Mamit khawpuiah ni 1-ah zuk leh hmuam manah Rs 80,000 chuang seng ral

Aizawl: Mamit Venghlun Branch YMA Kumpuan sub-committee chuan YMA kumpuan ‘Ram leh Hnam Humhalh’ bawhzuina chi khat atan Mamit khawpui chhunga tul lova sum hman ral zat a zirchiang a, zirnaa a lan danin zuk leh hmuam atan ni khatah khaw chhung mipuiten Rs 80,000 chuang an sengral.

YMA kumpuan ‘Ram leh hnam humhalh’ bawhzuinan hian Venghlun Branch YMA chuan an khawpui chhunga tul vak lova sum luangral zat tlangpui hriat tha tiin hemi atan hian zuk leh hmuam (kuhva, meizial, tuibur, sahdah) a mipuiten ni tina sum an sen ral zat hre turin survey neih an rel ta a. Survey hi kumin May leh June thla khan neiin form siamsa kengin committe member te veng hrang hrangah zirchianna neiin an chhuak a ni.

Survey-ah hian zuk leh hmuam zuartute, an ni tin inhralh zat tlangpui zawt chhuakin a dik thei ang berin zirchianna hi kalpui niin Venghlun YMA hruaitute chuan an sawi a. Zirchianna hi dawrah chauh neih niin mahni inlama zuar leh siamte a huam tel lo a ni. Senso hi ni 1-ah Rs 88930 angin chhut a ni a, thlakhatah ni 25 hralh chhuak ta se mipuite sum hman ral chu Rs 2,223,250 zet a tling niin an tarlang bawk.

Venghlun YMA hruaitute chuan an zirchianna chu tul lova sum luangral nasa lutuk mipuiin an hriat theih nan leh sum hman leh enkawl kawnga mipuiten hma an sawn theih nana tih a nih thu an sawi a. Hriselna kawnga a nghawng pawi tak awm thin venna atana a tangkai dawn thu an sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?