Lipstick – Dr. ARV Pillai (Ayush)

Lipstick, Lip balm, lip gloss, lip crayon, Lip liner leh hetiang lam chi hrang hrang te hi khawvel puma hmeichhiaten an hmang nasa ta hle a. Egypt (Aigupta) ram hi an hman hmasakna ber a ni a. Tunlaia lipstick kan hmuh ang chi deuh, a khal deuh chi hi mi pakhat – ABU AL -QUASIM-a an tih, Zharawi-a mi siam chhuah a ni. A tirah chuan henna emaw rannung rawt sawm emaw chu hmui tihsen nan an hmang thin a ni. Queen Elizabeth-i khan a rawn hmang uar ta hle a. A hmui sen vam ham mai chu a hunlai kha chuan a mawiin a mak dangdai em em reng a ni.

Lipstick kan lei hian a siamtu company te, a rawng te leh a chang chuan a rim te kan hre thei a. A siamna atana an hman hi hriat a tha khawp mai. A chhan chu a chang chuan ngeih lo hi an awm ve zauh zauh thin a. Allergy kan tih mai – hmui rep thut te, hmui ro te, hmui rawnga dum emaw a hring emaw te a awm thin a ni. Hmui rawng danglam bakah hian hmui thak phah vak te pawh an awm thin a. Lipstick chungchangah hian research nasa taka tih a ni tawh a. Dr. Elizabeth Ayoub, MD, oncologist, USA-a mi chuan heng product thenkhat zinga mi lip gloss leh lip conditioner ah te hian cancer thlen thei – lead, carmine, lake dye leh aluminium te a awm niin a sawi a. Hengte hian hmui a tidum a, a tiroin a vung vak thei a. A hnuah taksa dangah a kai chhawng ta thin a ni. Heng USA siam chhuah brand thenkhatah hian cancer thlen thei a awm niin an sawi : 1. READ EARTH (Lip gloss); 2. CHAMEL (Lip Conditioner); 3. MARK AMERICA MOTIVES LIPSTICK leh 4. AVON
Hengte hi hmui lam chei nana an hman thin siamnaa an hman tlangpui te chu a ni:
a) Wax: Wax chi thum hman thin a ni a. khuai bu atanga lak te, candelilla wax leh carnuba wax (thlai leh hnim lam chi atnaga lak) te an ni.
b) Oil: Oil (tel) hi a titletu atan leh tilang fim reltu atan an hmang thin a. Castor tel te, thlai atanga siam tel chi hrang hrang te, lanolin leh mineral oil te hi An hmang thin a. Coco butter hi heng tel te nen hian hman kawp thin a ni. Oil leh wax te hi hmui hnawih siamna thil tangkai tak an ni a, product a 60% vel lai a ni pha a ni.
c) Pigments leh dyes: Rawng chi hrang siam nan an hmang thin a. An chemical hman thenkhatte chu – bismuth chloride, manganese violet, titanium dioxide, D+C red 6, 21, 34, D&C orange 17 adt an ni. Hengte hi hnim lam emaw chemical chawhpawlha siam thin a ni.
d) Alcohol leh fragrance: Alcohol hi wax leh fragrance (rimtui) tihzawp nana hman thin a ni.
e) Preservatives and Antioxidants: A that reina leh a chhiat vat loh nana vawng thatute an ni.
f) Pearl essence: hei hi tuikeplung kawr atanga siam a ni.
g) Thil dangte: Silica, mica, vit E, shea butter leh aloe vera te hi hman tel thin a ni.
h) Natural ingredients: Jojoba tel, chamomile tel, leh organic pigments- heng, aieng leh bul uih te pawh hi hman fo an ni.
Tunah chuan lipstick a thil hlauhawm leh tha lo te lo thlur bing dawn ila.

University of California, Berkeley-a mite chuan hmui chei nana hman thinhoah hian heavy metals an tih mai an hmu tel a. Heng bakah hian metal lam chi, chi hrang panga an hmu tel bawk a. Hengte hian cancer an thlen theih mai bakah hmui thak, hormone in balance lo, hmui sa hut hut , hmui ro, hmui na leh vun natna, leh inthlahchhawnna lam atana thil pawi tak te an thlen thei a ni.
Lead: Hei hi soft toxic metal an tih a ni a, thil hlauhawm tak a ni. Kan taksaa a luh palh chuan kan taksa chhunga metal leh mineral tangkai te anga langin, proteins leh molecule dang dangte nen inbehbawmin taksa tana pawi leh tha lo tak a thlen thei a ni.

Lip gloss te hi a mawm chi an ni a, lip stain te hi a tui chi a ni a. Hmuia hnawih a nih hnu lawkah a ro a, a rawng hun rei tak hmui ah a bet ta thin a ni. Rawng duk lampang siam nan chuan dye leh pigment chi hrang hrang an hmang thin a ni.

Permanent lipstick: Hmuiah rawng sen tattoo angin an chhut kai tir thin a ni. Hei hi a that lohna chu a hnuah hmui rawng hi a hring ah a inthlak thei a. Tireh tur chuan laser treatment lak hial a ngai thin.

Hmui hi chi hrang pali(4) ah a then theih a- Hmui pangai, hmui lian, hmui te leh hmui phek deuh tihte hian mithiamte chuan an then hrang a. Hmui thenkhat chu a ro a, thenkhat a hnawng a. Hmui lian deuhte chu an duh chuan plastic surgery (Lip reduction surgery) hmanga tihtet theih a ni a. Lipstick hi hmui awm dan leh pian hmang atanga en a, uluk taka hnawih tur thlan thiam a tul hle.

Korean serial leh movie te kan en nasa em em a, hei hi a chhan ni ber a lang chu a changtute hmelthat vang kan ti thei awm e. An vun nalh tak te, an thawmhnaw inbel mawi tak te, an chena chhehvel fai tak mai te hian mi a hip em em a ni. Korean ho chuan an hmuiah rawng dal lam an inhnawih uar hle a. Hollywood milar Kristen Stewart te, Bollywood lama Aishwarya Rai, Vidhya Balan, Deepika Padukone, Sonali Bendre leh Princess Kate te pawhin hmui rawng dang(dal) lam hi an lo inhnawih ve fo a ni. Hetiang hmui rawng hian engang pawha incheia inmil thei vek a ni. I hmel a tha thei ang bera a lan theih nan chuan thil 5 hriat reng tur a awm a. Chungte chu (i) Liquid Foundation inhnawih (ii) Eye shadow rawng dal lampang inhnawih (iii) Eye liner, rawng dal lam sin taka hnawih (iv) lipstick rawng dal lampang inhnawih (v) biang ah blusher sen no lampang inhawih.
Thil thenkhat hriat tur pawimawh te :
I lipstick hmanin i hmui a tihduk chuan, hmang tawh suh.
Saffron leh butter chawhpawlh a, hmuia hnawih tur.
Limbu kawr ah chi tlem phul a, hmuiah tah tur a ni. Hei hian hmui duk a tireh ve thei a ni.
Mei zuk loh tur a ni a, ni khatah tui no riat(8) tal in thin ang che.
Rose water, bawnghnute khar leh limbu tui (far 3 vel) chawhpawlh a, hmuiah nitin vawi thum regular taka hnawih thin a tha.
Petroleum jelly, SPF awm ngei hman hian hmui ro a tireh thei.
Lipstick inhnawih hmain lip balm hnawih thin tur a ni.
Khawizu thirfiante khat leh rose water te chawhpawlh a, hmuia hnawih thin hian hmui a ti nemin a ti lang mawi thei.
Coco butter thirfiante khat leh khawizu thirfian khat chawhpawlh la. Chhuan lum a, a daih leh hnuah brush hmanga hmuia hnawih mai tur a ni.

Olive oil leh vasaline chawhpawlh ni khatah vawi 3 vawi 4 vel hmuia hnawih a tha.
Khawizu leh bawnghnute phut inchawhpawlh hian hmui a ti nem in a ti no thei.
Rose par den sawm leh khawizu thirfian khat chawhpawlh a, minute 10 atanga 15 chhung chiah tur a ni a, a hnuah sil fai emaw hruk fai mai tur a ni.
Khawizu leh bawnghnute phut chawhpawlh pawh hmui a senno chek nan a tha hle.
Hmuiah lipstick vel hnawih hmaa petroleum jelly balm hnawih hmasak hian allergy eng emaw chen a veng thei a ni.
I hmui a ro lutuk chuan, puan huha hmui hruk phawt a, chumi hnua lip balm hnawih chauh tur a ni.
I lipstick lei turah lead a awm nge awm lo enchhinna awlsam tak a awm a. I kutah i lipstick lei tur kha han tat zeuh la, zungbun rangkachak I bun lai khan han tuai zeuh teh. I zungbun a lo dum chuan I lipstick lei tur ah khan lead a awm tihna a ni a. Lei, miah suh ang che.

Naupang khawih phakah lipstick hi dah loh tur a ni a. Nau awmtu te leh nuten kan ven uluk an ngai hle a ni. Lipstick i leiin rawng thim leh duk lam thlan vak loh a him ber. Hengah hian cancer thlen thei leh thil hlauhawm dangte a tam bik thin a ni. Hmelthat hi tupawhin kan duh a; amaherawhchu, kan hrisel loh phah chuan awmzia engmah a awm dawn lo a ni. Sap ho inchei dan te kan nitin nunah kan entawn nasat em em lai hian kan inhmeh loh zawng chu entawn lo ngam ila. Hmelthatna leh hmangaihna hi thil kalkawp tlat a ni a. Kan nih ang anga kan hmelthatna hi heng chemical hman vanga hmel that ai chuan a tlo zawk a, mit an la zawk fe bawk a ni. Mi, hmel tha tak kan hmuh chuan hmuh nuam kan tiin kan thlir zui vawng vawng thin a, ‘Ekhai! A va hmeltha tehlul em,’ kan ti lo thei thin lo a nih hi.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?