Hun tiam siamin lehkha an la pe leh dawn niin an sawi a. Heta insawifiah lo leh office a rawn ngaihven zui lo chu dan anga hrem an nih dawn thu leh court an thlen dawn thu Legal Metrology hotute chuan an sawi a, pawisa chawi leh lungin tan thlenga hrem theih an nih thu an sawi bawk.

Mipuiin an enliam mai thin thu leh complain nachang an hriat thin loh thu Legal Metrology hotute chuan an sawi a. Hei vang hian Legal Metrology Service Association chuan agenda pass-in helama tan hi tul a tih thu leh motor part, electronic leh electrical part-ah te a tam bika an hriat avangin bul an tan niin an sawi bawk. “Tupawh hi consumer kan ni vek a, sumdawng pawh ni ila consumer tho kan ni, mipuite him tlanna tura he thil hi ti kan ni a, dan zawm tha vek ila, mipui tan pawh a tha hle dawn a ni,” tiin Legal Metrology hotute chuan an sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?