Mihring hmanga sumdawnna case 22 ziak lut

Aizawl: Mizoram Police-te chuan kum 2000 atanga 2017 inkar chhung hian mihring hmanga sumdawnna (human trafficking) case 22 an ziaklut tawh a, mihring hmanga sumdawnna hi lehkha zir sang lo, mawl deuh leh hnam chekhnawk zingah a hluar deuh nia hriat a ni.

Mizoram Police, CID Crime Branch chhinchhiah danin kum 2000 atanga 2017 (he chanchin buatsaih lai) thleng hian human trafficking case hi 22 an ziak lut tawh a, hetah hian a tuartu (victim) 35 awmin hemi kaihhnawih ah hian mi 47 man an ni tawh a ni. Mizoram Police-te chuan human trafficking hi a hluar thar lem lo niin an sawi a, case chu awm thin mah se Mizoramah chuan he lam kawnga thawktu (tanpuitu) NGO leh helpline te an tam avangin hmun dang ai chuan a ziaawm niin Zalen an hrilh. Ram pawna hnathawhna chungchangah Singapore chu inenkawlna a that avangin a ziaawm tlangpui nia an hriat thu sawiin hmun dang – Malayasia, Saudi Arabia leh hmun danga thawh tum tan erawh chuan fimkhur a pawimawh niin an sawi bawk. Police-te chuan ram danga hnathawk tur hmuhsak thei nia insawi ‘placement agency’-te pawh kokhawmin fimkhur turin an hrilh tih an sawi a, tun dinhmunah placement agency hi Aizawl-ah 20 vel an awm nia an hriat thu an sawi bawk.

Tun hnai khan District Child Protection Unit (DCPU), Lawngtlai chuan thuchhuah siamin an district mai ni lo, district dangah pawh tun lai hian Human Trafficking a hluar hle nia sawiin mi tin fimkhur turin an ngen a. Hemi chungchangah hian Zalen palai chuan Lawngtlai district Child Welfare Committee chu a thil awm dan a zawt fiah a, CWC member pakhat chuan tun hnaiah case an nei neuh neuh nia sawiin a bikin hnam chekhnawk deuh zingah a hluar niin a sawi. Lawngtlai CWC member sawi danin tun hnai lawkah pawh an ditrict khawthlang lama cheng Chakma hmeichhe naupang kum 17 mi chu sum tawktarhin Singapore a awm turin mi thenkhatten an hruai a, an chhungte mangang chuan CWC punin Tahan a an awm laiin an hruai let leh niin a sawi a. Tahan an hruai thlen manah hian a hruaitute hian Rs. 4000/- an hlawh niin a sawi bawk. Hei mai bakah nikum khan Chakma leh Mawk hnam naupang 6-te chu Tezpur (Assam)-a Ashram-a awm turin hruai an ni a, an zinga hmeichhe naupangte chu Ashram neitu hian mipat hmeichhiatna hmangin a lo khawih hman niin a sawi a. Nikum chhung vek khan mobile zirtir tur anga insawiin Lawngtlai district khawthlang lama cheng Chakma naupang 2 chu hruai an ni a; mahse, thil dangah chhawr an ni daih a, a hnuah Delhi CWC leh Police-te nen tangkawpin an la chhuak leh niin a sawi bawk.

Tahan Mizo hruaitute pawhin ramdanga hnathawka chhuah chungchangah fimkhur a tul hle nia an hriat thu Zalen an hrilh a. Tun hnaiah pawh Singapore-a mi awmpui pakhat Mizo nula chu buaipuiin Mizoram lamah an rawn thawn thla niin a sawi a. A tlangpuiin Mizoram atanga kalten hrehawm an tuar thei lo tlangpui nia a hriat thu leh an rin ang a nih loh avangin an buai niin a sawi a. Hawn leh mai duh mah se an agent ten sum an lo sen nasat tawh avangin harsatna an tawk duh hle niin a sawi bawk.

Kum 2000 atanga 2017 inkar chhunga Mizoram police ten human trafficking case an ziahluh dan chu hetiang hi a ni:
Kum Cases Tuartu Man zat
2000 1 1 1
2001 2 1 4
2002 1 0 7
2003 0 0 0
2004 4 9 5
2005 4 4 6
2006 0 0 0
2007 0 0 0
2008 1 1 2
2009 1 1 1
2010 1 3 3
2011 3 6 10
2012 1 4 1
2013 0 0 0
2014 0 0 0
2015 0 0 0
2016 3 4 7
2017 0 0 0
Total 22 35 47

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?