MYC-in Youth Summit leh Road show buatsaih dawn

Aizawl: Mizoram Youth Commission chuan thalaite hmasawnna leh infuihna atan MYC Youth Summit & Road Show 2018 chu April 17, 2018 atanga May 31, 2018 inkar chhung hian Mizoram khawpui hrang hrangah neih an tum.

Youth summit & road show neih tum chungchang sawi fiahin nimin khan MYC Chairman Joseph Lalhimpuia chuan a pisaah chanchinbu mite a kawm a, summit leh road show chu thalaite tana buatsaih a nih avangin thalai ten ngai pawimawhin a hlawkna tel ngei se a duh tih a sawi. MYC chairman chuan summit & road show chu April 17, 2018 zing dar 11 hian Assembly annexe ah hawn a ni dawn tih sawiin Mizoram khawpui hrang hrangah neih a nih hnuin a kharna hi May ni 31,2018 khian Saikuti hall, Lunglei ah neih tum a nih thu a sawi. MYC chairman chuan, “Youth summit & road show-ah hian stall 50 hawn tum a ni a, sawrkar department hrang hrang leh private agency te an inpho dawn a. Lehkha zirna leh hnathawh tur thlenga kawng inkawhhmuh nana tangkai taka hman tura buatsaih a ni,” a ti.

MYC chairman chuan Mizo thalai tam zawk central service-ah an luh theih nan leh thalaite fuih phurnan MYC chuan incentive cash award pek a tum tih a sawi a, “Kan ruahman dan chuan central service a inziak tling te, army officer, university a gold medalist te hi nuai 1 pek kan tum a, tunah hian mi 60 vel diltu an awm a, nuai 40 dawn chu semral turah kan inngai a. Tunah hian kan endik mek a, June thla velah chuan sem hman kan tum a ni,” a ti a. Tuna nuai 1 an pek tur chu nuai 3 thlenga tihpun an tum tih a sawi bawk. Joseph Lalhimpuia chuan district tinah thalai chhuanawm ‘Young Achiever Award’ sem tumin hma an la mek tih a sawi a. Zirlaite leh kohhran thalaite tan pawh exposure tour a tam thei ang ber ruahman an tum tih Press mite a hrilh bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?