MIPA SAZU FUK THA THEI LO HI

Hemi lam kaihhnawih hi zawhna ka dawng zauh zauh a, khaikhawm leh ta mai ila a remchang awm e. Mipa sazu fuk (Erection) hi thisen zam leh thisen vir vel bakah, thazam (nerve) lam hnathawh a innghat a ni a. Mihring hrisel pangngai ah chuan tisa chakna a lo chhuah hian thluakin signal a pe a, mipa sazu lamah thisen kal a tam a, chu chuan a rawn ti fuk ta mai thin a ni. Mipa sazu a fuk chuan sex hmang turin an inpeih tihna a ni. Chhan tam tak avangin he nihphung pangngai hi a buai thei a, chung te chu “Erectile Dysfunction (ED)” tiin an sawi a, chumi chungchang chu tuna kan sawi tum hi a ni.

Kan tarlan tak ang hian mipa sazu a thisen zam leh thisen kal vel hi a fuk theih nan a pawimawh hle tih kan sawi a. Thisen sang (Hypertension) vang te, thisen zam zim, a chhan tam ber pawh zunthlum te, taksa a thau tam vanga thisen zam bang vung leh chhah (atherosclerosis) te, thau tam vanga thisen zam banga betin a tih chhah te ani hlawm a. Zunthlum hian thisen zam a khawih piah lamah nerve lam hnathawh a ti buai nasa a, an nei duh zual hle a ni. Kum upa lam chuan kan sawi tak harsatna te kha an neih duh vangin ED hi an nei duh zual a, kum naupang lamah erawh chuan rilru lam fel lo, Depression, Anxiety Disorder, Stress nasa leh Zu in nasat/Meizuk nasat vang te in an nei duh thung a ni.

Thluak lam fel lo – Stroke (thluak thisen zam chat) te, Alzheimer’s Disease, Multiple Sclerosis, Parkinson’s Disease ang chi te hian ED hi a thlen duh hle (sawi fiah vek lo mai ila). Zunthlum (Diabetes) kan tih pawh hian Control tha lo te hian ED an nei duh zual a, chu bakah chuan Kal tha lo (Kidney Disease) nei te hian an nei duh viau bawk. Taksaa thau tam, a bikin Cholesterol tam lutuk te hian a thlen duh a, Thin lam fel lo, Cirrhosis nei te zingah a common hle bawk.

Chhan dang la awm leh thei te chu: inzai fuh loh palh vang te, Prostate Gland leh Phing fel lo nei ah te, intihpalh (injury) avang te, meizial, zu leh drugs khawih nasat vang te, thau lutuk (overweight) vang te leh, BP damdawi leh Anti-Depressant drugs thenkhat te hian a thlen duh hle bawk. Zu hian tam lem lovah chuan thisen kal a tih chak avangin sazu a ti fuk hma thei a, in tam lutuk erawh chuan harsatna a thlen chawk thung.

Engtia enkawl tur nge? – Hrisel tha pangngai, insawiselna hran nei lovah chuan a chhan tam ber chu hlauhthawn vang (anxiety) te, zan mut that loh, taksa sawizawi ngai lo, stress nei nasa, hnathawk hah lutuk te ani fo a. Chuvangin nitin nunphung khawsak dan tih danglamin a ziaawm duh hle. Mei zuk tih tlem (zuk loh theih a tha ber a) te, zu insum te, exercise regular a lak te hian tam tak chu a ti ziaawm thei a ni. Zunthlum leh/emaw thisen sang nei ah chuan control that a pawimawh hle a, thau lutuk/rit lutuk kan nih chuan exercise leh diet hmanga inenkawl that te a pawimawh bawk. Chhan hranpa nei lo leh, heng kan sawi te hmanga inenkawl chung pawha a la ziaawm loh chuan Psychiatrist pan te pawh a tha thei ang.

Upa lam, a bikin kum 50 chung lamah chuan Prostate check tir a pawimawh a, a than leh than loh hriat nan Ultrasound a entir a tul anga, a lo lian anih chuan enkawl te pawh a ngai ang (damdawi hmangin a enkawl theih ani). Kal (kidney) lam fel lohna a awm leh awm loh hriat nan Kidney Function Test leh Ultrasound bawk hi a pawimawh anga, Lipid Profile hmangin taksa ah thau tam dan en a tha bawk ang. Nerve lam tha lo anih chuan nerve damdawi ei te pawh a tul thei a, Spinal Cord lam fel loh vang a lo nih takin CT emaw MRI Spine te pawh tih a tul bawk thei ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?