MR bill-ah Sawrkar a khauh lehzual a ngai

Assembly Session neih mekah Mizoram sawrkar hnuaia hnathawk medical inenkawlna tam lutuk chu Ruling leh Eptu lamin an ngai mawh hle tih an sawi chhuak a. 2016-2017 kumkal mekah vaibelchhe 78 chuang medical reimbursement ah hian senral a ni a, kum thar budget ah vaibelchhe 98.51 lai MR tan hian dah a ni leh bawk a ni.

Medical claim atana sum dah hi a tam hle mai a, kumin session mai nilo kum dangah te pawh sawichhuah a lo ni tawh thin a, Sawrkar lam pawhin hemi zirchiang tur hian Committee a din phah a, an zirchianna report a luh hunah awmze neia hmalak tum a nih thu Finance Minister Lalsawta pawhin a sawi tawh kha.

Healh care hi mitin mamawh a nih avangin ram changtlung zawka ngaih te pawhin vawiin thlengin an la buaipui a, welfare state ah phei chuan sawrkarin ram mipuite inenkawlna a buaipui sak a, chutiang rama khua leh tui nih chu mi tam takin an thlahlela a ruka pem lut te pawh an tam thin reng a ni. Keini ang ram rethei, hmaraw that lemlohnaah phei chuan health care hi rilruah a tla na lo thei lo a ni.

Sawrkar hnathawk leh an mahnia innghat te tana sawrkarin dammawh hritlana an in enkawlna senso a tum sak thin hi Sawrkar hnathawk te an hlutna a ni a, sawrkar in a tihsak pawh hi a awm viau a ni. Chutih rualin Mizoramah hian sawrkar hnathawk te’n hamthatna an hmuh ang hi an claim uchuak ta lutuk deuhin a lang thei a, a endiktu lamin bill lem man an neihthu te, chhung hla deuh te thlenga la inkep ching sawi tur la awm te hi thil zahthlak tak chu a ni. Hnathawkte’n an pawisa dah khawl emaw MR an dil te chu a chhuah hun an nghah ve thin a ngai a, a buaipuitute’n sum lo hauh vea tih sak hmasak an lo nei thin tih media lama a lo lang lehzel phei kha chu thil pawi tak a ni a. Hlemhletna a inphum thuk hle a, mi rilru nasa takin a tihhnual a rinawm khawp mai. Hetiang tihching te chu an hming tlangzarh mai bakah hremna pek an nih dan nen lama thehdarh vak thin ni mai se tiin ngaihtuahnaah a awm rum rum thei awm e.

Budget hi ram pumin kan in tawm avangin Sawrkar hnathawk medical reimbursement chungchang zirchianna report a luh hunah pawh Sawrkar hian a hnathawk bakah mipui dah langsar ber sela a that rinawm a.Keini ang ram pachhe tan chuan inhriatthiamna anga kal zel hi a rem loh chin a awm thei thuai ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?