Liandingpuii : ‘project siamtharlehna’ nen comeback dawn

Nu a nihna khawvela min pensan hnuah a zai lai hi kan hmu khat ta hle. Synfo buatsaih fak zai intihsiakna bengkhawn hlawh tak mai — Praise On — ah khan judge zingah rawn telin a hmel kan hmu leh tan a. Kumin tawp lamah phei chuan a hla hlui ho chu hla thar ang maia a rawn ‘siam thar’ kan hmuh nual a rinawm. Project thar a neih hmangin Liandingpuii a rawn ‘comeback’ dawn e.
Album pali (4) a ti chhuak tawh a. A album hnuhnung ber pawh kum 2005 daih tawha tihchhuah kha niin, naupang atanga puitling thlenga kan tuipui theih tur hla eng emaw zat a ti chhuak hman a. He’ng a hla hit thenkhatte hi tunhnaiah rawn tuai thar lehin album pakhatah dah khawm a tum — Liandingpuii’n ‘Project Siamtharlehna’ tiin album tihchhuah a tum.

A project lo pian chhuah dan sawiin Dingpuii chuan, “Nikum kum tawp lam atang khan zai chhuah leh hi ka rilruah a lian em em a, album thar han siam leh tawp ka huphurh angreng a,” tia sawiin, “Ka ngaihtuahnaa lo lut ta chu album hluia hla thenkhatte Pathianin a lo hman em em tawh, tun thleng pawha a la hman te, thlarau thianghlim hriak thih hla te ka ti mai a, ngaithla leh duhtute tan pawha awm remchang mai tawh loa, han riral mai atan ka ui si a,” a ti a. Eng emaw kawng zawng taka Pathian hmanleh atan mite atana malsawmna a nih chhunzawm lehzel theihna’na chhawpchhuah ni thei se tih chu a duhthusam leh a tawngtaina a nih thu a sawi bawk.

Tunhmaa a album tihchhuahte khan studio album deuh vek an ni a. Mahse, tun tuma a rawn ‘comeback’ a tumna hi live-session video album tia sawi theih tur chi a ni dawn a. A live concert chu video-a siam hnuah, DVD-ah chantira hralh chhuah tur anga buaipui a ni a. Leitlang Pictures lamin video hi an buaipui ang.

“Homecoming anga tih ka chak viau a; mahse, chutiang em em lo deuha tih chu rilruah a lo lang zel a. Live concert video record in siam ta ila, chu chu DVD in hralh chhuak ta ila, tih ngaihtuahna a awm a ni,” tiin Dingpuii chuan a sawi a.

Liandingpuii chuan, “Kan nupa mai chuan kan zual lo a, kan ti thei dawn bawk lo tih kan hria. Kan thianthate min ngaihtuahpui turin kan sawm ta a. Mavuana, Tekawka leh Henry Varte te an ni mai. Kan tlemnain an ngaihtuah zung zung a, kan awlsam zawk phah hial,” a ti a. “Project Siamtharlehna hi mitin mamawh a ni a, mimal chhungkua, khawtlang, kohhran, kan ram… kan vaia siamtharlehna kan chan theihna’n he project hi ka hlan a ni,” a ti bawk.

Dingpuii Live album thar turah hian zaithiam hrang hrangin an pui dawn a. Duet pui turin guest artist eng emaw zat a sawm bakah, Leprosy Mission Choir nen hla pahnih an sa dun dawn bawk a ni.

Kum 2001-a a debut album — Thiamchanna Kraws — atangin hla panga (5) a thlang chhuak a. Kum 2002-a a album pahnihna ‘hit’ zet mai — Siamtharlehna — atangin hla pali (4) a thur a, a sap hla album — Safe In You (2005) — atang chuan hla pahnih thlangin, medley pakhat leh hla thar pahnihte chu musician te nen an zir a. A hla thlan chhuahte hming hi a la sawi lang chiah lo thung.

Project Siamtharlehna live music video album release hun tur tak hi a la sawi chiang thei lo a; mahse, kumin September thla hnu lam erawh a kai a rinawm loh a. Tuna a sawi theih awmchhun chu, “Sawi thiam a har, October thla chu a nih ngei ka ring,” tih hi a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?