Mizorama Chakmate hi

Chakmate hi Mizorama cheng hlun an ni lo a, Kumpinuin kan ram a awp hnu a lo pem lut chauh an ni a. Phalna neia lo lut leh an thlahte hi a lu nungin chhiar ila hnawksak tham an la ni kher lo ang. An lo luh dan leh an pun chak dan chhui chian hi chuan politician-te hi dem loh theih an ni lo, dik tak chuan min awptu Sapho ai khan kan ram hruaitu thenkhatte hi chuan kan hnam hi an hmangaih lo zawk emaw tih mai tur a ni.

Sapho kha chuan kan rama an lo luh an phal lo a, min chimbuai thei tur hnam dang lakah min hum him tha viau a, dan tha tak tak, vawiin thlenga kan inhumhimna la ni reng te hi min siamsak a. Chung dante chu khauh taka an lekkawh thin ang khan a ram neitu zawk hian kan lekkawh tha tawk lo a. Heti taka kan ram chhunga Chakma an lo tam ta em em mai te, an lo pawng ta em em mai te leh kan politician-ten an duhsak uchuak em em mai te hi Kumpinu hun laia kan rama lo awm sapho kha lo tho lehin rawn hmu ta se min hmusit viau maithei a ni.

British sorkar an haw a, India hnuaiah kan lut a, kan kutah thuneihna zau tak a lo awm a, kan hnam himna pawh kan kuta (A bikin ram hruaitu politician-te kuta) engemaw chen a awm hnu hian kan inveng him lo tial tial a nih hi. Sapho khan hnam rinawm leh rinawm lo an hre riau a, Mizote kha an ring tawk viau a, sipai atan an iai lo a, lehkhathiam hmasate pawh an phak ang tawkah an chhawr hreh lo thin. Chutihlaiin, chakmate hi chu an ring vak lo thung. Mizoramah Bawrhsap (Superintendent, Lushai Hills) phalna nei lo chu an lo luh khap tlat a ni a. “Chakma leh Tripura-ho (Tuikuk) te hi khua leh tui tha tha an ni lo hrim hrim a. An awm ve hian thubuai hla buai a tam phah a, police leh dan lekkawhtute an la indaih bawk si lo a,” tia an lo ziah te khan an rilru put hmang thui tak a hril awm e.

Tunhma chuan Mizo pasalthaten Chakmate leh Chittagong Hill Tracts a chengte hi an lo run fo tawh a, Mizote hi an hlau hle thin. Helai tlangramah hian hnam hrang hrang an cheng a, chung zingah chuan Chakmate hi a lian ber pawl an ni a. Mizote pawh hi helai ram (CHT) luah hmasatu zinga mi kan ni nghe nghe. Chittagong Hill Tracts hi Chakmaten an ram (Homeland) a an chhal reng thin a ni a. Arakan (Burma) atanga pem thlaa inbengbel an ni nghe nghe. Lal neiin helaiah hian ngel nghet takin an khawsa a. Vailen vawi khatna 1872-ah khan Chakma lalnu Kalindi Rani-i’n Mizoram run tura lokal sipaiho puakphur tur mi 500 a lo pe a. Chu chu hriat theih chin a Chakmaten Mizoram lelung an rah hmasak ber a ni. Mahse, Tlabung an thleng a, anmahni run thintu an hlauh em em Mizote an hmuh khan nuam an ti chiah lo aniang an haw leh ta vek a.

Chakmate hi lui kama cheng thin hnam an ni a. Mizote chu tlangpanga cheng kan ni thung a, kan chhim lam ram ruak, luipui chhuah phai ram zau tak tak an hmuh takah chuan chen nan an it thlu ngang a ni ang Kumpinu hnuaia Mizoram a awm tak atang khan a rukin an lo pem lut ta zel a. Phalna neia awm tlem te an awm laiin rawn lut ru a, inbengbel ta an awm nual. Indopui pahnihnaah khan sipai puakphur leh puitu zingah Chakmate pawh an tel a, an zingah hian Mizorama khawsa zui hlen ta pawh an awm. Engpawhnise, India independence hmaa Mizorama Chakma awmte hi an tam lo a, an thlahte nen pawh hnawksak em em tham an ni lo ang.

Kum 1995 chho atanga MZP-in Chakma foreigner chhiarpui a neih a, khua leh tui dik tak list a siam khan fimkhur takin a kalpui a. Chakma khaw hrang hrangah kalin citizen list a chuang lo, khua leh tui ni si te tan hun an hawng leh thin a. Kum 1952, 1956 leh 1993 Electoral Roll a chuang kim thlapte leh an thlahte chu India khua leh tui dik taka ngaih an ni a. Tichuan MZP-in chhiarpui a neiha khua leh tui dik taka insawi ngam lo Chakma 58,673 te chu foreigner a ngaiin hnawt chhuak turin Mizoram sorkarah an hming nen an theh lut a, sorkar laipuiah pawh an thlen bawk. Chutihlai chuan electoral roll-a foreigner ni a ngaihte thun belh leh teuh an nih avangin kum 1996-a MP inthlan pawh kha MZP chuan a boycott nghe nghe a ni. Kum 1995-ah foreigner 58,673 an awm a nih chuan, hetih lai vela Mizorama Chakma awm zat chu 80,000 vel niin anmahni chuan an sawi thin a, a let an tling tihna a nih chu. Zep nak emaw khatih laia MZP hmalakna vang khan mipui kan harh chhuak a, politician-te pawh an fimkhur phah ta hle a, thangtharten hnam hmangaihna rilru kan put nasat phah hle a nih kha.

Mizo District Council a CEM hmasa ber Pu Lalsawia khan, “District Council inthlan hmasa ber (1952) khan Mizo Union-in Chakma vote an neih ve theih nan Tlabung ramri hrul a, Chakma tam tak Electoral Roll-ah dah luh an ni a, chungho chuan Pu Tuikhurliana (MU candidate) an vote duhna turin Medhia Chakma pawh Nominated seat-ah dah luh a ni nghe nghe a,” tiin a ziak. Thil pawi tak mai chu 1948-a District Advisory Council inthlanna-ah khan Chakmate vote an lo neihtir ngawt kha a ni. Sapho kha chuan Mizo lalte khua leh tui dik takah an pawm duh meuh lo niin a lang, chhiah pawh an chawi tam tir bik a, Mizote chhiahhlawh ang deuhah an ngai a nih hmel. Mahse, India hnuaia kan luh hnu atangin politician-ten an ti dik lo ta zel a. Kum 1950 a India rama Scheduled Tribe list tihchhuahah pawh Chakma hi a lang lo a; mahse, district council kan lo nih hnuah 1956-a an tihchhuah lehah chuan a lo lang ta vang a ni.

Chakmate hi hnam khawngaihthlak ang reng tak an ni tih erawh hriat a tha. Chittagong Hill Tracts, an ram nghet a an chhal hi British haw dawn khan, Buddhist 98% lai an awm avangin India hnuaia awm tura ngaih a ni a. India independence lawmin August 15,1947 pawh khan Rangamati khawpuiah phei chuan India flag an tar a. Mahse, Pakistan hnuaiah a awm ta zawk a, Muslim-ho tihduhdahna leh sipai sorkar nekchepna karah hreawm takin an awm zui ta a. Bengali (Muslim) tam tak an chenna CHT tlangramah an inbeng bel a. Chung avang leh Kaptai tuikhuah lian avangin Chakma leh Hajong tam tak an raltlan a. Mahse, vanneihthlak takin khatih laia Mizo District Council hruaitute khan Mizorama awmtir an remti lo tlat a. Assam sorkarin Arunachal Pradesh-ah a thiar chho ta a. Mahse, anni hi chu refugee an nih avangin India khua leh tui dik tak an ni thei lo a, Mizorama mite hi chu a ruka lo pem lut an ni thung a, thuneituten vote bank atana an hman duh vanga hamthatna tinreng a an vur an ni a. Khua leh tui nihna an nei zung zung pawh hi a mawh lo e.

Kum 1995 khan Mizoram a Chakma VC leh YCA hruaitu mi 60 in Prime Minister hnenah UT dilna an theh lut a. Hemi hma leh a hnuah pawh hian Mizote hekna leh UT dilna hi vawi duai lo an thlen tawh thin a. Zirlai pawlte leh Mizo mipuiin kan helh hle a nih kha, khatih laia sorkarna chelhtu pawhin dem a hlawh hle a ni. Chutihlai vel tho chuan January 16,1995 khan Chakma pahnih – Mrs Snehadini Talukdar leh Mr. Subimal Chakma ten Rajya Sabha-ah a bika enkawl (UT) dilna bawk an thlen a. Kum 1997 khan Rajya Sabha Committee on Petition chuan an dilna hi an pawmsak a, Chakma autonomous district council huam chin tihzauh te leh duhsakna thil a rawt tak avangin Mizo mipui kan phu ta luih luih a. September 26,1997 khan Join Action Committee hmalaknain kawngzawh a ni a, resolution pass a ni a. Memorandum pawh vairam lamah thawn a ni bawk a. Mizo mipui duh dan hriain an rawtna hi tihhlawhtlin a ni ta lo a ni.

Chakmate hi an fing tawh khawp a, vai thiltithei deuh zingah duhsaktu an nei reng bawk a. District Council atanga UT a hlankai kan nih lai pawh khan Regional Council awm sa Pawi leh Lakher regional council chu Autonomous District Council a then a ni a, chumi rual chuan mak deuhin Chakma Autonomous District Council hi a lo piang tel ve ngawt tawh a. Mizoram hruaitute zingah phalna leh remtihna lo pe an awm thu pawh sawi a tam hle a. Tunhma kha chuan a mawhphurtua puh Mizoram hruaitu mi pathumte hi ‘Sazu mitdel pathum’ tia beih an nih thin kha. Kum 2003 kum tir lam pawh khan Delimitation Committee-in Chakmate leh Tuikukte duhsak zawnga MLA bial then a tum avangin mipui kan phu luai luai tawh a. Kha rawtna kha kaltlang ta sela chuan MLA bial 4 hi Chakma tlin ngei ngeina a ni dawn a, bial 1 ah Tuikuk an tling ngei ngei bawk ang. Mahse, mipui tangrualin kan hneh leh ta hlauh a nih kha.

Engpawhnise, Chakma chungchangah hian a tir atangin mawhphurtute chu politician-te an tih loh theih loh a. Mikhual anga dawngsawng loin fa angin an lo pawm a, an lo luh belh zel a, an lo pung zel a. Mihring inthlah chhawn dan piah lama nasain an lo pung tih hi zep rual a awm lo. Dan ang chuan 1952 hma lama India rama awmte leh an thlahte chauh khua leh tui an ni a. Indira leh Bangladesh president Majibur-a te inremna Indira-Majibur Pact anga 1972 hmaa India rama awmte khua leh tui dik taka anga an sawi thin hi chu Chakma/Hajong refugee te chungchang a ni zawk. Khua kan tlai lek lek tawh a, sorkar huaisen leh hnam hmangaih tak taktu ram hruaitu nei ila. CADC thiah tum tlat, foreigner hnawhchhuah tum tlat leh kan ram humhalh duh tlat neih a hun tak zet a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?