MLA Fund chungchang

Mizoram MLA ten kum khat chhunga an bial hmasawnna hnathawh nan nuai 100 an nei a, he an fund hi MLA ten an duh duha an hman tur leh an hman theih a ni a. Chutih rual erawh chuan he fund in a tum ber erawh chu MLA ten an bial chhunga an ngaih pawimawh tak hna thawk se tihna a ni ber.
MLA fund chungchangah hian Aizawl North II Constituency bialtu MLA Dr. Vanlalthlana chuan a bial chhung veng hrang hranga NGO (YMA, MUP, MHIP leh Sporting Club) te chu kokhawmin MLA Fund hman dan tur a duan te Powerpoint presentation hmangin a sawifiah a, MLA Fund zaa sawmhnih chuang chu veng hrang hranga NGO ten hmasawnna hna an thawhna turin a dah tih a sawi a. MLA fund hi kumtin tlem te tea dawng lova a hlawma an dawn theihna turin a ruahman a, veng hrang hranga YMA, MUP, MHIP leh Sporting Club ten an dawn kum tur pawh a pawh tir bawk a ni.
Hetia Aizawl North II bialtu MLA-in langtlang tak maia a fund hman dan tur vantlang hriata a puangzar ngam hi a fakawm hle mai. Hun kal tawh han thlirkir ila MLA tam tak chuan an fund hi anmahni party mi leh sa bakah chhungkhat laina duhsakna atan an hmang fo thin a. MLA tam tak phei chuan an fund hmanna hi an sawichiang duh lo hial a, mi thahnemngai ten an chhuichianna thinah chuan eng emaw bill lem hmangtein mahni invurna atana lo hmangte pawh an awm hial niin an sawi.
Aizawl North II bialtu MLA hian a tum ang taka MLA fund hi a hmang a nih chuan party induhsak bikna ang chi pawh a awm thei dawn lo a. Chu mai ni lovin, NGO zingah pawh number pawh anih miau avangin induhsak bik tia sawi tur pawh a awm thei dawn lo a, chumai ni lovin tlem te tea inpe lovin hnathawh tak tak theihna tur sum pek a nih dawn avangin project tihpuitlin loha awm thin tam tak pawh a tlem phah ngeiin a rinawm bawk.
MLA Fund hi dan dik taka hman anih chuan cheng nuai 100 hi a tlem lo a, nasa takin hna a thawk thei a ni. Mizoramah MLA kan nei a, chuti a nih chuan kum khatah MLA fund atangin hmasawnna hnathawh nan nuai 4000 a awm tihna a ni a, dan dik tak leh langtlang takin hman ni ta vek se chuan Mizoram hian nasa takin hma a sawn phah ngei ang. Aizawl North II bialtu MLA-in langtlang tak leh hleih nei miah loa fund hman a tum hi a fakawm a, MLA dangte pawh hian hetiang hian ruahmanna siam thin se Mizoram hian kan sawtpui ngei a beiseiawm e.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?