Mizoram Governor lailawk turin Prof. J Mukhi lalut

Aizawl: Nimin chawhma dar 11 khan Raj Bhavan-ah Mizoram Governor 19-na hna lo chelh lailawk turin Prof. Jagdish Mukhi chu Gauhati High Court Judge Nelson Sailo chuan rinawmna thu tiamtirin a lalut.
Governor thar lakluh inkhawm hi Raj Bhavan Durbar hall-ah neih a niin Chief Secretary Lalnunmawia Chuaungo chuan Mizoram Governor hna lo chelh lailawk/hmui tura President in Assam Governor ruat a nihna chu a chhiarchhuak a, hemi hnu hian rinawmna thu tiam tira lakluh a ni ta a ni.
Governor lakluh inkhawm neih zawh hian Governor thar chuan Press mite a kawm nghal a, Mizoram Governor hna lo hmui tura ruat a ni chu lawmawm a tih thu sawiin India danpui hnuaiah theihtawp a chhuah dawn tih a sawi. Mizoram hmun kilkhawr zawkte tlawh a tum leh tum loh zawhna chhangin hun a nei tlem avangin a ngaihtuahnaah a awm hrih lo tih a sawi a, Assam leh Mizoram ramri buai chu state pahnihte ngaihtuah tur a ni a, Governor thuneihna a ni lo niin a sawi. Mizoram Governor atana ruat thar Prof. Jagdish Mukhi hian nimin vek khan Aizawl chhuahsanin naktuk tlaiah Aizawl a lo lut leh ang a, Thawhlehni atanga Mizoram Legislative Assembly session neih tan turah thu a sawi ang.
Mizoram Governor kalchhuak ta Kummanam Rajasekharan hian nimin vek khan Aizawl a chhuahsan a, thudawn danin kan hma lawka Lok Sabha MP thlan turah BJP ticket-in a ding dawn nia thudawn a ni.
Mukhi hi December 1, 1942 khan Dajal, Dera Gazi Khan, tuna Pakistan ram chhungah a piang a. Delhi sawrkarah Minister of Finance, Planning, Excise and Taxation leh Higher Education hnate a chelh tawh bakah Andaman and Nicobar Islands-ah Lt.Governor hna a chelh tawh bawk.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?