MIZORAM-A COURT KALPHUNG

Tute maw sawi dan ang deuhin India ram court sang ber, Supreme Court chu a hla em mai a, Mizoram chhunga kan court neihte thuneihna leh inkhaidiat dan chauh tun tum chu i han thlurbing teh ang. Tun hma deuh lawk chuan Mizorama kan Executive Officer-te kha court lamah judge an ni nghal mai thin a, hun rei tak Judiciary hi Executive atanga dah hran tura buaipui a nih hnuin kum 2008 atang khan Judiciary chu a hranpain a kal ve ta a ni.

 

1. Gauhati High Court (Aizawl Bench): India danpui Article 214 chuan, ‘State zawng zawngin High Court an nei tur a ni,’ a ti a. India ram state 29-ah hian High Court 24 a awm mek a, state thenkhat a hrana High Court la nei loten High Court pakhat intawm kan la awm a, Gauhati High Court hi hmarchhak state 4 – Assam, Nagaland, Mizoram leh Arunachal Pradesh ten kan intawm mek a, Mizoram tan Aizawl Bench, Nagaland tan Kohima Bench, Arunachal Pradesh tan Itanagar Bench a awm mek a ni. Tun hnai lawkah Meghalaya, Tripura leh Manipur ten High Court hran an nei thar a, Mizoram sorkar pawhin a ngai pawimawh a nih chuah High Court hran kan la neih ve thuai kan beisei.

An awmna state-a court zawng zawngte chu an thuhnuaiah a awm a, Judicial Officer-te administration, posting and transfer pawh an High Court thuneihna a ni. A tlangpuiin High Court hian court hniam rorelna a lungawi lohna neihten appeal an thehluh hi a ngaihtuah thin a. Tin, India Danpui Article 226 hnuaia Writ Petition te a ngaihtuah thin bawk. High Court Judge-te hi India President-in Chief Justice of India rawn chungin a ruat thin a, tuna Gauhati High Court Judge 17-te zinga 12 hi Bar (Advocate) atanga lut niin, a dang 5-te hi State Judicial Service atanga lutte an ni.

 

2. District Court: Mizoram hi Judicial District 2 – Aizawl Judicial District leh Lunglei Judicial District-ah then a ni a. Aizawl Judicial District hian Aizawl, Champhai, Kolasib, Mamit leh Serchhip Administrative & Revenue District-te a huam a; Lunglei Judicial District hian Lunglei, Lawngtlai leh Saiha Administrative & Revenue District-te a huam thung. Mizorama District Court leh a hnuai lamah hian Mizoram Judicial Service ten Judge hna an thawk a ni.

District Court/Addl. District Court hi a huam chhunga civil court sang ber a ni a, a hnuaia court chungahte thuneihna a neih bakah civil court thubuai remna Rs. 5 lakhs aia tam lote appeal a ngaihtuah deuh ber thin. District Court/Addl. District Court hnuai chiahah hian Senior Civil Judge Court a awm a, he court hian Civil Case Rs. 2 lakhs aia tam chin zawng a chingfel thin a. Hemi hnuai lehah hian Civil Judge Court a awm leh a, he court hian Civil Case Rs. 2 lakhs pel lo zawng a chingfel thin.

 

3. Sessions Court: Sessions Court/Addl. Sessions Court hi Judicial District chhunga Criminal Court sang ber a ni a. Anni hi Criminal Case thubuai lian ber thlenga ngaihtuah thei, hremna na ber capital punishment (thi tur hremna) pe thei court a ni a, Capital Punishment bik hi High Court pawmpuina a ngai thung. He court hnuai chiahah hian district chhunga Judicial Magistrate zinga hotu ber, Chief Judicial Magistrate Court an awm a, he court hi amah thubuai ngaihtuah thin bakah Case Investigation kal lai leh Chargesheet la thehluh loh a thubuai nei mek, jail-a la tang mekte in-report-na court a ni. Chief Judicial Magistrate Court hnuaiah hian Judicial Magistrate First Class Court a awm leh a, he Court hi Mizorama thubuai tam ber – rukruk, zu case, damdawi case tenau deuh chingfeltu court a ni.

India rama state lian zawkte ngaihtuah chuan Mizoramah case a la tlem a, kan Mizoram Judicial Service lam mite pawhin an awmna apiangah tlangpuiin District Judge/Addl. District Judge hna leh Sessions Judge/Addl. Sessions Judge hna an kawp a, Chief Judicial Magistrate leh Senior Civil Judge te, Judicial Magistrate First Class leh Civil Judge hna te an kawp a. State dangah chuan ni khata an thubuai chinfel leh ngaihtuah a tam thin avangin civil case leh criminal case khawih turin mi hran an ruat thin a ni. A chunga kan sawi tak angin Mizoram Judiciary hi kum naupang tê, kum 10 erh awrh chauha upa a la nih avangin hmasawna tur leh tih tur tam tak a la awm a. Indian Democracy-a banpui pathum zinga pakhat a nih avangin kan state sawrkar pawh hian ngai pawimawh lehzual sela, court building tha zawk leh changtlung zawk leh High Court hranpa pawh nei ve turin hma chak zawkin la thei se tih a duhawm hle.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?