Mizo Inneih, Inthen & Rokhawm Dan 2014 Siam thuai a va tul em!

– B. Sangkhumi
Ex-President, MHIP Gen. Headquarters

The Mizo Marriage, Divorce and Inheritance of Property Act 2014’ Mizoram Legislative Assembly-in dt 12 th November 2014-a lungrual taka a passed chu kum 2 lai kan lo hmang ta der mai. He Dan hi “Mizo Hmeichhiate Kawlpui Bun khen thlawnna Tulung” tia vuah tlak khawpin hmasang kan pi leh pute atanga hmeichhiate ‘Kawl bun’ chi hrang hrang, khen thlawnna a ni. Chutih rualin he Dan hi Mizo hmeichhiate dinhmun siam thatna chauh ni lovin Mizo Society pum siam thatna hnukpui a ni.
Mizo Hnam Danah hmeichhiain ‘Rokhawm’ theihna a nei lo. Kum 1956-ah Mizo District Council-in India Constitution-a Sixth Scheduled hnuaia a thuneihna hmanga ‘Thurochhiah’ a awm chuan hmeichhiate ro khawm ve theihna dana siam pawh chu a taka hman dawn chuan buaina a chhuak duh hle. Tin, ‘Nupa inthen’ thulhah hmeichhiain an inneiha a chhawmluh bak an nupaa an thawh chhuah dunah chanvo engmah a nei lo. Chubakah ‘Dan naranin nupui vuakin lei a kuai lo’ tih a nih avangin mipain a nupui chu a duh a makin a vuain a sawisa thiang tlat a ni. Heng hi kan pi leh pute hun atanga “Mizo hmeichhiate Kawlpui bun” chu a ni. Mahse, Hnam Dan a nih avangin hmeichhiate dinhmun ‘siam that tul’ ti emaw, ‘siam that duh’ emaw chu hmeichhiate vek pawhin ‘ti lutuk’-ah an ngai tlat thin. Hetiang hi Mizo hmeichhiate rilru sukthlek a ni tih ka han hriat chian atang hian ‘Mizo hmeichhiate Kawlpui Bun phelh tura hmalak’ chu tihmakmawh ka chunga tla niin ka hre ta tlat mai a. Chuvangin, kum 1995-a MHIP Gen. Hqrs-in Ex Com member atana min ruat vawi 3-na (a hmain vawi 2 ka lo pha tawh a) chu pawmin MHIP Gen. Hqrs chu ka zawm ve ta a, heta tang hian O.B. post hrang hrang bakah President post term 3 (thum) lai ka chelh ve ta a ni.

Kan Mizo Hnam Danah heti khawpa Hmeichhiate chanvo nei lo leh dawnga a dah avang hian hmeichhia ‘Mak chhiat tawk’ emaw ‘Pasal sun’ emaw chuan a fate nen an intun nunna atan Veng kilkhawrah mi in luahin zu an zuar a, drugs leh mahni thlengin an inzuar ta thin a, an fate pawh zu leh drugs khawih chhiat an ni ta thin a ni. Tuna Mizo Inneih, Inthen leh Rokhawm Dan 2014 -ah hian ‘Nupa inthen’-in hmeichhiain an nupaa an thawhchhuah dunah ‘chanvo’ a nei ve tawh a (Hmeichhia uire avanga Mak pawhin 25% a chang thei). Hei hian nupa inthen a tihtlem phah hle tura ngaih a ni. Hmeichhia pasal sun, mahni ina kir leh pawhin a nu leh pa ‘Ro’-ah chan a nei ve tawh a ni. Tichuan, hmeithai retheih luat vanga zu leh ruihhlo zuara mahni inzuar tel ta thinte an tlem tial tial ang a, hun lokal zelah he Dan hi ‘Mizo Society pum pui siam thatna hnukpui’ a nih zia alang chhuak dawn a ni.

Kum 1980-ah sawrkarin Mizo Hnam Dan ennawn tur leh a tul anga siam that ngai siam tha tura “Mizo Customary Law Committee” a dinah khan MHIP baka hmeichhe aiawh tura ruatah khan ka tel ve a. He Committee-in kum 25 zet a buaipui ‘Mizo Hnam Dan’ a duanchhuah chu Legislative Assembly-in a pass a ngaih thu leh Assembly-in Hnam Dan (Customery Laws) a khawih ngai loh thu hriat a ni ta tlat mai a. Chuvangin, MHIP chuan India hmeichhiate tan an tih angin DAN hmanga Mizo Hmeichhiate humhalhna turin theihtawpin hma a la ta a ni. Hemi hma hian MHIP chuan kum 1997-2011 (kum 14) chhung a zawnin MHIP KUMPUAN atan “Women Empowerment” thupui a hmang a, Mizoram pumah Awareness Campaign neih thin a ni. Khua/veng tinah ‘Hmeichhiate dikna humhalh tulna thuziak’ tar a ni. Kum 2005 December 16-ah “Women Empowerment” thupui hmangin Synod Conference Centre, Aizawlah ‘WORKSHOP’’ buatsaih a ni a, Mizoram puma MHIP hruaitu zawng zawngte, political party leh Kohhran pawl hrang hranga Hmeichhe aiawhte leh NGO lian hruaitute ko khawmin Lawyer leh Advocate ten an buatsaih heng Draft Bill 3 (pahum) hi anmahni kaihhruainain zirho a ni.

1. The Mizo Christian Marriage Bill 2006. (Draft)
2. The Mizo Divorce Bill 2006 (Draft)
3. The Mizo Inheritance and Succession Bill 2006 (Draft)

Heng Draft Bill 3 hi June 1, 2006-ah Law Department-ah thehluh a ni a. Mahsela ‘The Mizo Divorce Bill 2006’ chauh chu Cabinet-in pawmin “The Mizo Divorce Ordinance 2008,” chu dt 4th October 2008-ah tihchhuah a ni ta a. MHIP chuan he ‘Divorce Ordinance’ hi Mizoram hmun hrang hrangah uar takin a lawmna a siam a ni. Hmeichhiaten hetiang tak maiin an Hamthatna Dan hi an ngaihlu tih hriain kum 2008 tawp lama Ministry thar lo piang chuan Law Commission dinin MHIP in Draft Bill 3 a thehluh chu pakhatah khaikhawmin ‘The Mizo Marriage, Divorce and Inheritance of Property Bill 2014’ tia a dah leh “The Lushai Hills District (Village Council Amendment) Bill 2014 chu Legislative Assembly-in dt 12th November 2014 -ah a rualin a passed ta rup mai a nih kha.

Amaherawhchu, Dan siam reng reng a tirah a famkim thei lo an tih angin‘The Mizo Marriage, Divorce and Inheritance of Property Act 2014’-ah pawh hian siamthat ngai tlem tlem a awm a, chumi zinga siamthat hmanhmawh tulzual nia langte lo atarlang ila:
(1) Chapter VI – No.25: “Hmeichhiain Sum a chhuah chuan ama bungrua bak a chang thei lo vang. Mahsela a sum chhuah chhan chu a pasal sual/ler/rilru buai vang a nih chuan an thawh chhuah dunah chanvo a nei ang tih a ni a, mahse ‘a chanvo neih zat tur/neih dan tur’ ziak a ni lo. Chuvangin, ‘Hmeichhe chanvo tur’ hi ziak chian nise. (Mipain a nupui mak chhan azirin an thawhchhuah dun insem dan tur chiang tak a ziak a ni ang hian).

(2) Chapter VIII-No.31 (1): ‘Thurochhiah’ a awm loh chuan pa ber thih hnuah a nupui chu a fate enkawla rinawm taka a awm chuan ‘Chhungkaw Lu ber’ a ni ang a, a fate an puitlin hnu erawh chuan ‘Chhungkaw lu ber’ ni chhun zawm tur chuan a fate hnen atangin ‘No objection’ (an remtihna) lak a ngai ta hi thil dik ber niin a lang lo. Nu ber, a fate kurpui a an tet lai zawnga Chhungkaw Lu ber ni thinin a fate an puitlin hnua ‘an remtihna lak’ a ngai ta tlat hi ‘NU’ tan chuan a na lua e. Chuvangin ‘No objection’ lak ngai hi thai bo ngei ni rawh se.

Mizo Society siam that duh avanga heng Dan meuh siamtute hian a tul anga siam that leh hi an harsat lo vang tih ring ila. ‘The Protection of Women from Domestic Violence Act 2005’ India Parliament-in a passed hlim khan Mizoram chu he Dan hmang hmasa ber state ni tura MHIP-in Mizoram sawrkar kan nawr chu kum 2007 atangin hman theih a ni ta a nih kha. ‘The Mizo Marriage, Divorce and Inheritance of Property Act 2014’-a siam that ngai tlem tlem awm avanga he Dan Ropui takin sawi nep a hlawh leh hmeichhiate an lawm tur anga an la lawm kim thei lo hian he Danin a tum tak hi a la famkim lo tih a tilang chiang awm e. Chuvangin, MHIP bawk hian he Dan hi Mizo hmeichhiate dinhmun siam thatna chauh ni lovin, Mizo Society pum siam thatna hnukpui a ni tih hriain ‘Siam that ngai tlem tlem’ awm hi a rang thei ang ber a siam that a nih theih nan hmalak a tul tak meuh a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?