Mi changkang Nih i duh em?- Lalchhandama Colney

Zuk leh hmuam: Tun hma kha chuan a that lohna em em hriat a la ni lo a, chuvang chuan kan hmang deuh fur hlawm thin a ni. Tun hnuah erawh natna hlauhawm tak – Cancer, thlen thintu a ni tih mi thiamten an hre chhuak ta. Cancer mai bakah natna chi hrang tam tak pawh a thlen thei a ni. Vaihlo han tih hian – cigarette, sahdah, khaini, gutkha product, etc. te a huam vek a, kuhva kan tih pawh hi vaihlo a tel ve lo na a, hriselna atana tha lo tak, cancer hial pawh thlen thei tho a ni. Hetiang a nih avang hian khawvel hian a do a, ram changkang apiangah chuan a ti mi an tlem a, changkang lovah erawh an uar duh hle. Keini ramah pawh sawrkarin hma nasa takin a la zel a, puipunna hmun reng rengah chuan mei zuk a khap ve ta hmiah a ni, a zu lui chu man tur an lo ni ta nghe nghe a ni. Han kal kual vel ta la, i kalna apiangah ‘Meizuk phal loh a ni,’ tih i hmu zel ang. Thil tha lo tak a ni tih miin an hre tawh a, chutih laia mei lo zuk, tuibur, sahdah, khaini, gutkha, kuhva tih vel lo tih thin kha chu a ropui lo riau tawh a ni. A ti lo mi i nih theih chuan sum i lo save ang a, mamawh a lo tlem ang a, intodelh riau dawn a ni, rei loteah mi changkang i lo ni mai dawn a ni.

Bawlhlhlawh: Faina hapta kan tia kum 10 ,chuang lai liam ta atang khan kan hmang ve thin a. A bul a ni a, a tirah sawtpui vak lo angin lang mah se, kan lo ngai pawimawh chho telh telh a. Central-ah Pu Modi-a a rawn sawrkar hnu phei chuan scheme lianpui angin a rawn siam ta a, tunah chuan India sawrkar policy ropui berte zingah a tel tawh a ni.

A ni tak a, India ram chu kan tawp hle a, khawthlangho phei chuan India ram chu ek in lianpui an tehkhin hial a ni. Balh hi a hrisel lo a, sapram kan tihhote pawh hi an sawi tel ve ziah thin chu, an faizia leh invawn thianghlimzia a ni. Kan ram pawh sawrkar leh pawl, mi thahnemngaite hmalakna a zarah tunah chuan kan fai ve ta fu mai, a lawmawm hle mai. Fai hi ram changkang zia a ni a, kan thil eina kawr, bur ruak, no, etc. leh zial bung, chinai, kuhva chhakna te a paihna chauh a kan paih thin khan hna ropui tak thawk, mi changkang kan lo ni reng a ni.

Chil leh zun: Sap thufing, “I chil lem la, i hnap ak rawh,” kum zabi 18-na hma lam kha chuan chil chhak mai mai that lohna leh pawina an la hre lo a, chil lem thin hi hriselna atan tha lo zawk turah khawvelin a la ngai a ni. Hun a lo kal zel a, kum 1900 hnu lam deuhah chuan chiang vak loin hmun thenkhatah chuan an khap ve a. Tichuan, kum zabi 20-na a lo her chhuah meuh chuan Influenza leh T.B theh darh thintu a ni tih an hre ta a. Heta tang hi chuan vantlang hmuna chil chhak chu an lo khap ve tan ta a, pawisa chawi hial an lo ti ta a ni. Keini ramah (India) pawh hian khapna dan chu a awm ve a, pawisa fine tur zat pawh Rs. 200 – 1000/- a ni awm e; mahse, ngaih pawimawh a hlawh lo hle. Chil kan han chhak hian hmun hnawng – Ni hmu vak loah phei chuan natna hrik hi kar ¾ laite pawh a dam thei a ni, an ti. Chil chhak hi a lo tha lo hle a, thil mawi lo takte pawh a ni. Zun ram thiar chungchang han sawi leh ta ila, a hmun lo a thiar chu mipa/hmeichhia tan pawh a nalh lo hle, hnam dang hmuhah phei chuan changkang lo ang reng hle.

Pathian (Ngaihsak rawh): History in en vang vang chuan ram chak leh changkang hmasa apiangte chu Kristiante an ni deuh zel a ni. U.K., U.S.A., etc. te in en chuan an ropuizia leh chakzia i hre thei ang. Pathian thua innghat tlat an ni a, America phei chuan an thupuiah “In God We Trust,” an ti hial a ni. Keini state hi han thlir ve ta ila, hmana hausa kan tih thinte kha vawiinah chuan an lo ni tawh mang lo. An sum hmuhnate a dik lo a, khawvel lamah an tlan a, an ral der tawh a ni. Tun hmaa mi thing, thawuih, kohhran thalaia inhmang, nulaten, “A fel lutuk, thiani nang nei rawh,” an intih thin te kha, vawiinah chuan mi pangngai chung lam an lo ni deuh fur hlawm tawh mai. Khatih laia inticham tak, zu, zial, etc. te nen a ti ham ham thinte kha chu tunah chuan hmuh tur pawh an awm mang tawh lo, a thente chu chawrche tete an ni hlawm. Pathian thu kan awih a, a tira a lo hrehawm deuh pawhin, a tawpah chuan an ding chhuak leh nge nge thin.

Mi changkang nih hi a nuam a, an bula awmte pawh a zangkhaiin a hahdam duh hle. Mi changkang han tih dawn hian kan tehna fung a inang lo thei hle ang, thenkhatin an tih kha heti lamah chuan an lo ti lo ve thei bawk a. Ngaihdan thenkhat atang chuan awmthei deuh te, hnathawhah pawh tlema sang ve deuh, officer han ni thei deuhte kha a lang thei awm e. Mahse, vawiinah chuan kan han sawi lan takte zawm thlap a, mahni invawng leh mi dangte tibuai ngai lo, intodelh ang chiho hi lar hup hup kher lo mah se, mi changkang an nihna lai hi a tam berin ka hria, eng nge i  hmuh ve dan le?

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?