Missionary hlawhtling Rev. Alwyn Roberts

 

August 15, 1958 khan Mizoram zirnain bung thar a kai a. Pu H.K. Bawichhuaka, Secretary Mizo District Council te, Pu Ingty, Deputy Commissioner te, Pu Pachhunga te leh mi thahnemngai thenkhatte hmalakna avangin Mizoram a college hmasa ber Aijal College (tuna Pachhunga University College hi) din a ni a. Missionary-te leh Mizo lehkhathiam hmasaten tlawmngaih chhuahin, hlawh nei loin zirtir hna an thawk a, chutianga harsa taka bul an lo tan chuan hma a sawn zel a, Mizoram a college hlun ber, graduate chher chhuak tam ber college a lo ni ta hial a ni.

Chung hun lai chuan high school chin bak Mizoramah a la zir theih loh a, college zawm tur tan chuan Mizoram pawn a chhuah a ngai a. Chutianga zirna sang zawk (higher education) mamawhna a nasat em em laia college dintute leh a thawktute inpekna ropui zia kha vawiin a thangtharte hian kan hriatpui a, anmahni pawh kan fak a, kan chawimawi a ngai khawp mai. College din tirh hian principal atan Bro. Godfrey, St. Paul’s high school dintu chu sawm a ni a, ani ho hian bul tan a ni a. Welsh Presbyterian missionary Rev. J.M Lloyd-a’n principal hna a thawk ve leh a. Ani hian kohhran enkawl hna leh theological college principal hna nen a kawp a. Pu Ingty leh Pu Bawichhuaka te nen an sawiho hnuah Rev. Llyod-a chuan college principal nghet tur Welsh presbyterian kohhranah a zu dil tawp mai a.

Mi thiam tak, University of Wales atanga LLB zir zo, Cambridge atanga MA zir chhuak Rev Alwyn Roberts chu Aizawla college ding tir te principal ni turin a lo chhuak ta a. Lehkhathiam tak, zirna hmun tha atanga zir chhuak, a lehkha zir laia scholarship dawng thin a ni a. Missionary-a a inpek hma hian Westminster college, Cambridge-ah tutor a ni nghe nghe. Welsh Presbyterian kohhran hnuaia pastor nih tuma a inpuahchah mek lai a ni a, “Thlaa lawn ka tum loh tluk zetin India rama lo kal hi ka tum ngai lo!” a ti hial.

Mahse, Mizoram a college ding tir tein principal nghet an mamawh thu a hria a, Zosapte leh tualchhung mi thenkhatin hlawh mumal nei loin zirtirna hna an thawk tih a hriat chuan a nupui hual Mair chu a hrilh a. Mair pawh chuan a lo hnial bik lo a. July 1960-ah an innei a, October thlaah Mizoram an rawn pan ta a. Mizorama lo luh phalna an nei thei lawk lo a, Silchar leh Halflong velah an tei kual hnuah November 1960 ah an lo lut ta a. A hna thar principal, Aijal College chu a zawm ta a. College tan thahnem a ngai hle a, a thawhpuite a kawmngeih a, thawhpui nuam ti lo an awm lo, zirlaite a ngaihtuah a, college hmasawnna atan a bei nasa hle bawk.

Pu Roberts-a hi missionary zingah chuan a mission a hlawhtling pawl tak a ni maithei. A thawhna college hi India ram puma college tha tehna NAAC acreditation A+ a ni a, tun hnai khan ISO certified college a ni bawk a. Kumin atangin PG course department pathum – Mizo department, Philosphy department leh Life Science-ah hawn a ni a. Kumin atang vek hian department thar BBA hawn a ni bawk. Karleh mai (August 15) khian kum 60 a tling dawn a, Diamond jubilee lawm turin an inpuahchah mek a. He college mai bakah Mizorama higher education hmasawn chhohna atan hian a bultumtu zinga mi a ni bawk. A hun laia zir chhuak zingah hian mithiam tak tak an awm nual a, central/state service a lut te, politician langsar tak tak te, kohhran hruaitute, sorkara mi pawimawh tak tak te an tel nawk bawk.

Sap ram atangin lehkhabu tangkai leh hlu tak tak a lakhawm a, hmarchhak biala college library changtlung ber pawla chhal ngam a ni hial thin a, bawrhsap Pu Ingty pawh khan lehkhabu hi a lakhawm tam hle bawk. Kan ram rohlu tling, library tha tak mai chu politics vanga hruaisual, mi mawl takten November 4,1981 a an hal ta mai kha tun thleng hian a pawizia kan hre tial tial a nih hi. Rev. Alwyn Roberts-a hi mi chak tak mai, hmala zung zung chi a ni a, Pu H.K.Bawichhuaka nen khan ni tin deuhthaw college chungchang an sawi dun thin a, ani kha college hmasawnna tura rilru seng nasa em em mai, theihtawp chhuaha hmala thin a lo ni bawk a. Pu J.Malsawma, Governing Board-a Joint Secretary hmasa ber chuan Pu Bawichhuaka hi ‘Father of the College’ tih a phu hle, a ti a. Mizo zinga he college principal hmasa ber Pu Saingenga pawhin “Father of the College tiin sawi ila, a phu ber awm e,” a ti bawk. District Council Chairman Pu H.K. Bawichhuaka leh Principal Rev. Alwyn Roberts-a te inkawp hian nasa takin college ding tir hi an chawi kang a ni

Rev. Roberts-a hian kum sarih chhung, November 1960 atanga September 1967 thleng principal hna a thawk a. A hun lai hian Assam University hnuaiah exam centre a ni a, ‘Added College’-ah hlan kai a ni a, chumi hnuah Assam sorkarin a la (provincialised) zui a. Principal a nih lai tho hian District Council-in college hmun tur ram zau tak a pe a, chu chu tuna college hmun hi a ni a, a hun lai bawk hian college tan Pu Pachhunga chhungten Rs 50,000 an pe nghe nghe. Hetih hunlai hian, missionary a ni bawk a, kohhran enkawlna lamah pawh a inhmang nasa hle a, theological college-ah pawh class a la thin niin Rev. J.M Lloyd-a’n a ziak nghe nghe.

Gauhati University hnuaia exam result-ah college zirlaiten an tihthat avangin BA zirna hawn pawh phalsak a ni a. College hmun tharah building sak a ni a, students’ union din a ni a, college kalphung pawh a mumal chho tial tial a, zirlaite pawh infiamna lam – hockey leh football-ah te an tel thin a, lawmman pawh an la fo a ni. College thil pawimawhah Assam sorkar a dawr fo a, sap ram zirna hmun tha chhuak a nih bakah mithiam a ni bawk a, an lo ngai pawimawh viau thin a ni.

Pa nelawm tak, thawhpui nuam, inla fekfawn lo chi a ni a. Amah hre pha ho chuan a kawngkal hi a kal chak thin zia an sawi lar hle. Pachhunga University College Golden Jubilee souvenir MEMORABILIA-ah pawh a thawhpui hluiten a inpekzia leh mi thiam, thawhpui nuam a nih zia ngaihnawm tak tak an ziak a. “Pa nelawm, fiamthu duh tak, a intihnelawm em thin avanga Rev. J.M. Lloyd-a paw’n a khak zauh zauh thin a ni,” tiin Prof. Darchhawna chuan a sawi. “Sap tawng thiam em em, awl te te a notes pawh pe thin, class-a a thiam lo ber pawl pawhin a English kha an hmaih miah bik loh a ni a, a fakawm hle a ni,” a ti. Cambridge chhuak, thiam theih avanga scholarship hmu a zir chhuak zak a ni a. Theology-ah MA niin Law lama degree nei a ni a. Mi thiam, rilru chak, dan hre mi, thangthar zawkte mila khawsa thiam, sikret pawh heh ve tak, tennis khel thiam tak a ni. Intih-Mizo tum tak, vawk sa pawh heh tum tak, ei thei lem lo, zawngtah mu pawh ei ve zel; mahse, a rim avanga kam thuah leh zut, hmarcha pawh ei ve vak mai, thak a tih em avanga ei zui peih ta lo kha a ni…tiin a thawhpui hlui Pu Darchhawna hian a ziak bawk.

Tlai tin Lawn Tennis khel thin a ni a, Pu Darchhawna hian a tia lawm, “Tlai khat chu, hmanhmawh zet hian class la turin, D.C. Office hnung lama Lawn Tennis Court atangin a rawn vung thla a. Class room-a a luh hma chiah hian ka va pawt ding a, “Kamis i ha lo” ka va ti a; Kamis ha lovin necktie hi a lo awrh hnuang mai chu niin. Ngawi rengin a let vut a, reiloteah a lo kir leh a, necktie phei chu a awrh leh ta chuang lo. A aiah class ka lo la tih a hmuh chuan, “Dara will continue to give lecture” a ti a, period pawh chu a ral chilh ve ta mai bawk a,” tiin.

Pu Saingenga pawhin qualified teacher tur Zorama an la van em em laia Mizoram Synod-in full time principal atan Rev. Alwyn Roberts-a, missionary, mithiam zet mai an chah chhuak hi a lawmawm a tih thu a ziak a. “Kohhranin College Principal atana hma min lakpuina khan rah tha a chhuah a, a hun chhungin harsatna tam tak karah hmasawnna tam tak kan hmu a, vawiin ni thleng hian ka la theihnghilh thei lo a ni. Pa dangdai tak, a thawhpuite ngaipawimawh zet a ni bawk a. A hote pawh min chhan viau thin. Vawi khat chu, Pu Darchhawna hi Election duty-in hlate khuaah Polling Officer turin DC-in thu a chhuah a. A dam sam si lo; kal loh a dil a. DC lamin an lo rem ti meuh si lo, a khawk hle mai. Chutah, Pu Robert-a a va kal a, DC chuan, “Niminah a dam, vawiinah a dam lo. Ka awih lo” a ti tlat mai a. Pu Robert-a’n a chhang a; “E…! Zinga ka hmuh tlaia thi ta pawh ka hria a sin” a ti ta khauh mai. Chutah zawng DC chu a hmin a, Pu Dara chu a awl thei ta a ni,” a ti bawk.

Zofate zirna lama kan tuihal em em lai, high school chung lam zirna kan mamawh em em laia engmah lo atanga college dintute an fakawm hle a. Chu college ding tir tein a mamawh em em mi thiam chungchuang, khawvel pum huapa zirna hmun tha ber pawla zir chhuak, rawngbawltu ropui tak Rev Alwyn Roberts a lo chhuak leh zel hi Pathian malsawmna a tih loh theih loh a, missionary a ni a, rawngbawlna rilru puin, kohhran enkawl chungin thahnemngai takin a thawk a. Mizorama higher education hmasawn chhohzia han hmuh hian he missionary hi a lo kal chhan ber a ‘mission’-ah a hlawhtling zui hle tih loh rual a ni lo.

A chanchin ngaihnawm tak dang pakhat chu rambuai hlim chhawn lai a mipui thlabar leh mangang thlamuantu a a tang kha a ni. Mizoramin hun thim ber a kal tlang lai a inpekna hi a rawngbawlpuite leh a hre phaten an fak hle. Nunau mangang te thlamuantu, India indo thlawhnain Aizawl khawpui a beih hlim a ruang hlawmtu leh hliam tuar leh mi mangangte buaipuitu a ni a. Synod Moderator a nih lai a ni a, a kaihhruaina hnuaiah rambuai tirhah ‘Aizawl citizen’s committee’ din a ni nghe nghe. Kan rama zirna sang (higher education) in hma a sawn chhoh mek laiin rambuai vangin loh theih loha Mizoram a chhuahsan a tul ta a ni.

August 1, 2018 a boral ta principal hlui thlah nan ti hian Pachhunga University College chuan thuchhuah an siam – Pachhunga University College-in Diamond Jubilee lawm tura kan inbuatsaih mek lai a ni a. Mizoram chhunga zirnain hma chhoh zelnaa bul tantu Rev. Alwyn Roberts boral ta hi Zofate tan channa nasa tak a ni Pachhunga University College-in tun dinhmun a thlen theihna tura theihtawp chhuaha hmalatu Rev. Alwyn Roberts hi kan ui tak zet a, a kalsan tak a chhungte Lalpan thlamuan rawh se.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?