Mizoram Budget

March 16, 2017 (Ningani) khan finance minister Pu Lalsawta’n Mizoram budget 2017-18 a pharh a. Congress kaihhruai sorkar term hnih kal mekah a zawna budget puitling (Regular budget) pharh hmasak ber a ni a. Finance commission sawmpalinain rawtna a siam hnuah hi chuan state tinte hian sorkar laipui atanga kum tina sum an hmuh tur zat a hriat lawk tawh avangin budget puitling siam a har ta lo a, finance minister leh a hote hian duh thalin sum awm sa (leh puk belh tur) hmanna hi an ruahman thei tawh a. Regular budget pharh hi a nga sa a ngaih a ni tawh.

Chumai a ni lo a, planning commission a tawp tak hnu hian state annual plan lo pawmsaktu an awm tawh lo a (hei hi tunhmaa budget pum pharh theih loh chhan ni ber thin nghe nghe). Kuminah phei chuan, union budget zulzuiin plan leh non-plan then hran a ni tak loh avangin, annual plan tel lo budget kan neih vawi khatna a ni nghe nghe. Hetiang a nih chuan state planning board pawh hi thiah mai chi nge a kalphung tihdanglam tur zawk tih pawh ngaihtuah tham a ni ta awm e.

India ramah hian sorkar laipui thuneihna hi a sang hle a, sum leh pai lamah pawh state hrang hrangte khaikhawmtu a ni. A nihna takah chuan khawi state mah hi Delhi sum ring lo a kal thei an awm lo. State tinte hian finance commission-in rawtna a siam angin sorkar laipui atangin sum an dawng thin a. Finance commission sawmpalina huam chhunga a la nih avangin an rawtna angin kan sorkar pawh hian sum a dawng thin a ni. Sorkar laipui atanga Mizoram sorkar (leh state dangte) sum hmuh dan hi tawi tein han sawi thuak ila.

Sawi tawh angin finance commission-in kum nga chhunga state tinten chhiah an insem dan tur a ruahman thin a, an sum hmanna tur te, leiba leh sum indaih lohna an tihtlem dan tur te a rawt bawk thin. Sorkar sum hmuhna hnar pawimawh ber chhiah chi hrang hrang zingah hian sorkar laipui chauhin a khawn te, state sorkar chauhin a khawn te, sorkar laipui aiawha state sorkarin a khawn te a awm a. A then chu sorkar laipuiin a khawn a, state sorkar hnenah a pe bawk. Heng chhiah lakkhawm atanga state sorkarin a dawn hi tanpuina (grant-in-aid) anga a kal avangin state sum hnar lian ber a ni a.

Planning commission tihtawp hma kum 2015 hmalamah kha chuan (Planning commission hi) state hrang hrangte sum hmuhna hnar pawimawh tak a ni a, an thuneihna hmanga pawisa pek theihna (discretionary grants) an neih avangin finance commission aiin thu zawka ngaih a ni thin a. State sorkarin kum khat chhunga hmalakna tura an ruahman (annual plan) pawh planning commission pawmpui a ngai thin bawk. Sorkar laipuia ministry hrang hrangte pawhin an pe thin bawk a, chu chu CSS kan tih ang chi te hi a ni. Mahse, planning commission a lo tawp tak hnuah chuan finance commission ruahmanna hi state sum hnar pui ber a ni ta a ni.

Finance minister pharh tak Mizoram budget tharah pawh hian state sum hmuhna hnar ber chu finance commission sawmpalinain a lo ruahman a ni a, chungte chu – sorkar laipui nena chhiah intawm atanga dawn tur Cheng vbc 3107.26 te, sum indaih loh vanga dawn tur (Post devolution revenue deficit grant) Cheng vbc 2446 te, urban local bodies grant Cheng vbc 23.80 te, chhiat rupna lo thlen thula inven lawkna/hmalakna tura ruahman Cheng vbc 17 te a ni.

Hei baka sum hmuhna tur langsar dang leh chu sorkar sum puk tur (state borrowing) Cheng vbc 596.95 a ni a, a pung awma puk turte a nih avangin eirukna sum hi hman a nih chuan rulh let a huphurhawm hle ang. Kan state thawhchhuah ve tur (State’s own fund) hi Cheng vbc 694.64 tling tura chhut a ni bawk a. Sorkar laipui ministry hrang hrang state hmasawnna hnathawhna atana hman tur CSS sum lokal tur zat hi sawi lawk theih a ni lo a, Cheng vbc 1169.61 hmuh beisei a ni. Heng bakah hian Block grants (NLCPR, JNNURM, BADP, etc.) Cheng vbc 582.36 hmuh beisei a ni bawk. Heng sum hnar hrang hrang atanga hmuh inbeisei zat hi avaiin Cheng vbc 8803.10 tling tura chhut a ni. A tam tham khawp mai.

A hmanna lam hi hlawm hnihah a then tawp theih a – sorkar sum hman thinna heng, inrelbawlna lam leh hnathawkte hlawh leh a danga sum hman tur, ‘revenue expenditure’ hi Cheng vbc 6388.21 tling tura ruahman a ni a. Chutihlaiin, thil thar siamna tur te, hmalakna thar tur te, loan pekna/rulhna tur te, hmasawnna lam hawi zawnga sum hman tur chi hrim hrim ‘capital expenditure’ hi Cheng vbc 2414.89 ruahman a ni bawk. Tichuan sorkarin kum 2017-18 chhunga sum a hman tur ruahman zawng zawng belhkhawm chu Cheng vbc 8803.10 a ni.

Finance minister-in sum hmanna tur langsar zual a tarlan zingah sorkar development policy thar NEDP hnuaia hna hrang hrang thawhna atan department hrang 31-ah Cheng vbc 750 dah a ni a, nikum budget-ah khan Cheng vbc 250 dah a ni. NEDP hi kan tun dinhmun nena ngaihtuah chuan kalpui dan thiam a har hmel khawp mai. A nihna takah chuan beiseina sang nena siam ni mahse ministry leh sorkar official-te hian an tuipui tawk lo nge an bangbo zawk, mipui beisei angin a pui rih lo tih hi phat rual a ni lo.

Tuna an kalpui danah pawh hian hnuaia hmalakna tur hi department hrang hrangten hmalakna tur ruahmanna an siam tur a ni a. Chutiang anga kalpui tur a ni tih la hre lo an tam hmel riau a, sum hmanna thenkhat lah hi NEDP nena inmil vak lo te a ni nawk bawk. NLUP kha sorkar flagship programme a ni a, an sawi nasa a, budget pharh apiangin fak mawi leh sawi zau a hlawh thin a. NEDP hi chuan NLUP angin sorkar a chiah hneh tawk lo deuh a ni maithei budget speech-ah pawh hmun a chang zim deuh, vawi hnih emaw chauh tawitea sawi lan a ni.

Engpawhnise, kum hmasa let hnih lai sum dah a ni a, sorkar bawk hian a ngaih pawimawh chuan NEDP hmanga hnathawh tam tak hmuh tur a awm ngei dawn a ni. NEDP hian lo neitute/kut hnathawktute thar leh thawhchhuah hlawk zawka dehral dan tur kalpui (market economy) a tum a. NLUP kha kut hnathawkten eizawnna ngelnghet an neihna tura ruahman a ni a, mahse, eizawnna ngelnghet neih phah leh hralh chhuah tham thar chhuak leh siam chhuak an tam hmel si lo a, a rethei ngai bawk an la rethei ni maiin a lang si a. NEDP hi market-oriented policy a ni bawk si a. Matric fail tana college admission zawnsak ang deuh te pawh a ni thei awm e.

Kan ram mamawh em em, sorkar mualphona lian ber pakhat ni mek kawngpui chei thatna atan Cheng vbc 239.50 ruahman a ni a, siam mek leh a thar siamna atan Cheng vbc 657.64 ruahman a ni bawk. Inthlan kum a ni dawn bawk a, kawngin ngaih pawimawh a hlawh leh ta a ni ber awm e. Hei hi chu tunhma atanga kan sorkar hrawn tawhte zia a nih kha. Heng bakah hian sum hmanna tur leh hmalakna tur ruahmanna hrang hrang a awm a. Lok Ayukta dinna atan Cheng vbc 159.34 dah a ni a. Lok Ayukta din hi nikum budget-ah khan sawi a ni tawh a, sum pawh hetiang zat tho hi dah a lo ni tawh a. Mahse, eiruka fihlim em ema CM leh a hote an insawi viau chung hian eiruk chungchang chhuitu tur thuneihna sang tak nei din hi an phur mawlh lo a nih hmel. Kum tharah pawh hian an din hman leh ngut ang emaw.

Finance commission hmasa lama rawtna awm tawh angin budget hi revenue surplus awm tura ruahman a ni a, chumi awmzia chu revenue account-ah hman bang Cheng vbc 1787.10 awm tura chhut a ni. Chutihlaiin, sum indaih lohna fiscal deficit Cheng vbc 138.94 awm tura ruahman a ni thung. Kum tin hian leiba leh sum indaih lohna hi a pung tial tial a, chu chu sum puk a tam zel vang leh sum hman bang awm tura ruahman ang zat a bang a awm leh thin loh vang te a ni thin. Kumin 2017-18 chhunga state leiba zat tura chhut lawk chu Cheng vbc 7177.99 zet a tling dawn, kum kal mek (2016-17) hian leiba Cheng vbc 7290.17 tling tura chhut a ni a, budget-a leiba ngah ber tum a ni nghe nghe a, a dawttu chu tun tum hi a ni leh. Hei hi ruahmanna (budget estimate) a ni a, a tak taka leiba hi a tam leh daih hmel lehnghal.

Heti zat leiba awm tura ruahmanna siam a ni hi a huaisen thlak a, ngaihtuah tham a tling. Inthlan a lo hnaih tak avangin sum tlakralna tur a tam tial tial anga, a inren zawng leh a khawl zawnga kal a har tial tial dawn a nih hmel. Chutihlaiin, sorkar tan chuan state sum thawhchhuah (GSDP) atanga tehin leiba dinhmun hi a hniam zel, tiin a sawi mawi theih tho ang. Mahse, GSDP hi state-a cheng zawng zawng dinhmun dik tak hriltu a ni lo a, a sang a nih pawhin mi zawng zawng sum thawhchhuah/lakluh a tam tihna a ni lo. Chuvangin, sum thawhchhuahna tur leh rotling siamna tur leh hmasawnna leh mipui dinhmun chawikanna tur ni lem lo a leiba pung thur thur hi nakina phurrit thlentu a ni dawn.

Tawitein budget hi han sawi belh leh ta ila. Nikum budget ang thoin chhiah thar lak tur ruahman a awm lo a, July thla atanga GST kalpui a nih dawn vang aniang e. Nikum khan Mizoram finance commission hmasa ber rawtna house-ah pharh a ni a. Kumin budget-ah hian an rawtna siam chungchang tarlan a ni lem lo a, Mizoram finance commission report kha sorkar tihhlawhtlin ngei ngei tura ngaih a nih hmel si a. Tunlaia kan ram mamawh em em eizawnna hna siam chungchang hi a veiawm khawp mai. Budget-ah hian sorkar hna thar awm tur te, sorkar hmalakna vanga eizawnna tling hna awm thei tur te, mahni kutkawiha eizawng turte tanpuina tur te, thilsiamna leh sumdawnna tenau tanpuina tur te hi chiang taka hmuh tur te hi awm thin se.

Sorkar hian policy mumal nei lo a hmalak chiam hi a ching thin a, entirna, tourism te, sport te, education te, power te, etc., hi policy mumal tak nena hmalakna tur chi a ni. Policy phuahchawp deuh (e.g. power policy) hman tangkai loh a tha zawka thlak te pawh a hun khawp mai. Sorkar laipui hian mumal taka kal turin state sorkarte hi a beisei a, chumi atan chuan budget hi a pawimawh ber pakhat a ni awm e. Budget duhthusam nei thei lo mah ila, kan mamawh tawk, mumal tak, mi tin huapzo tur, hmasawnna tlo (sustainable development) thlen thei tur neih erawh a hun khawp mai. Chhiah lak thar leh tihpun tur tarlan ni lo mahse, sorkar hian tihpun a tum thu erawh a sawi thung. Mipui nawlpui nghawng lo zawng, mi hausate nek ngam zawnga sorkarin chhiah leh thil dang a khawnte (user-charges) pawh tipung ta zawk se.

Sum renchem bawk hi kan sorkar hian a tum tak tak a hun, helicopter leklam lutuk te, khualliana tan ngun em em te hi zahawmna ai mahin tlakranna lam a hawi zawk awm e. Department hrang hrangte hi an inthlauh viau chhan hi an minister-te azir ni berin a lang, minister-te hian tih tak takin an hote hi vil ngun se chu hmasawnna hi a khai rual awm e. A tawpna atan chuan hruaitu lu ber leh minister-te hian mipui beisei pha tura theihtawp an chhuah chuan budget hmang hian hmasawnna chak takin a kal theih ngei a beiseiawm hle a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?