Mizo tawng ATM a hlawhtling: MC Apex

Aizawl: Mizoram Cooperative Apex Bank (MCAB) Chairman, T. Lalmuanpuii chuan nikum atanga hman tan Mizo tawng ATM an hman mek chu a hlawhtling hle niin Zalen a hrilh.

MCAB Chairman, T. Lalmuanpuii chuan Mizo tawng ATM chu beisei phak bakin mipuiten an hlut tih sawiin, “Tawng dang hmang ATM a pawisa lachhuak ngam lo mipui an tam a, Apex Bank ATM ah chuan Mizo tawng a ni a, mipui an mikhual lo a ni,” tiin a sawi.

Apex Bank ATM Mizo tawng hmang hi Aizawl chhungah New Secretariat Complex, New Market leh Treasury Square Main Branch-ah te dah a ni a, Head Office Tuikual South leh Vaivakawn-ah te dah belh tum mek niin MCAB Chairman chuan a sawi a. Aizawl pawnah chuan Lunglei leh Saihaah thleng fel tawhin fit mai tawh tur a ni a, Champhaiah hmun hnihah awm bawkin Mizoram hmun hrang hrangah tunah hian dah tura hmalak mek a nih thu a sawi bawk.

MCAB Chairman chuan ATM-a Mizo tawng dah tur chuan National Payments Corporation of India (NPCI)-ah dil a ngai a, chu chu dil niin Mizo leh English inkawp ni turin nikumah phalna an rawn pe ta niin a sawi a. He hmalakna hi Mizo mipuite bakah India ram chhung leh ram pawn lam thleng pawhin hluttu an tam thu sawiin he hmalakna avanga an lawm thu leh tha an tih thu mi tam takin an rawn thawn niin a sawi bawk.

Mizo tawng ATM chuan Mizo mipuite tan bank-a sum khawl a tih awlsam phah dawn thu sawiin T. Lalmuanpuii chuan, “Mipuiten an thingrem mawnga pawisa dah mai lovin, bank a khawl a nih theih nan leh awlsam taka lak chhuah a nih theih nan mipui rawngbawlna atan tiin theihtawp kan chhuah a ni,” tiin Zalen a hrilh a. Mizo mipui te chu duh hun huna mahni tawnga sum lakchhuah theih a nih dawn avangin bank-a sum khawl ngai pawimawh turin a sawm bawk a ni.

MCAB Chairman chuan an bank chu Mizorama mahni puala Data Centre nei awmchhun a ni tih sawiin Nagpur lam nen engtik lai pawhin an inzawm thu a sawi a. Khuarel chhiatna hrang hrang pawh thleng se mipui te bank data chu awlsam taka reprint leh theih mai a nih avangin Mizoram Cooperative Apex Bank-a pawisa dah chu a him hle niin a sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?