Mizoram Kan ram neihchhun!

– C. Dorema
Khasi Veng, Kulikawn

Mizoramin Chanchin Tha kan neihna kum 120 chuang lai a lo ni ta. Mizoram hi Chanchin Tha hrilna kawnga che nasa, ram pawna Missionary tir chhuak tam ber hnam tia mite hriat hlawh hial kan lo ni ni ta a. Bible Society rawngbawlnaah India rama Auxiliary ti tha ber pakhat kan ni bawk. Tin, kum 2012 khan Church of South India hruaitu mi 20 emaw lai Mizorama Presbyterian Kohhran chanchin a hmuna rawn hmua zir turin Aizawlah an rawn intir rup mai a, chawlhkar hnih emaw lai min chamchilh a nih kha. Ralkhat atanga kan chanchin an hriat atangin nun awhawm leh zir chian tlakah Isua Zirtir Thoma te lo din, India chhima Kohhran hlunho khan min hmu tlat kha a va ropui em! Khaw kar kawng ram pilril laiah nghaktu-awm lo-dawr kan neih thinte hi a ropui teh a nia. An beisei ang pawisa kha a dawrtute hian an hnutchhiah thin a ni ngei ang, an zawngchhang zel tlat! Tun hma deuha PWD labour Dumka-ten khaw kar kawnga bus tlan lai an lo phar ding a, driver kuta inland letter leh postcard dak ina thlak tur an lo pe chawt mai thinte kha a ropui teh mai asin. Rinawm leh rintlakah labour-te khan min ngai tlat mai kha thil lawmawm leh hlu tak a tling.

Mizoten English alphabet kan lo hmang ve hlauh mai hian lehkhazirna  kawngah  remchanna leh hlawkna eng eng emaw chu min neihtir niin a ngaihtuah theih. Kan ram chhungah na na na chuan Mizo tawng kan hmang tlang vek thei te, mi chhia leh mi tha, lehkha thiam lo leh lehkha thiam inthliarna leh inenhranna kan nei ve hauh lo mai leh tlawmngaihna pi pute atanga kan lo neite hi a va hlu tehlul em! Kan ramah kutdawh vak vel hmuh tur pawh an awm lo thin kha a ni a, tunlaiah erawh hi chuan kan chhehvel atanga lo kalte an ni ber awm e, eng emaw zat chu hmuh tur an lo awm ve ta. Heng pawh hi Kohhran belh mumal nei lo leh kan khawtlang nuna inbarhlut ve lo an ni vekin a lang. Heng pawh hi kan khawtlangah kutdawh ngai kher lo hian tun hma anga zeh ral theih ni se a duhawm khawp mai. Kan sik leh sa neihte hi a nuamin a va hlu em! Favang tir vela kan ram mawi thinziate hi kan chik ngai em? Thlai leh thei chi hrang hrang kan rama kan neihte lah hi mi rama awm aiin a tui deuh bik emaw tih theih a niin kan rama chin theih loh leh tha thei lo pawh hi a tam lo khawp awm asin! Pangpar ni se enkawl that phawt chuan an lo tha duh em em vek mai a lo ni a; tun hma hun pawimawh apianga Bangalore vel atanga pangpar chah ziah ngai thin kha tunah hian a ni tawh lo. Aizawlah hian a fresh-in a mawi tawh zawk ti ila kan tisual tam lo hle ang.
Mizoram kan vanneih em emna kawng dang leh chu tui in tur hi a ni. Khawvel ram hrang hrang leh India ram state hrang hrangah hian tui in turah Iron, Arsenic leh Fluoride tel tam lutuk avanga a tlantu mihring hriselna lama harsatna hi a tam. Tui in turah iron a tam hian pumpui leh ril ulcer nei tan pum pai nuam lo a siam thin. Ram tam tak leh India state hrang hrang hi tui in tura iron tam avanga harsatna an nei nasa em em. Tin, tui in tura Fluoride kan ei/in tel thin hi kan ruh leh ha siamtu leh tichaktu pawimawh em em a ni a. Mihring taksaa fluoride awma 96% hi ha leh ruhah hian a inphum vek a ni an ti a. Nimahsela chutiang fluoride chu a tam lutuk chuan ha leh ruh tichhetu a ni leh hlauh thung thin a; chuvangin, tui in turah hian a tawk chauha tam Fluoride hi a awm ngei a pawimawh a. Hetiang avanga harsatna hi India ramah ringawt pawh mi maktaduai 62 laiin a tuarin pianphunga rualbanlo tam tak an awm phahin ha tha lo neih phah tam tak an awma sawi thin a ni. Nimahsela, hetiang kawnga harsatna hi kan ram Mizoramah langsar thamin a awm hauh lo a ni.

Hetiang hi kan ram awm dan leh dinhmun a ni a, heng baka Mizo khawtlang nun awm dan tha lai tarlan theih tam tak kan neiin khawtlang nun hlimawm tak, a huhova thiltih te hi kan va thiam em! Heng avang hian Pathian hnena lawm thu sawi chamchi tur awm kan ni. Phunnawina leh vuivaina dapa mi dangte dem thin tur hi kan ni em tihte hi ka ngaihtuah a, lawm taka awm thin turin chhiartute ka sawm duh a ni.
Amaherawhchu, ram changkang zawkte nun zira bul intan mek kan ni miau va, rinawmna te, thuawihna te, mahni phak tawk leh tlin tawka pawisa hman leh nun kawngah te, zuk leh hmuam leh zu leh ruihtheih thilah te hian zir tur leh hmasawnna tur kan nei ngah khawp mai. 2012 khan Synod Inkhawmpui pawhin ‘Rinawm inzir kawngah hma lak ni rawh se,’ tih relin rinawmna kawng inzirtirnaa tan la turin Kohhran tin hriattirna pein kaihhruaina booklet pawh buatsaiha sem a ni. 2016 Synod Inkhawmpui pawhin 2017 Synod thupuiah ‘Thih thlengin rinawmin lo awm rawh, tichuan, nunna lallukhum ka pe ang che,’ (Thup. 2:10) tlawhchhana hmangin “Rinawmna” thu bawk a lo thlang leh ta. Hemi kawnga kan that tawk lohzia chu Aizawl khawpui chhehvela inenkawlna leh chhawmdawlna hmun (Home)-ah englai pawha pawha leng lo, in chhunga enkawl hleih theih loh, khawtlang leh chhungkuaa harsatna nei si kan nei reng mai hian a tarlangin ka hria. Mihring kan tam vanga inenkawl seng lo kan ni hauh si lo. Hei hi thingtlang a ni emaw, khawpui a ni emaw, Zoram hmun tinah kan harsatna a niin a lang. Politics lama hmasawnna leh lehkha thiamna lama hmasawnna hi kan ram siam tha tur hian a tawk kan ti em? Pathian thu sawi leh ngaihthlak pawh hi kan ti nasa tawh khawp mai. Crusade, campaign leh camping pawh hi kum tam tak kal atang khan kan bei a, kan ti nasa tawh. Presbyterian Kohhran bik han sawi ta ila, Revival Team ringawt pawh 70 chuang kan nei a, Zoram khaw hrang hrangah an bei chamchi a, Kohhran tin hian vawi hnih/khat tal chu hetiang lam zawng hian programme kan nei theuh bawk. Chuti chungin a rah chu sawi thiam pawh a harsa khawp mai. YMA leh NGO pawh hian kan thatna tur leh hmasawnna tur chu kan ngaihtuahin kan rel nasa khawp mai. Kan rinawm lo va, nuam kan thlahlel em em a, nawmchen dan pawh kan thiam, hmeichhiat-mipatna sual te, zu leh ruihtheih thil zawng zawng te pawh hi Kristian tha ber anga miten min hmuh lai mek si hian kan ramah hian a va nasa tehlul em !

Heng ngaihtuah hian kan awm dan kan inen chian hi a pawimawh. Hawh u, nu leh pa leh puitling zawng zawng hian kan awm dan tihhmasawn dan tur hi ngaihtuah thar ang u. Mi thiamten an sawi thin a, hlum hi a nem lai chuan duh ang angin kan hrualin kan hmet per thei a, thil lem kan duh angah kan siam thei; a ro char hnu chuan duh anga khawih danglam theih a ni tawh lo ang hian naupang pawh a tet laia zirtir leh kaihhruaina tha pek an nih chuan mi tha leh duhawm zawkah chhuakin nun tha leh duhawm an nei thei ngei ang. Mahni chhungkuaah engmah inzir leh inhrilh awm mang si lo va, Home-a indah thin te leh camping naa indah te pawh hi tangkaina eng emaw chen chu a awm ngei ang; nimahsela, an tet lai atanga an nuna riak kaihhruaina tha pai lo fa chuan an hlawkpui dan a dang fo thin ni pawhin a lang. Chutiang kawnga kan rilru kamkeutu atan heng thu hi kan ngaihtuah zui atan ka han ziak a ni a. A chunga kan tarlan ang hian Mizoram hi kan ram neih chhun a ni a, kan thlah lo la awm zel turte tan leh kan zavai atana ram nuam, chhuanawm leh ngaihsanawm, zalen leh hlimawm zawk a lo nih belh zel theih nana buatsaih theitu awm chhun, an kawng sialtu kan ni theuh thei a ni. Chu mawhphurhna mawlh mai chu tun huna nu leh pate leh puitling awm zawng zawngte hi a kawltu kan ni tlat. Theihtawp kan chhuah phawt chuan Pathian hian  mal a sawm ngei ngei dawn tih pawh i ring ang u. Chuvangin Mizoram, Kristiannain a luah/chenchilh ram hi dikna leh rinawmnain ro a relna ram Kristian ram dik tak a lo nih theih nan tan i la ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?