Tunlai Zoram khawvel bawhtu ber chu CEO in principal home secretary a hekna avanga chhuah tir a nih thu leh Tripura-a Bru te vote thlak chung chang a ni a. Tlawmngai pawl tangrual huaihawtin CEO sawn chhuah leh Tripuraa Bru te Mizoram chhunga vote thlak tir ngiat a ni a, Election Commission lam chuan hei hi an remti thei ta a ni. Thil dangah tanrual a har tawh hle a, tun tum thil thleng hi tanrualnain thil a la tih theih zia tilangtu a ni a, hei hi Mizote tan hriat reng tlak a ni a, chhinchhiah tur a ni bawk aang.

 

Boruak tha a inher chhuah mek lai hian Kolasib lamah district election officer chu NGO Coordiation Comittee chu dan lo anga electoral roll-a Bru 218 thun angah an puh ve leh bawk a, hemi vang hian public interest litigation (PIL) hial thehluh an tum mek bawk a, Kolasib chhuahsan turin an ngiat bawk a ni. NGO te chuan DEO hmalak dan hi an duh lohna a rei tawh a, amah pawh hian a lo intiam tawh nia sawi a nih hnuah thu a sut leh thuthang vangin buaina te pawh a chhuah phah tawh a ni. Hetianga a chet dan a lan chhuah leh tak mai si avang hian boruak chuan sosan lam a pan phah ta zel niin a hriat a ni. Tharum thawh lam ni loa dan hmanga NGO tangrualte’n hmalak an tum hi a fuh hlein a hriat bawk a ni.

 

Eng pawh nise, CEO chetdan khan Bru chungchanga thu kallai mek awm chu a rawn vaw alh lehzuala, Mizorama vote thlakna tur hmun thenkhat hi communal zawnga kaltir pawi tilo an awm emaw ni aw? tih theih a ni hial a. Kum 20 chuang Mizoram chhuahsan tawh, vawi tam tak koh pawha lo haw duh tlat lo Bru te chu vote thlak chungchangah inthurual tir tumna awm niin a lang thei hial a. Mizote duhdan ang hian Bru hi Mizoram chhungah vote thlaktir pawh nise an vote hi a hlawm tawh ngawtin a rin awm a, chumi chu tutein nge hlawkpui ber ta ang? tihte pawh hi inthukru viau anga a lan lai hian a chiang thawkhat viau tho si a ni.

 

Electoral roll a Bru dan lo anga thun luih hi a awm a nih chuan ram leilung inzah lohsakna lian tak a ni ngei mai a. Hemia mawhphurtua puh officer hi hnam dang ni mah se district danga a awm lai chuan hmingtha tak a ni a, tuna a chetdan hi a mak ang reng hle a, tih tirtu an awm ni hialah a ngaih theih mai dawn alawm le.

 

Mizo angin ram tana tha ber tur ngaih tuahna lian tak sen mek a ni a, tuna thlen chin hi a tawpna a la ni dawn loa a bul tanna ang chauh a ni a, bul tan a nih tawh chuan a tawp thleng rak hi thlen law law ngam a hun khawp ang.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.