Mizo Thalaite thinlungah LALNUNSANGA a sang reng!

Dawhsan (stage) a rawn pan rual chuan zirlai sang tel rual chu Hall khawk rum rum khawpin an au nghal a; microphone a la a, a awthian thawm ringawt pawh chu kut beng leh au thawmin a zui nghal. A hla hit ‘Di Hlui’ tih a han sa chiah mai chu mipui an ding satliah lo, stage an pankhawm a, an su dual dual a, a zai zawm karah te thawm leh au thawm nen an ri hluah hluah mai. Hetiang taka lawm hlawh hi tudang ni lovin, Lalnunsanga, T. Melody ngei kha a nih vang a ni.

Mizorama college lian leh changtlung bera ngaih, Pachhunga University College chuan Zirtawpni khan kum thum dana an neih thin ‘College Cultural Day’ chu an College Auditorium-ah an hmang a. Cultural Day puala an hlan thin ‘Laisuih Award’ chu Lalnunsanga, T.Melody, Tahan, Myanmar hnenah hian ropui takin an hlan.

PU College-in thu leh hla, a bikin hla hmanga Zofate insuihkhawmna lam hawia mi thawhhlawk hnena an hlan thin ‘Laisuih Award’ hian tangka fai Rs. 10,000, trophy leh chawimawina thuchei a keng tel a. He Award dawng tur hian ‘Laisuih Award’ Committee an din a, chung mite chuan mi hrang hrang kutchhuakte an zirchian hnuah Lalnunsanga hi an thlang ta a ni. Kuminaa Laisuih Award Committee chu — Chairman : Dr. Lalbiaksangi Chawngthu, Secretary : Dr. Zoramdinthara leh Member – Lalthlamuana Ralte te an ni.

Kum 2011 khan ‘Tho la ding ta che’ tih hla hmanga zofate auchhuaktu V.Thangzama hnenah ‘Laisuih Award’ hi an hlan tawh a, 2015 khan ‘Chhuihthangvala’ hitmaker Lalnunmawia (Valtea) hnenah he chawimawina hi an hlan leh bawk.

Award dawngtu Lalnunsanga chuan, “Zofate insuihkhawmna leh inunauna hi ka vei ber a ni a. He chawimawina hi kei aia dawng awm tam tak an awm. Mahse, Mizorama piang leh seilian pawh ni ve lo, international boundary pela hetiang chawimawina sang min pe hi ka thinlung takin ka lawm a ni. Hei hian Zofate insuihkhawmna kawngah nasa takin hna a thawh ka ring,” a ti a. Mizorama cheng Mizote chu Myanmar-a zin a, inunauna tha nei zel turin a sawm bawk a ni.

Lalnunsanga hi Aizawl lama a band te’n an tawiawm a. Award dawn zawha a thusawiah chuan, zai tura sawmtute hnenah Burma pawisa cheng nuai 20 (India pawisa nuai 1 vel) tal lo chuan an tihhlawhtlin sak hleithei tawh lo tih a sawi a. “Hnam inpumkhatna atan leh inunauna atan erawh chuan tunah pawh chutiang phut miah lo chuan kan lo kal a ni,” a ti. PU College hian Tahan atanga a lo kalna senso zawng zawng bakah a thlenna senso thlengin an tum sak vek a ni.

Cultural Day hman chungchangah PU College Principal Dr. Tawnenga chuan, “Khawvel hnam hrang hrang culture lantir kan tum rualin, a pawimawh ber chu kan chenna Mizo hnam culture vawrh lara, chawi nun a ni a. Hemi rual hian Zonun zemawi leh tlawmngaihna te, Mizo thil leh Mizona chhawm nun leh zel hi kan tum a ni,” tiin a sawi bawk.

Cultural Day-ah hian Mizoram University Vice Chancellor, Prof. KRS Sambasiva Rao chu khuallian a ni a. Khuallian chuan, kum 2018 session thar atangin Pachhunga University College chu PG College-a hlankai a nih tur thu sawiin, “Mizo, Philosphy leh Life Science-ah PG hawn a ni ang,” a ti. PU College-ah hian department 21 awmin, zirtirtu 120 velah leh non-teaching staff 100 vel leh zirlai 2000 chuang an awm mek a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?