Michael M Sailo live performance hmuh tur a awm thei dawn tawh lo!

Khawvel chu a inher dan ngaiin her liam vut vut mah se, live-a a perform lai chu kan hmu thei dawn ta lo. April ni 7, 2017 khan he khawvel hi a taksa chuan a chhuahsan a.

Hla phuah remkhawm thiam em em, songwriter ni bawk, Michael M Sailo chu accident avangin a thi. Kum 37-a upa a ni.
Rapper tia hriat ni mah se, Mizoram pawn lamah chuan ‘electro-rock progressive’ band — The Scavenger Project-ah band member a ni tih erawh hriat a hlawh lutuk lem lo. Mahse, Mizo tan chuan hai rual a ni hek lo.

Mi tam takin a hmingpum hi kan hre lo mai thei. November 16, 1979-ah Lalsanga Sailo (L) leh Nunthari Sailo fa pahnihna ni turin Aizawl Civil Hospital ah a piang a. He khawvel eng a hmuh atanga rei vak lohah — Michael Malsawmzela Sailo — tiin a hming an sa.

Mizoram khawpui ber Aizawl-ah November ni 16, 1979 khan a piang a. Michael hian Helen Lowry School, Aizawl-ah Nursery leh KG atangin zirna bul a tan a. A ni hian MA zir tura sponsorship a hmuh avangin, May 1986-ah Pune, Maharashtra-ah an chhuk a. Class 1 leh II hi Spicer Elementary School-ah zir lehin, kum 1988-ah Mizoram lamah rawn chuang chhuak lehin, a sikul kai tanna Helen Lowry School-ah let lehin Class IV a zawm a, kum 1994-ah Class X a zo.

Kum 1995-96-ah Lowry Memorial Junior College, Bangalore-ah Class XI-XII a zir a. Tichuan, kum 1997-ah Pune-ah zir chhunzawm lehin, kum 2003-ah Aizawl-ah lo a rawn chuang chhuak leh a ni.

Kum 2011-a a puala studio leh production house ‘Spaceville Pro Sessions’ a din hmain, a naupan lai atangin rimawi a ngaina a, a duhthusam ber pawh rimawi khawvela midangte tana kawng sialsak a, zaithiam leh musician te tanpui thei tu nih hi a ni.
Home studio a din hmain, kum 2003 khan Michael M Sailo hian sound engineer hna chu Zozam Audio-Visual Inc. ah kum thum chhung a thawk a. Kum 2008 khan, Mizorama radio channel hriat hlawh tak ni thin, FM Zoawi-ah chuan Radio Jockey (RJ) hna a thawk a ni. Mizorama Red FM (93.5) an rawn luhna’n pawha sulsutu pawimawh tak pakhat a ni.

Zaithiam B. Malsawmtluangi (SP-i) nen hian an inneih hmaa a tlangval lai atanga a thih ni thlengin, International Company hrang hrangte nen ‘agreement’ siamin, an zai (mobile phone ringtone) chu internet hmangin hralh chhuah a ni a. Nupui a neih hnuah pawh hlim takin an nupaa thawkdunin, an chhungkaw eizawnna ber pakhat a ni.

Kum 2008 khan, Michael leh Mizo musician hmingthang tak tak te nen chuan ‘The Scavenger Project’ an din a, he band hi Mizoram mai bakah, North East India ah band hriat hlawh tak a ni chho zui a. He band hian an rimawi chu ‘electro-rockgressive’ tiin an vuah a, electronic leh progressive rock, hip hop leh nu metal inchawhpawlh chu an rimawi a ni. An band hian show tam takah an perform a. Award dawn pawh an nei nual.

Thangthar Zo rimawi khawvelah chuan, Michael M Sailo hi hip-hop genre bikah chuan ‘pioneer’ zingah chhiar hmaih phal chi a ni lo a. Northeast India-ah pawh a hming hi lam zin pawl niin, hip-hop chawisangtu zingah an chhiar tel nghe nghe. Genre hrang hrang hi a bel viau a, a rap thiam a, a zaithiam a, dj, producer leh recording producer anih avangin ‘Versatile artist’ an tih zingah pawh hnamdang chuan an telh chiang hle. Kum 2017 thleng khan studio album pahnih chu a produce a ni.

Michael hian rimawi puala award siam eng emaw zat a dawng hman a. Chu’ng zingah chuan Lelte Award-ah Best Rapper award trophy a hawn tawh a, Rimawi Khawvel Award-ah pawh khan Best New Artist nihna pawh a dawng tawh. Artist chawrno zinga thenkhat, ‘production’ leh ‘collaboration’ a neihpui zingah top chart luah phak pawh an awm nual a ni.

Solo performer angin Michael hian a bik takin, metro city an tih, khawpui lian tak takah show ngaihhlut hlawh tam takah a perform tawh a, India rama pub hmingthang tak takah pawh perform tura sawm a hlawh hle. Mizoram piah lam, India ram hmarchhakah pawh fans a nei nual.

ENGNGE AN SAWI?
Ka ui takzet a. Heti maia min kalsan tur chuan ka ka phal thei lo a ni. Nizan hmasaah kan inbia a, ka haw hun a nghakhlel thu leh DJi nena hla kan sak ho turte a sawi a. A phur em em a. Hetia min boralsan leh si hi hriatthiam a har ka ti takzet a ni. A nupui fanau a enkawl dan ka hmuh hian pa tha tak a ni tih ka hmu chiang a, a nunah thil tak tak entawn tur ka hmu a ni. Mizo te’n kan hnam rohlu te zing ami kan chanah ka ngai. SANGTE KHUPTONG

Michael nen khan thiantha tak kan nia. Music piah lamah pawh mimal takin kan inkawmngeih em em a. Mite kha min rawn tlawh peih bawk a. Phone te hian chanchinte hi a rawn ngaihven em em thin kha nia. Min duhsaktu leh zai/music-a min kaihruaitu ka ti lo thei lo. Ka album ‘Damlai Par’ phei kha chu a kutchhuak kha a ni a. Recording kan tih lai te ka ngaihtuah hian ka lung hi a leng takzet. Kan han release a, khatiang khawpa hlawhtlinna kan hmuh a kan lawm dunzia te ka ngaihtuah hian, ka hnul hi a ulh. A thatna leh midangte a duhsak thinzia te leh kan thawhdun tawhna zawng zawngte ka ngaihtuah hian, ka ui takzet a ni. Zoram hian kan chan ropui khawp mai. SP-i leh a fate Pathianin awmpui se, a thlarau thlamuang takin chawl mawlh rawh se. MAMI VARTE

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?