MIZO HNAM MARTAR-TE Ruang & Politics

– Zosangliana (Zotea)
Mizo Hnam Martarte Ruang leh Mizoram Politics hi ril taka inthlunzawm tlat a ni. Indopui II-na ah khan khan USA President Franklin D. Roosevelt leh British Prime Minister Winston Churchill te chuan 1941 August thla khan Atlantic tuipuiah Indo lawnglianah thawhhona thuthlung “Atlantic Charter” an ziak a. Hemi zulzui hian ram 26 kalkhawmten 1942 January Ni 1-ah New Foundland-ah Atlantic Charter famkim zawk an siam leh a. Chu charter-ah chuan ram chaklo zawk hnehlak loh tur, hnam tinte mahnia rorelna neih a, duhthlanna leh zalenna neih, mi tinte thlamuang taka inbenbel theihna, ram tinte ei leh bara inpuihtawnna tha neih, mi tin anmahni ram theuha zalen taka khawsak theihna, mahni duhzawng sawi theihna zalenna leh sakhaw zalenna tih point 8-te a ni.

Tin, Atlantic Charter pawmtute sipai hi Allied Force tiha vuah an ni a. Allied Force lam tanga dopuitu ramte chu he indonaa hnehna Allied Force-in a chan chuan mahnia rorel theihna Independence emaw, duhthlan theihna (Self determination) an nei ang tih a ni bawk a ni.

UNO a piang ta: He Charter tinghet lehzual tur hian 1945 June 25-26-ah San Francisco USA-ah ram 50 aiawhte kalkhawm chuan United Nation Organisation (UNO) an din ta a. Poland-in aiawh tir lo mah se tel ve an dil angin telh an ni a. UNO member chu ram 51 an ni ta a ni. UNO din champha, Day of United Nation ni atan UNO Official-a function ni 24 October, 1945 chu hman a ni ta a ni.

Mizote tel vena: Hetih lai hian Mizoram (Lushai Hills) chu British Foreign Jurisdiction Act hmanga British Foreign Deptt.-in a awp a ni a, British-India-ah kan tel ve lova, Excluded Area tia hriat kan ni. Allied Force-a tel ve turin India pawhin kan ai an awh ve thei lo va, ram hrang daih kan ni si a, Mizo Lal leh Upa 300 te chuan Aizawl Bawrhsap McCall-a hmaah British Flag (Union Jack) kal hualin 1942 April ni 3 khan thutiam an la a, 1942 April ni 16-ah Lungleiah thutiam an la ve bawk a ni.

Indopui 2-naa Allied Force-ten hnehna an chan takah khan ram tam takin Independence an hmu nghal a, kan thenawm ram India, Burma leh Pakistan te pawhin Independence hi an hmu nghal a ni. Keini duhthlan dan pawh la thiam lo ramte chu British Prime Minsiter Winston Churchill-a chuan British Crown Colony hnuaia awm rih turte awm dan tur ruahman turin Oxfort University History Head of Department Sir Reginald Cooplan chuan a ruat a, mahse British inthlanah khan Winston Churchill-a chu Clement R.Adlee-an a hneh ta si a, Cooplan plan chu tihpuitlin a ni ta lo a ni.

Kum 1958 a rawn inherchhuak a, Mizoram chu kum 50 dana thleng thin, Mautam chuan a rawn tuam leh ta a. Zoram pum chu tamnain a tuam a, min awptu India sorkar lakah tanpuina an zu dil chuan, ‘Hmanlai pi/pu thawnthu mai mai’ an lo tihsan a, Pu Laldenga leh a thianten Mizo mipuite eng emaw ti tala tanpui dan a awm takin tiin Mizo National Famine Front an din ta a. Theihtawp chhuaha sorkar an nawrna avang chuan Tam tanpuina eng emaw chen chu an rawn siam ta a ni.

MNF a piang: Kum 1960 a lo herchhuah chuan Mizoram Tamna pawhin ziaawm lam a pan ve ta a, UNO chuan an member ramte chu an ram awpbeh theuh chhuah zalen turin thuchhuah, Decolonisation a puang ta a. UNO-in a chhinchhiah zinga ram 68 zinga 54-te chuan Independence an hmu nghal a, ram 14-te chu duhthlan theihna siamsak an nih angin, inhumhalhna tha (Protectorate) neia anmahni awptute hnuaia awm zui an thlang a ni.

Mizoram chu ram thlaler tak, chanchinbu pawhin a thlen phak lohna a la nih avangin BBC leh VOA te thupuan atangin Pu Laldenga ten UNO thupuan chu an lo hre ve a, Allied Force te thutiam anga Mizoram chu Independence emaw, duhthlang thei dinhmuna ding Allied Force-ah pawh sipai 4,000 leh Labour Corps-ah 3,000 thawkchhuak vein mi eng emaw zatin nunna pawh an chân nghe nghe a. Hetiang a lo nih takah chuan Pu Laldenga te chuan UNO beng thlen ve ngei theihna turin Mizo National Front (MNF) chu 1961 October ni 22-ah an din ta a, Zoram dung leh vangah Mizote dikna Independence chu an tlangaupui ta a, Mizo hnahthlak thalai tam takin MNF chu an thlawp a, hetih hunlaia College kal chin 80% zette chuan an thlawp bawk niin a lang a ni.

Kum 1966 a lo herchhuak ta a, India sorkar khan UNO thupuante kha a hre ve vek a, Pu Laldenga te thu tlangaupui kha an ngaimawh tan ta hle a, Pu Laldenga te khan India ram sorkar thuneitute an theih ang ang Mizoram dinhmun thua sawifelpui tumin an bia a, Prime Minister hnenah Memorandum pawh an thehlut ta nghe nghe a. Mahse, India sorkar chuan tum dang daih a nei tlat a. Sipai chakna hmanga man khawma hrenbeh veka Mizote dikna leh chanvo chu sawi thei lova hmehmih a tum a ni. Chutiang a ni tih chu Pu Laldenga te khan an lo hrethiam ve vek a, kut lukhima lo tuar ngawt chu Mizo ral hlenna tur a ni tih hriain MNF High Command chuan a ngai ta a. A theih ang angin ralthuamte an dapkhawm ve ta a. 1966 March ni 1 chuan Mizote dikna leh chanvo Independence chu Pu Laldenga chuan a puang ta a. Mizoram chu indonaah a lo lut ta a ni.

Chu indona avang chuan Mizo National Volunteers tam tak an thi a, nunau pawi sawiloten tuarna chhiar sen loh an tuar bawk a. Mizo National Volunteer-te chu inhrualmumin Mizo National Army tih an lo ni ta a. Indona chu Mizoram hmun tinah a thleng a, Mizo National Army leh MNF Underground sorkara thawk Civil mi tam tak kahhlum an ni a. Tuna chhinchhiah theih chinah Mizo Hnam tana Martar-te hi 1702 an ni a. Mahse, Mizoram pawna nunna chan tam tak an awm avangin hriat kim loh eng emaw zat an la awm tura rin a ni. Mizoram tana Martar-te ruang ram palailenga phumbo tak tam takte hi MNF thuthlung vuana Mizoram tana tha ber tur nia an hriat avanga nunna hlan tate kha an ni a. Mizo National Army hi NGO emaw, Kohhranin emaw a din a ni lo va, MNF din a ni. Mizoram zalenna tur atana MNF thuthlung vuana an neih hlu ber an nunna hlantu an ni a, MNF hian a ngaihtuahin an pualin Martar Thlanmual pawh a din a, an ruang pawh a theih ang angin a la khawm zel dawn tih MNF President Pu Zoramthanga’n a sawi a, Politics hamthatna MNF-in a chan phah pawhin a awm reng a, tuar ngaihna a awm pawhin a tur reng a ni tho a ni. Tumah mawhpuh leh mawhphur tur chuang an awm lo. Khawi Political Party emaw, NGO emaw te mawhphurha dah theih a ni lo a ni.

Tuten emaw ni, “MNF-ho chuan ruhro an buaipui a, Martar-te ruhro Politics khelh nan an hmang.” Mizo Martar-te ruang hi Mizoram mipui zawng zawngte tana tuartute ruang a ni a, engamaha ngai lote tan pawh an tuar tho a, chutiang bawkin MNF thuthlung vuana rinawm taka thawktute ruang a ni a, MNF chuan a ngaihthah thiang lo va, Politics thupui berah an Martar-te hi an hmang a nih pawhin a awm reng a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?