Mizoram-in semi final lut

Nimin khan Guru Gobind Singh Stadium, Jalandhar-ah Mizoram chuan nikum final-a an hneh Railways chu Group B match-ah an hmachhawn a, hetah hian Mizoram hi Bawngkawn tlangval, Chanmari FC player Lalmuankima (MK-a) goal awmchhun hmangin an chak a, an khelh leh hnuhnungberah chak zo lo mah se, Mizoram team hian semi-final an lut tawh chiang sa a ni.

Nimin inkhel hi tum dang ang bawkin ruahsurin a tibuai leh a, first half an khelh chhungin ruah tlem a sur hman a, 2nd half-ah phei chuan ruah hi a sur nasa hle niin Mizoram coach H. Vanlalthlanga chuan Zalen a hrilh. Thlanga hian a sawi zel danin a khelh hrim hrimah pawh an chungnung zawk a, goal thunna hun tha pawh an ngah zawk tiin a sawi a, mahse, an vanneih ni a ni lo a, goal an thun tam thei ta lo tih a sawi a, Santosh khel pha chin team te chu an that vek tawh avangin an duh angin an la khel thei lo tih pawh a sawi tel bawk. Thlanga hian MK-a goal a fak a, chawlhlawk hmaa hma an hruai thei chu lawmawm a tih thu a sawi a, ruah sur lo se chu inkhel pawh kha aia an thunun thei zawk a rin thu a sawi bawk. MK-a hian minute 44-ah a thun a ni.

Mizoram hi tun tum tournament-ah hian chak vek awmchhuan an ni a, Services chu vawihnih chak tawhin vawikhat an draw a, Mizoram hi an khelh hnuhnungberah hian chak zo lo mah se, an hnuaia mi te dinhmun enin pool leader ni thei tho an ni a, vawiin hian vawi-hnih chiah la khel Kerela chu Delhi nen an inhmachhawn dawn a, an inhnehtawk anih chuan Mizoram hi Pool leader ni chiang sa an ni ang a, Kerela hi an chak zawk a, an match hnuhnungbera an chak leh bawk a nih chuan Mizoram leh Goa inkhelin pool leader tur a hril ang. Mizoram coach hian semi-final lam a thlir der tawh a, pool leader an nih ngei pawh a ring a, semi final-ah hian Services emaw, West Bengal emaw, a thlengtu Punjab emaw chu tum thei an nih thu a sawi a, lehlam pool-ah hian tun dinhmunah Services chu hmahruaitu niin Punjab hi Pathumna an ni mek a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?